តារាចម្រៀងវ័យក្មេងផលិតកម្មសាន់ដេ នាងអ៊ីវ៉ា ដែលមានព័ត៌មានថា បានក្លាយទៅជាសមាជិកថ្មីរបស់ផលិតកម្មរស្មីហង្សមាស ទៅហើយនោះ ស្រាប់តែបែរជាចេញបទចម្រៀងនៅសាន់ដេ សម្រាប់បុណ្យចូលឆ្នាំខ្មែរ នេះ ធ្វើព្រងើយទៅវិញ ដែលធ្វើឱ្យម្នាក់ៗចង់ដាច់ផ្ងារ។ ទោះជាយ៉ាងណា ព័ត៌មានចុងក្រោយបានឱ្យដឹងថា អ៊ីវ៉ា បានសម្រេចចិត្តបោះចោលហង្សមាស ហើយទៅផ្ញើខ្លួនជាមួយផលិតកម្មថោន ដែលបទចម្រៀងសម័យរបស់នាង នឹងចេញក្រោយចូលឆ្នាំខ្មែរ ខាងមុខនេះហើយ…។
អ៊ីវ៉ា ធ្វើឱ្យទស្សនិកជនរង់ចាំអ៊ុតតារាចម្រៀងរូបនេះយ៉ាងអន្ទះសា ព្រោះមានព័ត៌មានថា តារាវ័យក្មេងរបស់ផលិតកម្មសាន់ដេ រូបនេះ បានចូលទៅជ្រកនៅផលិតកម្មហង្សមាស តាមខេមរៈ សិរីមន្ត និងសុខ ស្រីនាង ទៅហើយ ក្រោយពេលដែលនាងចប់កុងត្រាជាមួយសាន់ដេ ហើយនិយាយថា បន្តិចទៀតគង់តែអ្នកទាំងអស់គ្នា បានដឹងថា នាងទៅណាទៅណីនោះ។ ប៉ុន្តែ នៅពេលដែលមហាជនជាច្រើនកំពុងតែរង់ចាំមើលអ៊ីវ៉ា ថា នឹងចេញបទចម្រៀងនៅហង្សមាស ពីរោះយ៉ាងណានោះ ស្រាប់តែតារាចម្រៀងសាច់សខ្ចីរូបនេះ បែរជាថតបទចម្រៀងកន្ទ្រឹម សម្រាប់ចូលឆ្នាំខ្មែរ ឱ្យផលិតកម្មសាន់ដេ តទៅទៀតទៅវិញ ដែលធ្វើឱ្យម្នាក់ៗចង់ដាច់ចង្កេះ ព្រោះថា អ៊ីវ៉ា មិនដាច់អាល័យពីទ្រនំចាស់ឡើយ។
ក្នុងជំនួបតាមទូរស័ព្ទ កាលពីពេលថ្មីៗនេះ តារាចម្រៀងវ័យក្មេងមកពីខេត្តកំពង់ស្ពឺ បានឱ្យដឹងថា នាងត្រៀមចេញ២បទដែរ សម្រាប់បុណ្យចូលឆ្នាំខ្មែរនេះ តែមិនទាន់ហ៊ានសន្និដ្ឋានទេថា បទនោះចេញទៅយ៉ាងម៉េចនោះ ព្រោះទាល់តែចេញ ទើបបានដឹងច្បាស់។
អ៊ីវ៉ា ឬឃីន ស្រីនាថ វាចាថា “បទចម្រៀងកន្ទ្រឹមខ្ញុំ ទើបថត MV ហើយថ្មី២ហ្នឹង មិនដឹងថាម៉េចទេឆ្នាំហ្នឹង អត់ទាន់ហ៊ានថាមុនទេ ចាំដល់ចេញតែម្តងទៅ។ ខ្ញុំនៅតែច្រៀងឱ្យផលិតកម្មសាន់ដេ អ៊ីចឹងតែមិនកុងត្រាទេ គឺផុតកុងត្រា ហើយខ្ញុំអត់កុងត្រាថ្មីទេ គ្រាន់តែមានបទចម្រៀងនៅច្រៀងធម្មតាដូចមុន”។
ទោះបីតារាចម្រៀងអ៊ីវ៉ា ថា នាងច្រៀងបន្តនៅផលិតកម្មសាន់ដេ ក៏ដោយ តែដំណឹងចុងក្រោយបានឱ្យដឹងថា តារាវ័យក្មេងសំឡេងពីរោះរូបនេះចេញបទចម្រៀងឱ្យផលិតកម្មសាន់ដេ សម្រាប់បុណ្យចូលឆ្នាំខ្មែរនេះ គឺជាបទចុងក្រោយហើយ ព្រោះពេលនេះនាងបានឈានចូលផលិតកម្មថោន ដោយសម្ងាត់។
ប្រភពពីអ្នកដឹកនាំសម្តែងខារ៉ាអូខេល្បីឈ្មោះម្នាក់ បានបង្ហើបឱ្យដឹងថា អ៊ីវ៉ា បានបោះបង់ចោលផលិតកម្មរស្មីហង្សមាស ហើយទៅចូលរួមជាមួយផលិតកម្មថោន វិញ ដែលបទចម្រៀងរបស់នាងនឹងចេញជាផ្លូវការនៅក្រោយពេលបុណ្យចូលឆ្នាំខ្មែរ រួចហើយនោះ។ ព័ត៌មានបានឱ្យដឹងទៀតថា ថោន ស្វាគមន៍អ៊ីវ៉ា យ៉ាងកក់ក្តៅ ព្រោះផលិតកម្មមួយនេះត្រូវការតារាចម្រៀងល្បីៗថែមទៀត ដើម្បីប្រជែងជាមួយហង្សមាស នាពេលអនាគត ហេតុនេះហើយបានជាឆក់យកអ៊ីវ៉ា បានមុនហង្សមាស។ នេះគឺជាតារាទី៣ ហើយរបស់ផលិតកម្មសាន់ដេ ដែលលោតចូលទៅផលិតកម្មថោន រួមមាន មាស សុខសោភា, កែវ វាសនា និងអ៊ីវ៉ា។
