តារាសម្ដែងដើមទ្រួងទ្រលុកទ្រលន់ នាងអៀ ម៉េងលិ ហៅអូនម៉ីម៉ី ដែលល្បីថាជាសង្សារនាយចឺម នោះ បានលេចមុខក្នុងកម្មវិធីសម្ពោធហាងកាហ្វេអ៊ីនថៈនីន សាខាទី២ នៅតាមបណ្ដោយផ្លូវប៉ាស្ទ័រ (បឹងកេងកង) រួមទាំងសាមាជិកតារាប្រុសស្រីជាច្រើនដួងរបស់គ្រួសារតារាកម្ពុជា ផងដែរ ដែលប៉ះគ្នាជាមួយតារាល្បីល្បាញរបស់ថៃ នាង Woranuch (Lam yong) ដែលខ្មែរយើងស្គាល់ថា ជានាងឡាំយ៉ង នោះ បានធ្វើឲ្យអ្នកដំណើរជាច្រើននៅតាមផ្លូវ ចោលភ្នែកក្រឡេកមើលតារាៗនៅហាងហាហ្វេនោះគ្រប់គ្នា កាលពីព្រឹកថ្ងៃទី២៨ ខែមេសា ឆ្នាំ២០១៨។
ក្នុងឈុតសម័យបុរាណដូចគ្នា គេឃើញថា សម្រស់តារាខ្មែរនិងតារាថៃ គឺស្រស់ស្អាតម្យ៉ាងម្នាក់ទេ ពិសេសគឺ អូនម៉ីម៉ី ត្រូវបានគេចាប់អារម្មណ៍ខ្លាំងដែរថា នៅខាងក្រៅ តារាសម្ដែងរូបនេះស្អាតជាងខាងក្នុងទៅទៀត។ អូនម៉ីម៉ី ក៏បានសម្ដែងភាពរីករាយផងដែរ នៅពេលដែលបានចូលរួមកម្មវិធីទាំងព្រឹកព្រលឹម ហើយឃើញតារាទាំងអស់មានការតុបតែងខ្លួនក្នុងឈុតបុរាណ ខុសពីកម្មវិធីផ្សេងៗទៀតនោះ។ ដោយឡែក នាងឡាំយ៉ង ត្រូវបានក្រុមអ្នកគាំទ្រជាច្រើនរបស់នាង ចោមរោមថតរូបជាមួយស្រីស្អាតនេះ ហើយនាងក៏បានបង្ហាញភាពស្និទ្ធស្នាលរាប់អានគ្នាជាមួយតារាខ្មែរ ដូចបងប្អូនដែរ។
ឯកឧត្តមប៉ាវ ហេងតារារដ្ឋ លេខាធិកាក្រសួងពាណិជ្ជកម្ម តំណាងឲ្យឯកឧត្តមប៉ាន សូស័ក្ដិ រដ្ឋមន្ដ្រីក្រសួងពាណិជ្ជកម្ម បានឲ្យដឹងថា “ខ្ញុំមានសេចក្ដីសោមន្សរីករាយក្រៃលែង ដែលបានចូលរួមអបអរសាទរក្នុងកម្មវិធីសម្ពោធហាងកាហ្វេអ៊ីនថៈនីន។ នាពេលបច្ចុប្បន្ននេះ ក្រសួងពាណិជ្ជកម្ម បានធ្វើកំណែទម្រង់គ្រប់ផ្នែក ដើម្បីធានាភាពការងារដល់សម្របសម្រួលដល់ការធ្វើពាណិជ្ជកម្មនៅកម្ពុជា។ ខ្ញុំជឿជាក់ថា តាមរយៈការធ្វើកំណែទម្រង់នេះ នឹងបង្កើនសមត្ថភាពប្រកួតប្រជែងរបស់កម្ពុជា ក្នុងវិស័យពាណិជ្ជកម្ម។ ខ្ញុំសូមជូនពរឲ្យហាងកាហ្វេអ៊ីនថៈនីន ទទួលបានជោគជ័យយ៉ាងត្រចះត្រចង់ ក្នុងការប្រកបអាជីវកម្មរបស់ខ្លួននៅកម្ពុជា”។
ស្រីស្អាតអូនម៉ីម៉ី ក្រៅពីរីករាយក្នុងថ្ងៃគ្រងឈុតបុរាណប្រជែងសម្រស់ជាមួយនាងឡាំយ៉ង នាងក៏ឆ្លៀតបកស្រាយដែរថា មិនមានទំនាក់ទំនងស្នេហាជាមួយនាយចឺម ឡើយ ហើយពេលនេះនាងម្ចាស់ចិត្តពិសេសហើយ គឺជានិស្សិតមកពីខេត្តកោះកុង ដែលកំពុងសិក្សានៅប្រទេសឌូបៃ៕