ភ្នំពេញ ៖ នារីម្នាក់កំពុងធ្វើដំណើរទៅកន្លែងធ្វើការ ក៏មានស្ត្រីម្នាក់ប្រើល្បិចដើរមកសួរថាមានរើសបានកញ្ចប់មាសទេ មានគេធ្លាក់បាត់ ហើយភ្លាមនោះ ក៏មានស្ត្រីម្នាក់ទៀត ដើរមកប្រាប់ថារើសបាន រួចបបួលទៅរកកន្លែងស្ងាត់ចែកគ្នា ដោយមានបក្ខពួកជាមនុស្សប្រុស២នាក់ទៀត ជិះម៉ូតូដឹកទៅ លុះដោះដូរបានគ្រឿងអលង្ការរបស់នារីរងគ្រោះអស់ហើយ ក៏គេចខ្លួន តែភ្លាមនោះនារីរងគ្រោះស្រាយមាត់ថង់មើលឃើញគ្រាប់សំណ ក៏ស្រែកឆោឡោ ចាប់ក្របួចបុរសសង្ស័យម្នាក់ជាប់ អូសកយកទៅប្រគល់ឱ្យសមត្ថកិច្ចចាត់ការតាមច្បាប់។
ហេតុការណ៍ដ៏ភ្ញាក់ផ្អើលខាងលើនេះ បានកើតឡើង កាលពីវេលាម៉ោង៨ និង៣០នាទីព្រឹក ថ្ងៃទី១៣ ខែកក្កដា ឆ្នាំ២០១៨ នៅតាម បណ្តោយផ្លូវលំ ក្នុងភូមិទ្រុងមាន់ សង្កាត់អូរបែកក្អម ខណ្ឌសែនសុខ។
ជនសង្ស័យដែលត្រូវសមត្ថកិច្ចចាប់ឃាត់ខ្លួន មានឈ្មោះប៊ិ សុខម៉េង អាយុ២៦ឆ្នាំ ស្នាក់នៅផ្ទះជួលតាមផ្លូវរថភ្លើង ភូមិប៉ប៉្រកជើង សង្កាត់កាកាប១ ខណ្ឌពោធិសែនជ័យ និងមានស្រុកកំណើតភូមិព្នៅ ឃុំព្នៅទី១ ស្រុកស៊ីធរកណ្តាល ខេត្តព្រៃវែង។ រីឯបក្ខពួក៣នាក់ទៀត (ប្រុស១ ស្រី២) បានរត់គេចខ្លួនបាត់ស្រមោល។ ចំណែកនារីរងគ្រោះ មានឈ្មោះអ៊ុល លីដា អាយុ២៧ឆ្នាំ ជាកម្មការីនីរោងចក្រ ស្នាក់នៅភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ និងមានស្រុកកំណើត ភូមិព្រៃដើមថ្នឹង ឃុំព្រៃដើមថ្នឹង ស្រុកស៊ីធរកណ្តាល ខេត្តព្រៃវែង។ ដោយឡែកគ្រឿងអលង្ការរបស់នារីរងគ្រោះដែលបាត់បង់ រួមមាន កងដៃ១ឈុតតម្លៃជាង៣០០ដុល្លារ ក្រវិលមាស១គូ ទូរស័ព្ទដៃម៉ាកសាំសុង ១គ្រឿង និងលុយចំនួន១០០ដុល្លារ ព្រមទាំងលុយខ្មែរ២ម៉ឺនរៀល។
តាមសម្តីនារីរងគ្រោះ បានរៀបរាប់ប្រាប់ថា នៅមុនពេលកើតហេតុ កាលពីវេលាម៉ោង៦និង៥០នាទីព្រឹក ថ្ងៃទី១៣ ខែកក្កដា ឆ្នាំ២០១៨ នាងបានធ្វើដំណើរទៅធ្វើការនៅរោងចក្រម្តុំផ្សារទួលពង្រ សង្កាត់ចោមចៅ១ ខណ្ឌពោធិ៍សែនជ័យ លុះដល់ពាក់កណ្តាលផ្លូវ ក៏មានស្ត្រី ម្នាក់ដើរតាមមកសួរនាងថា “មានគេរើសបានកញ្ចប់មាសទេ មានគេជ្រុះបាត់ ក្នុងនោះមានមាស៨តម្លឹង…”។ ភ្លាមៗ នាងមិនទាន់បានហាមាត់តប ទៅវិញផង ស្រាប់តែលេចមុខស្ត្រីម្នាក់ទៀត ធ្វើជាមកប្រាប់ថា “កុំមាត់ ខ្ញុំរើសបាន យើងទុកដូរចែកគ្នា…” ព្រមទាំងបើកកូនថង់ឱ្យនាងមើល ឃើញមានលោហៈពណ៌ក្រហមច្រាល។
នារីរងគ្រោះបន្តថា ខណៈនោះស្ត្រីសង្ស័យទាំង២នាក់ ក៏បបួលនាងជិះម៉ូតូ២គ្រឿង ដែលមានមនុស្សប្រុស២នាក់រង់ចាំជាស្រេច ដើម្បី ទៅរកកន្លែងស្ងាត់ដូរចែកគ្នាកុំឱ្យគេដឹង។ នៅពេលធ្វើដំណើររហូតដល់ផ្លូវលំភូមិទ្រុងមាន់ទើបឈប់ ហើយស្ត្រីសង្ស័យបានលាមាត់ថង់ឱ្យនាងមើល ម្តងទៀត នឹងនិយាយបញ្ចុះបញ្ចូលឱ្យនាងដោះគ្រឿងអលង្ការ ហើយទាមទារប្រាក់ និងយកទូរស័ព្ទពីនាងទាំងអស់ រួចក៏ប្រគល់កញ្ចប់មាសនោះ មកឱ្យនាង បន្ទាប់មក ជនសង្ស័យប្រុសស្រី៣នាក់ ក៏បានឡើងជិះម៉ូតូ១គ្រឿងចេញទៅដោយប្រាប់នាងថា ចាំនៅទីនេះហើយ គេទៅរកកន្លែងដូរ ចែកគ្នា៕