ខេត្តកំពង់ស្ពឺ ៖ ប្រុសព្រានម្នាក់ បានធ្វើសកម្មភាពចាប់រំលោភកូនក្រមុំគេ រួចព្យាយាមរត់គេចទៅសម្ងំលាក់ខ្លួនអស់រយៈពេលជិត៨ឆ្នាំ ទីបំផុតលេចមុខត្រឡប់ចូលស្រុកវិញវិញ ក៏ត្រូវបានសមត្ថកិច្ចចាប់ឃាត់ខ្លួនតាមដីកាតុលាការ កាលពីថ្ងៃទី២៨ ខែមិថុនា ឆ្នាំ២០១៨ នៅចំណុច ភូមិញ សង្កាត់កណ្តោលដុំ ក្រុងច្បារមន។
ជនជាប់ចោទដែលត្រូវសមត្ថកិច្ចចាប់ឃាត់ខ្លួនតាមដីការតុលាការពីបទរំលោភសេពសន្ថវៈ មានឈ្មោះហេង សុភ័ក្រណា ហៅភ័ក្រណា អាយុ២៧ឆ្នាំ មុខរបរលក់ដូរ បច្ចុប្បន្នស្នាក់នៅភូមិឫស្សីជ្រុំ ឃុំគោកព្រីង ស្រុកស្វាយជ្រុំ ខេត្តស្វាយរៀង និងមានស្រុកកំណើតនៅភូមិក្រាំងពលទេព ឃុំរកាធំ ស្រុកច្បារមន។
តាមប្រភពពីសមត្ថកិច្ចព្រហ្មទណ្ឌខេត្តកំពង់ស្ពឺ បានឱ្យដឹងថា ជនជាប់ចោទឈ្មោះហេង សុភ័ក្រណា ត្រូវបានកម្លាំងនគរបាលប្រទះឃើញ នៅត្រង់ចំណុចភូមិញ សង្កាត់កណ្តោលដុំ ក្រុងច្បារមន ខេត្តកំពង់ស្ពឺ រួចក៏ចាប់ខ្លួនតាមដីកាបង្គាប់ឱ្យចាប់ខ្លួនលេខ១៩៧ ចុះថ្ងៃទី០៧ ខែមិថុនា ឆ្នាំ២០១១ របស់លោកអ៊ីវ បូរិន្ទ ចៅក្រមស៊ើបសួរ នៃសាលាដំបូងខេត្តកំពង់ស្ពឺ ពីបទរំលោភសេពសន្ថវៈ។
ប្រភពដដែល បានបញ្ជាក់ប្រាប់ថា កាលពីថ្ងៃទី២៦ ខែមករា ឆ្នាំ២០១០កន្លងទៅ ជនជាប់ចោទឈ្មោះហេង សុភ័ក្រណា ហៅភ័ក្រណា បានធ្វើសកម្មភាពចាប់រំលោភសេពសន្ថវៈលើនារីរងគ្រោះម្នាក់រហូតដល់បានសម្រេច នៅត្រង់ចំណុចរមណីយដ្ឋានអំពែភ្នំ សង្កាត់ស្វាយក្រវ៉ាន់ ក្រុងច្បារមន។ បន្ទាប់ពីប្រព្រឹត្តបទល្មើសរំលោភខាងលើរួច ជនល្មើសបានរត់គេចខ្លួនបាត់រហូតអស់រយៈជិត៨ឆ្នាំ លុះវិលត្រឡប់មកផ្ទះវិញ ទើបត្រូវសមត្ថកិច្ចចាប់ខ្លួនតែម្តង៕