សួស វីសា បានចូលទៅធ្វើជាគណៈកម្មការប្រលងចម្រៀងក្នុងកម្មវិធី “The Voice Kids Cambodia” នៅរដូវកាលទី២នេះហើយ ដែលបង្កឲ្យមានការភ្ញាក់ផ្អើលច្រើនផងដែរពីមហាជន ដោយមានសំណួរជាច្រើនបានលើកឡើងថា ហេតុអីបានជាមានការផ្លាស់ប្ដូរសុគន្ធ និសា ចេញពីកម្មវិធី ទាំងនាងបានធ្វើជា Coach បានតែ១រដូវកាល ក៏ផ្លាស់ប្ដូរទៅវិញយ៉ាងនេះ?
លោកអ៊ា វណ្ណា អ្នកគ្រប់គ្រងកម្មវិធី “The Voice Kids Cambodia” និយាយខ្លីថា សួស វីសា ពិតជាចូលទៅកាន់ក្នុងតំណែងជាគ្រូបង្វឹកនោះមែន តែបញ្ហាយ៉ាងណានោះ លោកថា មិនទាន់អាចបកស្រាយបានទេ។
លោកវណ្ណា ថ្លែងខ្លីថា ”អូ! រឿងហ្នឹងមែនតើបង កញ្ញាសួស វីសា គាត់ចូលទៅធ្វើជំនួសសុគន្ធ និសា មែន នៅក្នុងកម្មវិធី “The Voice Kids Cambodia” រដូវកាលទី២នេះ ។ តែរឿងហ្នឹងខ្ញុំមិនទាន់និយាយបានទេ ព្រោះឥឡូវកំពុងតែជាប់រវល់…”។
ការទទួលតំណែងធំរបស់សួស វីសា ជាលើកទី១ នៅហង្សមាស នៅពេលនេះ ហាក់គ្មានការរិះគន់ពីទស្សនិកជនឡើយ ព្រោះថានាងជាអ្នកចម្រៀងម្នាក់ដែលមានសមត្ថភាព និងចេញមកពីសាកលវិទ្យាល័យភូមិន្ទវិចិត្រសិល្បៈ ដូចឱក សុគន្ធកញ្ញា ដែរ តែថានាងមានសមត្ថភាពផ្ដល់គន្លឹះដល់ក្មេងៗឲ្យចេះច្រៀងបានកម្រិតណានោះ គឺអាស្រ័យទៅលើភាពជាក់ស្ដែង។ ដោយឡែក គ្រូបង្វឹក២រូបផ្សេងទៀត ក្នុងកម្មវិធី “The Voice Kids Cambodia” នោះមិនមានការផ្លាស់ប្ដូរដូចសុគន្ធ និសា ទេ គឺនៅរក្សាដដែលនោះ គឺលោកព្រាប សុវត្ថិ និងឱក សុគន្ធកញ្ញា ដែលត្រូវចាប់ដៃជាមួយសួស វីសា ។
គួររំលឹកថា មុនបាត់តំណែងជា Coach ក្នុងកម្មវិធី “The Voice Kids Cambodia” នេះ សុគន្ធ និសា ធ្លាប់រងការរិះគន់ពីអ្នកលេងបណ្ដាញសង្គម យ៉ាងខ្លាំង នៅពេលដែលនាងបានជ្រើសយកកុមារីណូ ឈូស៊ីវហេង ដោយទម្លាក់ចោលកុមារី ឃុយ ម៉ីហៀង នោះ។ អ្វីដែលរឹតតែធ្វើឲ្យទស្សនិកជននៅទូទាំងប្រទេសប្រតិកម្មខ្លាំងនោះ គឺចុងក្រោយ ហង្សមាស ថែមទាំងប្រគល់ពាន “The Voice kids Cambodia” រដូវលទី១ ឲ្យពេជ្រ ថៃ នោះ គឺម្នាក់ៗនិយាយមិនចេញ ហើយអ្នកដែលសន្យាថាបើពេជ្រ ថៃ ជាប់លែងស៊ីបាយ ដើរស្រាត និងខ្លះទៀតថា ទៅបួសនោះ និយាយលែងចេញ។
ទោះជាយ៉ាងណា គេរង់ចាំមើលថា ក្រោយផ្លាស់ប្ដូរ Coach សុគន្ធ និសា ដាក់ជំនួសដោយសួស វីសា វិញនោះ កម្មវិធីដែលហង្សមាស ទិញសិទ្ធិ (License) ពីប្រទេសហូឡង់ដ៍ នេះ នឹងមានការរិះគន់ដូចមុនទៀតថា វាជាការរៀបចំរបស់ហង្សមាស ទៀតឬយ៉ាងណា?…៕
