មជ្ឈដ្ឋានមហាជន និងអ្នកសិល្បៈជាច្រើន បានរំជើបរំជួល និងពុះកញ្ជេ្រលយ៉ាងខ្លាំង នៅពេលដែលល្ខោនខោល នឹងត្រូវអង្គការបេតិកភណ្ឌពិភពលោក (UNESCO) ប្រកាសជាផ្លូវការនៅចុងឆ្នាំ២០១៨ ដោយសម្រេចថា ជារបស់ខ្មែរឬសៀម ខណៈដែលមន្ដ្រីពាក់ព័ន្ធបានស្នើដល់មហាជនឲ្យរក្សាភាពស្ងៀមស្ងាត់ ព្រោះយើងមានឯកសារគ្រប់គ្រាន់ដើម្បីបញ្ជាក់ទៅអង្គការយូណេស្កូថា ជារបស់ខ្មែរនោះ អ្នកផលិតកម្មវិធីជាន់ខ្ពស់របស់ទូរទស្សន៍ PNN និង ETV ហាក់ថ្លែងសារបង្កប់ដោយការឈឺចាប់ចំពោះសៀម ដែលចង់បានល្ខោនខោល ពីខ្មែរ ដោយគ្មានការខ្មាសអៀននេះ។
អ្នកផលិតកម្មវិធីជាន់ខ្ពស់តាមទូទស្សន៍ជាច្រើនមកហើយ លោកគួច ខេវិន បានប្រាប់ថា ”ល្ខោនខោល” គឺជាមរតករបស់ដូនតា បុព្វបុរសរបស់យើង ដែលបន្សល់ដល់ខ្លួន ឆ្ងល់ថា កូនខ្មែរប៉ុន្មាននាក់ដែលស្គាល់ល្ខោនខោល, ល្ខោនស្បែកតូច, ស្បែកធំ ,ល្ខោនអាប៉េ…? ខ្មែរច្រើនណាស់បានលាអង្គរហើយ សូម្បីតែឈ្មោះកូន ក៏ពួកគេលែងប្រើឈ្មោះតំណរដូនតាដែរ។ បើខ្មែរ មិនស្ដាយអង្គរ មិនខ្វល់ពីមរតកបុព្វបុរស មិនស្រណោះដូនតាផង តើទៅស្ដាយធ្វើអ្វី បើសិល្បៈខ្លួនឯងមិនស្គាល់នោះ? បើស្ដាយ ត្រូវស្គាល់ ហើយត្រូវចេះថែរក្សា តើនេះជាកំហុសអ្នកណា?
ដោយឡែក ពិធីករអ៊ឹង រដ្ឋា ហៅនាយទុយ ក៏អះអាងថា “ល្ខោនខោល” ជារបស់ខ្មែរ ដោយគ្មានប្រទេសណាអាចដណ្ដើមពីខ្មែរបានឡើយ។
ជុំវិញភាពរំជើបរំជួលខ្លាំងរឿង “ល្ខោនខោល” អាចប្រឈមការបាត់បង់ទៅសៀម នោះ ឯកឧត្តមថៃ នរៈសត្យា រដ្ឋលេខាធិកា និងជាអ្នកនាំពាក្យក្រសួងវប្បធម៌ និងវិចិត្រសិល្បៈ បានប្រាប់អ្នកកាសែតថា កម្ពុជា គ្មានការព្រួយបារម្ភឡើយ ដោយសារកម្ពុជា មានឯកសារមូលដ្ឋានគ្រប់គ្រាន់ ដែលបញ្ជាក់ថា ល្ខោនខោល ជារបស់ខ្មែរ ជាពិសេស កម្ពុជា បានដាក់ពាក្យស្នើសុំទៅអង្គការយូណេស្កូ មុនប្រទេសថៃ ៕
