ថែល ថៃ-ឈីន រតនៈ ឡើងច្រៀងក្នុងកម្មវិធីប្រគំតន្រ្ដី ស្និទ្ធស្នេហ៍ក្រោយឆាក

ម្ចាស់ពាន The Voice Cambodia រដូវកាលទី២ ថែល ថៃ​ លេចមុខជាលើកដំបូងក្នុងកម្មវិធីប្រគំតន្រ្ដី “ខារ៉ាបាវ Spark Concert 2018” នៅទល់មុខស្ថានទូតចិន ដោយបានបណ្ដើរទាំងតារាតូចច្រឡឹង នាងឈីន រតនៈ អ្នកចម្រៀងក្រោមដំបូលតែមួយទៅជាមួយគ្នាផងដែរ។

ស្រីស្រអែមស្រស់ប៉ះប្រុសសង្ហា១គូនេះ បានបង្ហាញភាពស៊ីចង្វាក់គ្នាខ្លាំងនៅក្រោយឆាក ហើយពួកគេបានបង្ហាញអារម្មណ៍ដូចគ្នាថា មានអារម្មណ៍រីករាយដែលបានច្រៀងនៅឆាកតន្រ្ដីប៉ុស្ដិ៍លេខ៥លើកដំបូងដូចគ្នានោះ។

ថែល ថៃ ថ្លែងថា ”ខ្ញុំមានការងារសិល្បៈច្រើននៅឆ្នាំនេះ ព្រោះរវល់ជាប់ច្រៀង Concert ជាហូរហែតាមខេត្ត អីចឹងមិនសូវបានទំនេរទេ តែសប្បាយចិត្តដែលរកប្រាក់ចំណូលបានច្រើនជាងឆ្នាំមុនៗ។ដោយឡែក សម្រាប់ឆាកតន្ដ្រីប៉ុស្ដិ៍លេខ៥នេះ ជាលើកដំបូង សម្រាប់ខ្ញុំមានអារម្មណ៍ថា សប្បាយចិត្តដែលបានជួបបងប្អូនយ៉ាងច្រើនមកទស្សនានៅទីនេះ”។ ចំណែកនាងឈីន រតនៈ វិញ ក៏សម្ដែងអារម្មណ៍ស្រដៀងនឹងលោកថៃ ដែរថា ”ខ្ញុំមកច្រៀងនៅប៉ុស្ដិ៍លេខ៥ កម្មវិធី “ខារ៉ាបាវ Spark Concert 2018” ហ្នឹងលើកទី១ ដូចបងថែល ថៃ ដែរ ហើយខ្ញុំរីករាយដែរ ព្រោះថាមានបងប្អូនមកទស្សនាច្រើន ដោយសារមានតារាល្បីៗមកគ្រប់ផលិតកម្មប៉ះគ្នា”។

ថែល ថៃ បានវិវឌ្ឍខ្លួនពីការច្រៀងដែលមិនសូវចេះរាំ មកជាមានក្រុមរាំអម៤នាក់ ហើយរាំកញ្ជ្រោកលើឆាកតន្ដ្រី ដោយយកបទល្បីៗរបស់ខ្លួនមកអូសទាញការគាំទ្រ មានដូចជា បទ ”សាច់កម្មណាស់ខ្ញុំ”, ”ស្នេហ៍អូនកាម៉ាប់”, ”ពូជិះតាក់ស៊ី” និងបទ ”ជឿមិនជឿ?”។ ដោយឡែក នាងឈីន រតនៈ ច្រៀងបទ ”អ្នកមិនអន់ទេ”, ”សុំថែមម៉ោង” និងបទ ”សង្សារស្អាតជ្រុល”។

ក្រៅពីថែល ថៃ និងនាងឈីន រតនៈ នោះ កម្មវិធីប្រគំតន្ដ្រី “ខារ៉ាបាវ Spark Concert 2018” កាលពីថ្ងៃទី២២ ខែមេសា ឆ្នាំ២០១៨ ក៏មានការចូលរួមពីតារាចម្រៀងនាងអ៊ុង នីនិច្ច ដែលលើកយកបចម្រៀងបទ​”ស្នេហ៍តែបងមួយ”, ”ហាមញ៉ែ”, ”ត្រូវតែទទួលយក” និងបទ ”Say Good bye”។ រីឯនាងហ៊ិន លីដា ច្រៀងបទ ”បេះដូងរងគ្រោះ”, ”សង្សារ part time”, ”កុំលង់ស្នេហ៍មេឃ ភ្លេចសង្សារ” និងបទ ”ក្មេងមិនទាន់គ្រប់អាយុហាមញ៉ែ”។

គួរបញ្ជាក់ថា ថែល ថៃ និងឈីន រតនៈ ជាបេក្ខភាព The Voice Cambodia រដូវកាលទី២ ដែលឈានទៅដល់វគ្គផ្ដាច់ព្រ័ត្រដូចគ្នា រួមជាមួយនាងសាន ស្រីឡៃ និងឃី សុគន្ធ ផងដែរ តែហង្សមាស បានឲ្យថែល ថៃ ដែលជាកូនក្រុមឱក សុគន្ធកញ្ញា គឺជាម្ចាស់ពានរង្វាន់ជ័យលាភីពីកម្មវិធីប្រលងចម្រៀងនេះ។ ពេលនេះ ថែល ថៃ មានទីផ្សារចម្រៀង ហើយបន្ទាប់ពីល្បីបទ ”សាច់កម្មណាស់ខ្ញុំ” និងបទ ”ចង់ទៅទៅៗ” ហើយលោកថៃ ក៏ឈានទៅថតភាពយន្ដរឿង ”រាជនីយភូមិគ្រឹះ” និងរឿង ”រាជបុត្រកង្កែប” របស់ក្រុមហ៊ុនហង្សមាស ផងដែរ៕