អ៊ីវ៉ា និយាយលាយឡំសំណើចថា “ពីមុនថា ខ្ញុំហ្នឹងចូលហង្សមាស ឥឡូវថា ខ្ញុំចូលថោន វិញ (សើច)។ ពិបាកដែររឿងហ្នឹង! សម្រាប់ខ្ញុំពេលនេះមិនមានកុងត្រាជាមួយផលិតកម្មណាទេ ហើយបើខ្ញុំច្រៀងនៅផលិតកម្មថ្មី ឬផលិតកម្មចាស់ ក៏ខ្ញុំមិនកុងត្រាទៀតដែរ គឺចង់ច្រៀងដោយមិនមានកុងត្រាតែម្តង។ អំឡុងពេលដែលមានព័ត៌មានថា ខ្ញុំនៅអីនេះនៅអីនោះ គឺខ្ញុំចង់សម្រាកមួយរយៈពេលខ្លីសិន ហើយពេលបុណ្យចូលឆ្នាំខ្មែរ ហើយខ្ញុំនឹងត្រៀមចេញបទសម័យឡើងវិញ។ ចំណែកថា ខ្ញុំនឹងនៅផលិតកម្មណា គឺខ្ញុំសូមមិននិយាយទេ ទុកឱ្យបងប្អូនបានដឹងច្បាស់នៅពេលដែលបទចម្រៀងថ្មីរបស់ខ្ញុំចេញមកតែម្តងទៅ”។
អ៊ីវ៉ា ធ្លាប់អះអាងថា មានផលិតកម្ម២ គឺថោន និងហង្សមាស ធ្លាប់ទាក់ទងនាងឱ្យទៅចូលរួមមែន តែនាងមិនទាន់សម្រេចចិត្ត ព្រោះនៅចាំគិតមើលសិនថា បើសិនជាសាន់ដេ នៅឱ្យតម្លៃលើរូបនាងថាជាតារាម្នាក់មានគុណសម្បត្តិម្នាក់នោះ គឺនាងនឹងនៅបន្តទៀត តែបើសិនជាគេមិនឱ្យតម្លៃទេ នាងមានតែចាកចេញប៉ុណ្ណោះ។
ដោយឡែក លោកអ៊ូ រ៉ាវ ឪពុកតារាចម្រៀងវ័យក្មេងរូបនេះធ្លាប់ប្រាប់ដែរថា ការសម្រេចចិត្តថា គូច្រៀងនៅទីណារបស់តារាចម្រៀងអ៊ីវ៉ា នោះ គឺនៅលើការសម្រេចចិត្តរបស់លោក ហើយថា ជាធម្មតាទេ ទឹកត្រជាក់ត្រីកុំហើយ តែបើទឹកត្រពាំងល្អក់វិញ តើគេនៅផឹកទឹកនោះទៀតដែរឬអត់? តែឪពុកលោកអ៊ីវ៉ា ថា អ៊ីវ៉ា ចាត់ទុកផលិតកម្មសាន់ដេ ដូចជាឪពុកម្តាយទី២ របស់ខ្លួនដែរ។
អ៊ីវ៉ា បានចូលជ្រកកោននៅផលិតកម្មសាន់ដេ ជាង៨ឆ្នាំ ដោយបទចម្រៀងនាងល្បីសឹងគ្រប់បទទាំងអស់ ធ្វើឱ្យកេរ្តិ៍ឈ្មោះនាងហក់ឡើងយ៉ាងឆាប់រហ័ស សឹងមិនគួរឱ្យជឿ។ តារាកូនកាត់ចិន នាងអ៊ីវ៉ា ក៏ធ្លាប់មានព័ត៌មានថា ត្រូវលោកថៅកែក្លឹបកម្សាន្ត និងហាងបញ្ចាំដ៏ធំមួយនៅក្រុងសៀមរាបលោក “ប” ដែលតាមស្នេហ៍នាងជាច្រើនឆ្នាំនោះ ចង់ឱ្យស្រីក្មេងរូបនេះលោតចូលផលិតកម្មហង្សមាស ដែរ ដោយលោកថៅកែនឹងធ្វើការអន្តរាគមន៍ទិញអ្នកនិពន្ធល្បីៗ និពន្ធបទចម្រៀងឱ្យនាងច្រៀង ដើម្បីឱ្យនាងកាន់តែល្បីថែមទៀត តែអ៊ីវ៉ា ដែលមិនព្រមផ្សះផ្សាស្នេហ៍ជាមួយលោកថៅកែនោះ ហាក់ផ្គើនដាក់បុរសទ្រព្យស្តុកនេះខ្លាំង ដោយមិនត្រឹមតែមិនស្តាប់រឿងហាមមិនឱ្យរាំ និងសម្តែងភាពស្និទ្ធស្នាលជាមួយតារាប្រុសៗនោះទេ តែចុងក្រោយបែរជាមានដំណឹងដែលគួរឱ្យទុកចិត្តបានថា អ៊ីវ៉ា បានចូលជាសមាជិកថ្មីរបស់ផលិតកម្មថោន ទៅហើយ៕