តារាចម្រៀងរោមទ្រូងច្រើនរបស់ផលិតកម្មរស្មីហង្សមាស លោកឆន សុវណ្ណរាជ ហាក់មានសន្ទុះងើបឡើងវិញបន្តិច ក្រោយល្បីបទ “អារម្មណ៍ពេលខូចចិត្ត” ដែលបទនេះត្រូវបានគេនិយមច្រៀងតាមបៀរហ្គាឌិនជាច្រើន ក្នុងរាជធានីភ្នំពេញ ជាពិសេស គឺអ្នកចម្រៀងស្រីៗចូលចិត្ត Cover បទនេះ ទៀតផង បើទោះជាបទនេះ ចេញយូរខែហើយក្តី។
ឆន សុវណ្ណរាជ ធ្លាប់អះអាងនៅទូរទស្សន៍អាស៊ីអាគ្នេយ៍ថា រូបគេនឹងមានត្រៀមចេញបទប្រហាក់ប្រហែលបទ “អារម្មណ៍ពេលខូចចិត្ត” នេះ នៅពេលបន្តបន្ទាប់ទៀត ហើយពិតជារីករាយនៅពេលដែលបទចម្រៀងមួយបទនេះ មានគេគាំទ្រច្រើន។
តាមរយៈការបង្ហាញខ្លួននៅកម្មវិធីមង្គលការតារាសម្តែងញ៉ែម សុគន្ធ កាលពីពេលថ្មីៗនេះ ឆន សុវណ្ណរាជ មិនមានបណ្តើរគូស្នេហ៍ទៅដូចតារាផ្សេងៗទៀតឡើយ ហើយអតីតតារាចម្រៀង U2 នេះ ត្រូវបានក្រមុំៗចោមរោមថតរកតែដកខ្លួនសឹងមិនរួចឡើយ ដែលនេះបញ្ជាក់ថា សុវណ្ណរាជ នៅតែខ្លាំង។
ឆន សុវណ្ណារាជ ដែលផ្ទុះខ្លាំងកាលពីឆ្នាំ២០០៧ អំឡុងពេលដែលគេដើរចេញពី U2 ចូលហង្សមាស នោះ ហាក់ស្ងប់ស្ងាត់កាន់តែខ្លាំង នៅពេលដែលខេមរៈ សិរីមន្ត ចូលទៅហង្សមាស។ ប៉ុន្តែតំណែងធំៗនៅទូរទស្សន៍ហង្សមាស ដូចជា The Voice Cambodia និង Cambodian Idol គឺសុវណ្ណរាជ នៅតែក្តាប់ជាប់ដដែល ថ្វីត្បិតតែមានការលើកឡើងមុននេះថា អាចមានការផ្លាស់ប្តូរតំណែងនោះ ដោយផ្ទេរទៅឱ្យខេមរៈ សិរីមន្ត ក៏ដោយ៕
