ផលិតកម្មមហាហង្ស បានសម្ពោធខ្សែរភាពយន្ដខ្នាតធំ រឿង ”ផ្លូវមរណៈ” កាលពីល្ងាចថ្ងៃទី០៧ ខែឧសភា ឆ្នាំ២០១៨ នៅរៀងកុនសូរិយា By Smart នៅផ្សារទំនើបសូរិយា ដោយមានបណ្ដាផលិតករតារាសម្ដែង និងអ្នកសារព័ត៌មានជាច្រើនបានចូលរួម។ ភាពយន្ដដែលទាក់ទងនឹងជីវភាពរស់នៅប្រចាំថ្ងៃរបស់ជនជាតិភាគតិចរូបនេះ មានអ្នកនាងភិន សុដាលីស និងលោកជា សុវណ្ណនរាហ៍ ជាតួឯក រួមទាំងតារាកិត្តិយសជាច្រើនដួងទៀតផងដែរ។
អ្នកនាងភិន សុដាលីស បានប្រាប់អ្នកកាសែតថាអ្នកនាងមានការអៀនច្រើនពេលសម្ដែង ”រឿងផ្លូវមរណៈ” ពិសេសគឺការនិយាយភាសារដឺន ដែលពិបាកនិងមានការហាត់សមជាច្រើនដងណាស់ ទើបធ្វើបាន ហើយនេះគឺជារសជាតិថ្មីមួយទៀតសម្រាប់អាជីពភាពយន្ដរបស់នាងក្នុងការវិលត្រឡប់មកសារជាថ្មីឡើងវិញនាពេលនេះ។សុដាលីស ថ្លែងថា ”ខ្ញុំអៀនច្រើនពេលសម្ដែងរឿងនេះ ពិសេសគឺការនិយាយរដឺន អីចឹងវាពិបាកគួរសមដែរសម្រាប់រូបខ្ញុំ តែការតស៊ូទៅតាមអ្នកដឹកនាំរឿងចង់បាន ខ្ញុំអាចធ្វើបានទៅតាមគម្រោង ហើយមានឈុតពិបាកៗជាច្រើនទៀតដែរ ទាល់តែមកទស្សនាទាំងអស់គ្នា ទើបដឹងច្បាស់”។
រឿង ”ផ្លូវមរណៈ” ជាការនិពន្ធដោយលោកអ៊ិន សុភិន ថៅកែផលិតកម្មមហាហង្ស និងដឹកនាំដោយលោកជុំ វិចិត្រ ដែលនឹងដាក់បញ្ចាំងជាផ្លូវការចាប់ពីថ្ងៃទី១០ ខែឧសភាឆ្នាំ២០១៨នេះតទៅហើយ។
តារាសម្ដែង BIGដែលជាតួអង្គសំខាន់ម្នាក់ក្នុងរឿង ”ផ្លូវមរណៈ” នោះបានច្រៀងសម្ដែងលើឆាកនៅចំពោះមុខភ្ញៀវកិត្តិយសជាច្រើនដែលចូលរួមកម្មវិធីសម្ពោធរឿងនៅផ្សារទំនើបសូរិយា ជាន់ទី៥នោះ ទើបធ្វើឲ្យតារាៗជាច្រើនកាន់តែមានភាពរីករាយ។
លោកអ៊ិន សុភិន ថៅកែផលិតកម្មមហាហង្ស បានឲ្យដឹងថា”រឿងនេះមានការសម្រិតសម្រាំងអស់ពីកម្លាំងកាយចិត្ត ហើយការបោះទុនក៏ច្រើនជាងរឿងមុនៗដែរ ដើម្បីតម្រូវចិត្តទៅទស្សនិកជនរបស់យើង។ អីចឹងតាមរយៈការខិតខំប្រឹងប្រែងរបស់ក្រុមការងារផលិតកម្មនិងតារាសម្ដែងទាំងអស់ ក្នុងរឿង ”ផ្លូវមរណៈ” នេះ ខ្ញុំមានជំនឿថា ទស្សនិកជននឹងជួយបន្ដគាំទ្រ ភាពយន្ដខ្មែរយើងឲ្យកាន់តែមានភាពរីកចំរើនតទៅទៀត”។
គេចាប់អារម្មណ៍ផងដែរថា ក្នុងកម្មវិធីសម្ពោធរឿង ”ផ្លូវមរណៈ” នេះមិនមានការចូលរួមពីតារាសម្ដែង លោកជា សុវណ្ណនរាហ៍ ដែលជាតួឯកប្រុសនោះទេ ទើបធ្វើឲ្យអ្នកចូលរួមកម្មវិធីមានការឿងឆ្ងល់ តែត្រូវលោកអូន ឧស្សាហ៍ ដែលជាអ្នកតំណាងឲ្យមហាហង្ស នោះបានប្រាប់ថា លោកនរាហ៍ មានការរវល់ផ្ទាល់ខ្លួនបានជាអាក់ខានមិនបានមកចូលរួមនេះហើយលោកថា បើសិនជាមិនរវល់ទេ លោកនរាហ៍ ច្បាស់ជាមកចូលរួមជាមិនខាន។
គួរបញ្ជាក់ថា ក្រោយពេលផ្អាកជាច្រើនឆ្នាំក្នុងការសម្ដែងភាពយន្ដ តាំងពីមានកូនស្រីម្នាក់មកនោះ ពេលនេះ ភិន សុដាលីស បានត្រឡប់មកចូលសិល្បៈវិញយ៉ាងពេញទំហឹងវិញ ហើយនេះជារឿងទី២របស់នាងដែលសម្តែងជាតួឯក បន្ទាប់ពីរឿង ”ម្ចាស់បំណុល” ដែលកំពុងចាក់នៅប៉ុស្ដិ៍ PNN នោះ ស្របពេលដែលរឿង ”កាំបិតមុខពីរ” ដាលីស លេងជាតួរង៕
