ខេត្តកំពង់ស្ពឺ ៖ នារីវ័យក្មេងម្នាក់ បានចុះពីលើផ្ទះទៅដាក់ចំបើងឱ្យគោស៊ីកណ្តាលយប់ ស្រាប់តែត្រូវបុរសស្រវឹងម្នាក់ ប្រទះឃើញ ក៏លបចូលមកចាប់ឱបពីក្រោយ ប៉ុនប៉ងចាប់រំលោភសេពសន្ថវៈ ប៉ុន្តែត្រូវនារីរងគ្រោះប្រឹងរើបម្រះ ស្រែកឆោឡោ ហៅគេឯងឱ្យជួយ ធ្វើឱ្យជនល្មោភកាមភ័យស្លន់ស្លោ រត់គេចខ្លួនបាត់ ទីបំផុតនារីរងគ្រោះដាក់ពាក្យបណ្តឹង ក៏ត្រូវសមត្ថកិច្ចតាមចាប់ខ្លួនយកមកចាត់ការតាមច្បាប់។
ករណីប្រុសស្រវឹងប៉ងចាប់រំលោភកូនក្រមុំគេទាំងកណ្តាលយប់នេះ បានកើតការភ្ញាក់ផ្អើលឡើងកាលពីវេលាម៉ោង១០ និង០៩នាទីយប់ ថ្ងៃទី២៥ ខែមីនា ឆ្នាំ២០១៨ នៅចំណុចខាងក្រោយផ្ទះរបស់នារីរងគ្រាះ ស្ថិតក្នុងភូមិសូគង ឃុំស្នំក្រពើ ស្រុកគងពិសី។ លុះនារីរងគ្រោះដាក់ពាក្យបណ្តឹង សមត្ថកិច្ចក៏ចុះស្រាវជ្រាវចាប់ខ្លួនជនសង្ស័យបាន កាលពីវេលាព្រឹក ថ្ងៃទី២៦ ខែមីនា ឆ្នាំ២០១៨ នៅចំណុចផ្ទះជនសង្ស័យ ស្ថិតក្នុងភូមិ ត្រើយត្រក ឃុំស្នំក្រពើ ស្រុកគងពិសី។
ជនសង្ស័យល្មោភកាមដែលផឹកស្រាស្រវឹង ឃើញនារីក្រមុំដាក់ចំបើងគោកណ្តាលយប់ ស្រាប់តែបែកគំនិតចាប់រំលោភមិនសម្រេច បែរជាជាប់ខ្នោះនេះ មានឈ្មោះកន ឆៃយុទ្ធ អាយុ២៨ឆ្នាំ មុខរបរមិនពិតប្រាកដ មានលំនៅក្នុងភូមិត្រើយត្រក ឃុំស្នំក្រពើ ស្រុកគងពិសី។ ចំណែកនារីរងគ្រោះ មានឈ្មោះ ម.ប.ភ អាយុ២១ឆ្នាំ មានលំនៅក្នុងភូមិឃុំកើតហេតុខាងលើ។
តាមសម្តីរបស់នារីរងគ្រោះ បានរៀបរាប់ប្រាប់សមត្ថកិច្ចថា នៅមុនពេលកើតហេតុ កាលពីវេលាម៉ោង១០និង០៩នាទីយប់ ថ្ងៃទី២៥ ខែមីនា ឆ្នាំ២០១៨ នាងបានចុះពីលើផ្ទះ ដើម្បីទៅដាក់ចំបើងឱ្យគោស៊ីនៅក្រោលគោខាងក្រោយផ្ទះតែម្នាក់ឯង។ លុះពេលដែលនាងកំពុងតែដាក់ចំបើងគោ ស្រាប់តែលេចមុខជនសង្ស័យឈ្មោះកន ឆៃយុទ្ធ ដែលជាមនុស្សធ្លាប់ស្គាល់មុខគ្នា រស់នៅភូមិជាប់គ្នា មិនដឹងជាលបចូលមកក្នុងបរិវេណផ្ទះរបស់នាងតាំងពីថ្មើរណា បានស្ទុះចូលមកចាប់ឱបនាងពីក្រោយជាប់ រួចធ្វើសកម្មភាពប៉ុនប៉ងរំលោភនាងទាំងកំរោល តែភ្លាមនោះ នាងបានខំរើបម្រះ និងបានស្រែកហៅបងប្អូនអ្នកជិតខាងឱ្យជួយ ទើបធ្វើឱ្យជនសង្ស័យភ័យខ្លួន ក៏រត់គេចខ្លួនបាត់ស្រមោល ខណៈដែលមានអ្នកភូមិ និងក្រុមគ្រួសាររបស់នាងផ្អើលចេញមកជួយអន្តរាគមន៍ភ្លាមៗដែរ។
