រថយន្តដឹកខ្សាច់ផ្តាច់ជីវិតកូនភ្លោះ ឪយំឱបសពរហូតសន្លប់ខ្លួនឯង

ខេត្តសៀមរាប ៖ ក្មេងស្រី២នាក់ ត្រូវជាបងប្អូនភ្លោះនឹងគ្នា កំពុងជិះកង់ដឹកគ្នាសំដៅទៅសាលារៀន ស្រាប់តែជួបគ្រោះអកុសល ត្រូវរថយន្តដឹកដី១គ្រឿង បើកក្នុងល្បឿនយ៉ាងលឿន រេចង្កូតមកបុកយ៉ាងពេញទំហឹង ព្រមទាំងបានកិនពីលើក្មេងស្រីទាំង២នាក់បងប្អូន បណ្តាលឱ្យ ស្លាប់យ៉ាងអាណោចអាធ័ម។

ហេតុការណ៍គ្រោះថ្នាក់ចរាចរណ៍ដ៏រន្ធត់ខាងលើនេះ បានកើតឡើង កាលពីវេលាម៉ោង៦និង៤៥នាទីព្រឹក ថ្ងៃទី០៣ ខែកក្កដា ឆ្នាំ២០១៨នេះ នៅលើកំណាត់ផ្លូវក្រាលក្រួសក្រហម ផ្លូវក្រវាត់ក្រុងសៀមរាប ត្រង់ចំណុចភូមិត្រៀក សង្កាត់សៀមរាប ក្រុងសៀមរាប។

ក្មេងស្រីរងគ្រោះជាបងប្អូនភ្លោះ ត្រូវរថយន្តកិនស្លាប់ មិនត្រូវបានស្គាល់អត្តសញ្ញាណនោះទេ។ ចំណែកអ្នកបើកបររថយន្តបង្ក ក៏មិនស្គាល់អត្តសញ្ញាណដូចគ្នា ព្រោះក្រោយកើតហេតុបានចុះពីលើរថយន្តរត់គេចខ្លួនបាត់ស្រមោល។

តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញក្មេងស្រីជាកូនភ្លោះទាំង២នាក់ខាងលើ កំពុងជិះកង់ដឹកគ្នា តាមដងផ្លូវ សំដៅទៅសាលារៀន ស្រាប់តែពេលធ្វើដំណើរមកដល់ចំណុចកើតហេតុខាងលើ ក៏លេចរថយន្តដឹកខ្សាច់មួយគ្រឿងម៉ាកហ៊ីណូ ពណ៌ស លាយត្រួយចេក ពាក់ស្លាកលេខ ភ្នំពេញ 3A-0271 បានបើកក្នុងល្បឿនយ៉ាងលឿន រួចក៏រេចង្កូតជ្រុលមកបុកកង់ក្មេងស្រីរងគ្រោះទាំង២នាក់ និងបានកិនពីលើក្មេងស្រីទាំង២ បណ្តាលឱ្យស្លាប់យ៉ាងអាណោចអាធ័ម ក្នុងនោះម្នាក់បែកខ្ទេចក្បាលគ្មានសល់។

ក្រោយពីបើករថយន្តកិនក្មេងស្លាប់២នាក់ហើយ អ្នកបើកបររថយន្តបង្ក បានចុះពីលើរថយន្តរត់គេចខ្លួនបាត់ស្រមោល ដោយបន្សល់ទុករថយន្តនៅនឹងកន្លែងកើតហេតុ។

បន្ទាប់ពីកើតហេតុភ្លាមៗ គេឃើញបុរសជាឪពុករបស់កូនភ្លោះទាំង២ បានមកដល់ទីតាំងកើតហេតុ បីត្រកងសពកូនស្រី ស្រែកទ្រហោយំ គួរឱ្យសង្វេគ រហូតដល់សន្លប់បាត់ស្មារតីទៀតផង ព្រោះតែស្តាយស្រណោះជីវិតកូនស្រីជាទីស្រលាញ់ ដែលមិនគួរណាត្រឹមមួយប៉ព្រិចភ្នែក ត្រូវ មកបាត់បង់ជីវិតកូនស្រីដល់ទៅ២នាក់បែបនេះសោះ៕