តារាសម្ដែងអាឡិច ចាន់ត្រា បានធ្វើពិធីសម្ពោធផ្ទះវីឡាភ្លោះរបស់ខ្លួន កាលពីល្ងាចថ្ងៃទី២៦ ខែមេសា ឆ្នាំ២០១៨ នៅបុរីប៉េងហួត ដោយមានតារាសិល្បករល្បីៗជាច្រើនបានចួលរួមយ៉ាងច្រើនកុះករ ដើម្បីអបអរសាទរបុរសសង្ហារូបនេះ។ផ្ទះវីឡាយ៉ាងស្កឹមស្កៃរបស់អាឡិច ចាន់ត្រា នេះ មានតម្លៃដល់ទៅ៤៨ម៉ឺនដុល្លារ ហើយនេះមិនមែនជាផ្ទះទី១ឡើយ សម្រាប់តារាសម្ដែងរូបនេះ តែវាគឺជាផ្ទះទី៣ហើយ ព្រោះអាឡិច ចាន់ត្រា មានផ្ទះធំ២ផ្សេងទៀត នៅទល់មុខផ្សារសំណង់១២និងជិតឃ្លាំងម៉ូតូ សង្កាត់ទឹកល្អក់ រាជធានីភ្នំពេញ។
សំណួររបស់មហាជនដែលចង់ដឹងនោះថា តើអាឡិច ចាន់ត្រា បានប្រាក់មកពីណាច្រើនម្ល៉េះ ដែលមានលទ្ធភាពទិញផ្ទះជាបន្ដបន្ទាប់បែបនេះ? ព្រោះក្នុងវ័យទើបតែ៣១ឆ្នាំនេះ អាឡិច ចាន់ត្រា ដែលមានទ្រព្យមិនក្រោម១លានដុល្លារឡើយ នេះគ្រាន់តែគិតទៅលើការក្លាយជាម្ចាស់កម្មសិទ្ធិនៃផ្ទះទាំង៣នោះ។
អាឡិច ចាន់ត្រា ក្នុងទឹកមុខរីករាយក្រៃលែងក្នុងថ្ងៃឡើងផ្ទះវីឡាថ្មីនោះ បានឲ្យដឹងថា “ទឹកប្រាក់ដែលបានមកទិញវីឡានេះ គឺជាចំណូលសិល្បៈមួយផ្នែក និងក្រោមការជ្រោមជ្រែងពីឪពុកម្ដាយរបស់គេមួយផ្នែកទៀតទើបបានសម្រេចបំណងធំរហូតដូចសព្វថ្ងៃនេះ ដោយគ្មានអ្នកណាផ្សេងទៀតជួយជ្រោមជ្រែងឡើយ”។
អាឡិច ថ្លែងថា”ផ្ទះ២ជាប់គ្នានេះ មានតម្លៃជិតកន្លះលានដុល្លារ (៤៨ម៉ឺនដុល្លារ) ហើយមូលហេតុដែលខ្ញុំទិញនៅទីតាំងនេះ ព្រោះថានៅជុំវិញមានខុនដូរ មន្ទីរពេទ្យនិងសាលារៀន អីចឹងស្រួលក្នុងការរស់នៅ។ ដោយសារតែមានទីតាំងអំណោយផលបែបនេះហើយ ទើបខ្ញុំនឹងរៀបចំផ្ទះនេះបើកជាហាងម៉ាហ្សា ព្រោះនៅទីនេះមានប្រជាជនច្រើន អីចឹងគាត់អាចមកម៉ាស្សា នៅកន្លែងយើងបាន ដោយមិនបាច់ចេញទៅខាងក្រៅ”។
អាឡិច ចាន់ត្រា បានឲ្យដឹងផងដែរថា “ផ្ទះវីឡានេះ រូបគេទិញផ្ដាច់ ដោយមិនមែនជាការទិញបង់រំលស់ឡើយ”។
ចំពោះការងារសិល្បៈរយៈពេលចុងក្រោយនេះ ក្នុង១ឆ្នាំ អាឡិច ថា គេអាចរកប្រាក់ចំណូលបានជាង១០ម៉ឺនដុល្លារអាមេរិកផងដែរព្រោះការបើកក្រុមហ៊ុនកម្សាន្ដកន្លងមក ទទួលបានជោគជ័យមានការកគាំទ្រច្រើន ហើយឪពុកម្ដាយគេក៏បានចែកកេរឲ្យមួយផ្នែកទៀត ដែលធ្វើឲ្យរូបគេអាចទិញផ្ទះតាមចិត្តស្រលាញ់បាន។ ដោយឡែក ផ្ទះ២ផ្សេងទៀតនោះ អាឡិច នឹងដាក់ជួលវិញ ព្រោះថា លោកនឹងក្រុមគ្រួសារត្រូវមករស់នៅផ្ទះថ្មី ដើម្បីគ្រប់គ្រងហាងម៉ាហ្សា ឲ្យដំណើរការល្អ។
ក្នុងវ័យ៣១ឆ្នាំ តារាសម្ដែងអាឡិច ចាន់ត្រា និយាយថា ខ្លួនមិនទាន់មានគម្រោងរៀបការក្នុងពេលឆាប់ៗនេះឡើយ ។ប៉ុន្ដែ អាឡិច បានសារភាពថា លោកមានម្ចាស់ចិត្តហើយនៅពេលនេះ គឺនារីម្នាក់នៅប្រទេសអូស្រ្ដាលី ដែលមានវ័យស្មើគ្នាគឺ៣១ឆ្នាំ។ អាឡិច ថា លោកនឹងស្វែងយល់ចិត្តគូស្នេហ៍ឲ្យបានច្រើន មុននឹងឈានទៅរកជីវិតអាពាហ៍ពិពាហ៍នាពេលខាងមុខនេះ។
ក្រៅពីអាឡិច ចាន់ត្រា តារាប្រុសដែលកំពុងរស់នៅផ្ទះវីឡាយ៉ាងហ៊ឺហា មានដូចជា លោកព្រាប សុវត្ថិ , ចា រិទ្ធី , ខេមរៈ សិរីមន្ដ, ឆាយ វីរៈយុទ្ធ , ខេម , ពាក់មី, សុគន្ធ ថេរ៉ាយុ , ករុណា ពេជ្រជាដើម ដែលពួកគេលេងទាំងម៉ូដវីឡា និងរថយន្ដប្រជែងគ្នា មិនចាញ់តារាហូលីវូដឡើយ៕