នារីរងគ្រោះបានបន្តថា ក្រោយពីត្រូវប្រុសព្រានប៉ុនប៉ងចាប់រំលោភទាំងកណ្តាលយប់មក នៅព្រឹក ថ្ងៃទី២៦ ខែមីនា ឆ្នាំ២០១៨ នាងក៏ត្រូវឪពុកម្តាយនាំទៅដាក់ពាក្យបណ្តឹង ដើម្បីឱ្យសមត្ថកិច្ចជួយរកយុត្តិធម៌ដល់នាង រហូតឈានដល់ការចាប់ឃាត់ខ្លួនជនសង្ស័យខាងលើ នាំយកមកសាកសួរ និងចាត់ការតាមច្បាប់តែម្តង។
សមត្ថកិច្ចមូលដ្ឋាន បានបញ្ជាក់ថា នៅព្រឹកថ្ងៃទី២៦ ខែមីនា ឆ្នាំ២០១៨ ក្រោយទទួលបានពាក្យបណ្តឹង និងស្តាប់ការបំភ្លឺរបស់នារីរងគ្រោះរួចមក សមត្ថកិច្ចជំនាញស្រុកក៏ចុះធ្វើការស្រាវជ្រាវ និងចាប់ឃាត់ខ្លួនជនសង្ស័យខាងលើតែភ្លាមនោះ ជនសង្ស័យបានព្យាយាមឆ្លើយបដិសេធ ដោយប្រកែកដាច់អហង្កាថា រូបគេមិនបានប្រព្រឹត្តដូចការចោទប្រកាន់ពីភាគីនារីរងគ្រោះនោះឡើយ និងព្យាយាមក្រាញននៀលមិនចង់ទៅជាមួយសមត្ថកិច្ចឡើយ។ លុះសមត្ថកិច្ចពន្យល់ពីនីតិវិធីចប់សព្វគ្រប់ ទើបជនសង្ស័យបានយល់ និងព្រមមកជាមួយសមត្ថកិច្ចដោយសម្រួល និងត្រូវសមត្ថកិច្ចបញ្ជូនទៅសាកសួរ នៅអធិការដ្ឋាននគរបាលស្រុកគងពិសី។
នៅចំពោះមុខសមត្ថកិច្ច ជនសង្ស័យឈ្មោះកន ឆៃយុទ្ធ បានឆ្លើយសារភាពថា នៅមុនពេលកើតហេតុ កាលពីល្ងាចថ្ងៃទី២៥ ខែមីនា ឆ្នាំ២០១៨ រូបគេ បានជួបជុំមិត្តភក្តិផឹកស្រា រហូតដល់កណ្តាលយប់ ចាប់ផ្តើមស្រវឹងធ្លាក់ភ្នែក ក៏ដើរត្រឡប់ទៅផ្ទះវិញ លុះពេលដើរកាត់ផ្ទះនារីរងគ្រោះ ស្រាប់តែប្រទះឃើញនារីរងគ្រោះកំពុងតែដាក់ចំបើងឱ្យគោតែម្នាក់ឯង ទើបកើតមានអារម្មណ៍តណ្ហាចង់រួមរ័ក ណាមួយនឹកគិតថា យប់ជ្រៅ ឱកាសស្ងាត់ល្អផងក៏លបចូលក្នុងរបងផ្ទះនារីរងគ្រោះ បំណងចាប់នាងរំលោភ តែការគិតនេះមិនបានសម្រេចនោះទេ ព្រោះពេលធ្វើសកម្មភាព ត្រូវនាងរងគ្រោះរើបម្រះផង ស្រែកហៅបងប្អូន និងអ្នកជិតខាងឱ្យជួយផង ទើបធ្វើឱ្យកើតមានការផ្អើលឆោឡោពេញភូមិ ទើបរូបគេឃើញស្ថានការណ៍មិនស្រួល ក៏រត់គេចខ្លួន ទីបំផុតព្រឹកស្អែកឡើង ក៏ត្រូវសមត្ថកិច្ចចុះមកចាប់ខ្លួនតែម្តង។
ជនសង្ស័យខាងលើ ត្រូវបានសមត្ថកិច្ចរៀបចំកសាងសំណុំរឿង បញ្ជូនខ្លួនទៅកាន់ការិយាល័យប្រឆាំងការជួញដូរ និងការពារអនីតិជន នៃស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមនីតិវិធី៕