សោភា ទេពី ក្តៅក្រហាយថៅកែផលិតកម្មម្នាក់ចោទនាង ជា “ក្រពើវង្វេងបឹង”

តារាចម្រៀងសោភា ទេពី ក្តៅចិត្តជាខ្លាំង នៅពេលដែលនាងច្រៀងឱ្យផលិតកម្ម Zone ដោយគ្មានកុងត្រា ហើយគ្មានបានលុយមួយសេននោះ ទីបំផុត ត្រូវបានថៅកែផលិតកម្មនេះ លោកអ៊ុច រ៉ាវុធ បានហៅនាងថា “ក្រពើវង្វេងបឹង” ឬ “ តារាភ្លេចកំណើត” ក្រោយពេលទេពី ល្បីបទ “អ្នកណាកែចិត្តបង?” ដែលមានអ្នក Views រហូតដល់ទៅ២.២M (២.២លាន់នាក់)ហើយបដិសេធច្រៀងឱ្យផលិតកម្មនេះតទៅទៀតនោះ។

ភាពប្រទាញប្រទង់បានកើតឡើងយ៉ាងក្តៅគគុក នៅពេលដែលលោករ៉ាវុធ បានធ្វើបទចម្រៀងនេះជា MV ដោយគ្មានការសម្តែងរបស់ម្ចាស់សំនៀង ទេពី ខណៈដែលទេពី ចង់ទាមទារធ្វើបទចម្រៀងនេះជា MV ផ្ទាល់ខ្លួនដែរ ព្រោះថា បទនេះល្បីខ្លាំង តែភាគីផលិតកម្ម បែរជាថា នាងគ្មានសិទ្ធិទៅវិញ។

ក្នុងជំនួបកាលពីពេលថ្មីៗនេះ សោភា ទេពី អះអាងថា នាងនៅតែចង់ធ្វើបទ “អ្នកណាកែចិត្តបង?” នេះជា MV ដដែល បើទោះជាខាងផលិតកម្មថា នាងគ្មានសិទ្ធិក្តី តែដោយសារបទនេះល្បីមានគេស្គាល់ច្រើន អ៊ីចឹងហើយបានជានាងត្រូវតែចេញ MV ដើម្បីឱ្យគេដឹងថា អ្នកណាជាម្ចាស់បទនេះ។

តារាចម្រៀងដែលពីមុនច្រៀងបទពីដើមៗ តែពេលនេះចូលចិត្តច្រៀងបទចង្វាក់ Rock នោះ ថ្លែងថា “តើគេចោទខ្ញុំថា ជាក្រពើវង្វេងបឹងហ្នឹង បានន័យថាម៉េចទៅ ព្រោះខ្ញុំមិនមែនគេស្គាល់តាមរយៈការបណ្តុះបណ្តាលរបស់គាត់តាំងពីដំបូងឯណា? ខ្ញុំប្រឹងខ្លួនឯងតើ! ខ្ញុំច្រៀងដោយគ្មានកុងត្រា ហើយក៏គ្មានបានលុយកាក់អីដែរ តែបែរជាគេចង់ប្តឹងខ្ញុំវិញ បើខ្ញុំហ៊ានធ្វើជា MV ដោយខ្លួនឯង អ៊ីចឹងតាមចិត្តគាត់ទៅចុះ”។

គួរបញ្ជាក់ថា លោកថៅកែផលិតកម្ម Zone ឈ្មោះអ៊ុច រ៉ាវុធ នោះ មិនមែនមានរឿងតែជាមួយតារាចម្រៀងសោភា ទេពី ម្នាក់ទេ តែតាមតារាមួយចំនួនបានបង្ហើបឱ្យដឹងថា លោកថៅកែនេះក៏ធ្លាប់មានភាពចម្រូងចម្រាសជាមួយតារាផ្សេងៗទៀតផងដែរ។

ដោយឡែក សោភា ទេពី ក្រោយធ្លាក់ចេញពីកម្មវិធី Cambodian Idol រដូវកាលទី៣ ត្រឹមវគ្គ Live Show នោះ នាងមិនទាន់មានគម្រោងចូលផលិតកម្មណាទេ ដោយងាកមកធ្វើបទចម្រៀងដោយខ្លួនឯងចេញតាម Youtube ហើយក្រៅពីល្បីបទ “អ្នកណាកែចិត្តបង?” នោះ ទេពី មានចេញបទដូចជា “បែកអ្នកថ្មី ហេតុអ្វីវិលរកអ្នកចាស់?”, “ទុកអូនចោលយូរម៉្លេះ?”, “ឆ្ងាយ”, “I knew who I am ?”, “សុបិន” “បែកអ្នកថ្មី”៕