ភ្នំពេញ ៖ តារាសម្តែងវ័យក្មេងរូបសង្ហា លោកចាន់ ស៊ីស៊ី ហៅចាន់ស៊ី ដែលបាត់មុខពីអាជីពមួយរយៈនេះ បានវិលត្រឡប់មកអុកឡុកក្នុងការថតសម្តែងវិញហើយ និងគ្រាន់តែឈានជើងចូលសិល្បៈសាជាថ្មីភ្លាម បុរសខ្ពស់ស្រឡះរូបនេះ បានចេញមុខជាចំហ សរសើរទៅលើតារាសម្តែងទឹកភ្នែក នាងនី មុនីនាថ ហើយថែមទាំងចាត់ទុកថា ជា “Idol” របស់ខ្លួនទៀតផង។
ការដែលតារាសម្តែងចាន់ស៊ី ពេញចិត្តនី មុនីនាថ រហូតប្រកាសក្តែងៗថា កម្រមានតារាណាអាចធ្វើដូចនាងបាននោះ គឺត្រង់ចំណុច ពេលមុនីនាថ សម្តែងជាតួយំ គឺអាចបង្ហូរទឹកភ្នែកធ្លាក់ជោកថ្ពាល់បានមួយរំពេចតែម្តង អ៊ីចឹងហើយបានជាខ្លួនលោកចាត់ទុកមុនីនាថ ថា ពិតជាមានទេពកោសល្យពិសេសអស្ចារ្យជាងតារាដទៃ។
លោកចាន់ស៊ី ថ្លែងច្បាស់ៗថា “សម្រាប់តារារៀមច្បង ដែលខ្ញុំពេញចិត្តទេពកោសល្យគាត់ខ្លាំងបំផុតនោះ គឺបងស្រីនី មុនីនាថ តែម្តង គាត់លេងល្អខ្លាំងណាស់ បើថា ចង់ឈុតយំ យំ បានភ្លាម មិនដឹងជាទឹកភ្នែកមកពីណាទេ ហូរភ្លាមមួយរំពេច។ និយាយទៅ គាត់ (មុនីនាថ) ជា Idol របស់ខ្ញុំ ដែលខ្ញុំគិតថា គាត់មានទេពកោសល្យខ្លាំងណាស់ មិនងាយតារាណាអាចប្រៀបធៀបជាមួយគាត់បានទេ។ ខ្ញុំស្រលាញ់ ពេញចិត្តគាត់ណាស់”។
ចាន់ស៊ី ធ្លាប់ថតសម្តែងឱ្យផលិតកម្ម សៀកមិន សាស្តា និងល្បីឈ្មោះតាមរយៈការសម្តែងបទ “មិនអាចប្តូរចិត្ត” តែបានផ្អាកការងារសិល្បៈមួយរយៈ ព្រោះងាកទៅធ្វើការងារក្រុមហ៊ុនឯកជនមួយ ជាមួយតួនាទី និងប្រាក់ខែខ្ពស់។ ប៉ុន្តែពេលនេះ ចាន់ស៊ី បានសម្រេចចិត្តវិលចូលក្នុងអាជីពសិល្បៈវិញហើយ ដោយថែមទាំងត្រៀមថតបទថ្មីៗនៅស្រុកកំណើតផ្ទាល់ខ្លួនឯខេត្តបាត់ដំបងទៀតផង។
យ៉ាងណា ការដែលលោកចាន់ស៊ី ចេញមុខ សរសើរនី មុនីនាថ អស់ពីពោះនេះ គឺចំពេលដែលតារាសម្តែងទឹកភ្នែករូបនេះ កំពុងតែមានរឿងអាស្រូវ ព្រោះត្រូវអតីតគូដណ្តឹង លោកអ៊ឹង សូឡាង អាណិកជនខ្មែរនៅអាមេរិក ប្តឹងនាងទៅតុលាការ ដោយចោទមុនីនាថ ថា បានបោកប្រាស់លុយអស់១០ម៉ឺនដុល្លារអាមេរិក។
មានចម្ងល់ថា នៅពេលដែលមុនីនាថ កំពុងតែផ្ទុះរឿងអាស្រូវ ស្រាប់តែលោកចាន់ស៊ី មកប្រកាសសរសើរនិងថា ស្រលាញ់ពេញបេះដូងបែបនេះ តើអ្នកទាំង២មានទំនាក់ទំនងអ្វីជាមួយគ្នាទេដឹង?
តារាសម្តែងចាន់ស៊ី បន្ថែមថា “ខ្ញុំគ្រាន់តែស្រលាញ់ពេញចិត្តបងនី មុនីនាថ ចាត់ទុកគាត់ជារៀមច្បងដែលមានទេពកោសល្យសិល្បៈខ្លាំងម្នាក់ ហើយគាត់ក៏មិនចេះវាយឫកពាថាជាអ្នកល្បីទេ។ រឿងឯកជនគាត់យ៉ាងណានោះ ខ្ញុំអត់បានដឹង និងមិនហ៊ាននិយាយទេ ហើយក្រៅពីនី មុនីនាថ ខ្ញុំពេញចិត្តឡោម លក្ខិណា គឺសុទ្ធតែអ្នកសម្តែងខ្លាំងៗដែរ”៕
