តារាចម្រៀងផលិតកម្មរស្មីហង្សមាស សុខ សីឡាលីន អាចនឹងទប់ទឹកនេត្រាមិនជាប់ឡើយ ព្រោះតែសង្សារចាស់របស់នាង លោកអ៊ុក មិន្ទណារិទ្ធ ដែលជាតន្រ្ដីករល្បីឈ្មោះក្នុងក្រុមចចកសមុទ្រនោះ បានក្រាបផ្ទឹមជាមួយនារីម្នាក់ ឈ្មោះលឹមហួ កាលពីថ្ងៃទី១៣ ខែធ្នូ ឆ្នាំ២០១៨ ដោយមានតារាសិល្បៈល្បីជាច្រើនកុះករបានចូលរួមអបអរសាទនៅកម្មវិធីជប់លៀងធំមជ្ឈមណ្ឌលកោះពេជ្រ។
ការសម្រេចចិត្តរកប្រពន្ធថ្មីរបស់លោកមិន្ទណារិទ្ធ នៅពេលនេះ ក្រោយពីចំណងស្នេហារវាងលោកនិងសីឡាលីន បានដើរដល់ទីបញ្ចប់តាំងពីឆ្នាំមុន ក្រោយពីមិនអាចផ្សះផ្សាស្នេហានេះបាន ដោយមានដំណឹងថា ម្ដាយរបស់ឡាលីន មិនពេញចិត្តលោកណារិទ្ធ ឡើយ ទើបធ្វើឲ្យចំណងស្នេហាតន្រ្ដីករលេងខ្លួនទុកសក់វែងប្រាស្មាប៉ះជាមួយអ្នកចម្រៀងលេងស្ទីលដូចប្រុស សីឡាលីន បានដើរដល់ទីបញ្ចប់។
គួរបញ្ជាក់ថា សុខ សីឡាលីន ជាអតីតតារាចម្រៀងផលិតកម្ម Blue Diamond និងM បានសាងស្នេហ៍ជាមួយតន្រ្ដីករ អ៊ុក មិន្ទណារិទ្ធ ជាច្រើនឆ្នាំ ដែលនៅក្នុងសិល្បៈ អ្នកណាក៏ដឹងថា ពួកគេគឺជាសង្សារគ្នាដែរ។ មានពេលខ្លះ សីឡាលីន បានឱបថើបគ្នានៅចំពោះមុខតារាសិល្បករទាំងឡាយទៀតផង ខណៈដែលពេលសីឡាលីន ចេញទៅសម្ដែងនៅក្រៅប្រទេស លោកណារិទ្ធ ក៏ធ្លាប់ជូនដំណើរតារាចម្រៀងរូបនេះ ហើយពួកគេឱបគ្នានៅព្រលានយន្ដហោះ ដោយមិនខ្វល់ពីអ្នកដំណើរជុំវិញខ្លួន ឬអ្នកកាសែតប្រមាញ់រូបឡើយ។ ប៉ុន្ដែពេលនេះ ស្នេហាពួកគេនៅសល់តែស្រមោលប៉ុណ្ណោះ ខណៈដែលលោកណារិទ្ធ សម្រេចចិត្តរៀបការប្រពន្ធថ្មី មុនសីឡាលីន រៀបការប្ដីថ្មី។
សុខ សីឡាលីន បានចេញពីផលិតកម្ម M ទៅជ្រកកោននៅទ្រនំធំហង្សមាស ដែលប្រជុំទៅដោយតារាជើងខ្លាំងៗ ទើបពេលនេះធ្វើឲ្យនាងបានត្រឹមនៅស្ងៀមទ្រឹង មិនអាចវាយលុកទីផ្សារចម្រៀងបានឡើយ ព្រោះថា ឱក សុគន្ធកញ្ញា , ពេជ្រ សោភា និងសួស វីសា មានប្រៀបជាង។
ទោះជាយ៉ាងណា សីឡាលីន បានតុបតែងខ្លួនកាន់តែប្លែក តាមរយៈការកែច្រមុះ និងលេងក្បាច់រាំយ៉ាងសាហាវ ទើបធ្វើឲ្យហង្សមាស បានរុញឲ្យនាងទៅច្រៀងកម្មវិធី Concert មួយចំនួនដែរ ជាមួយតម្លៃខ្លួនមធ្យម បើប្រៀបធៀបជាមួយតារាខ្លាំងផ្សេងៗទៀត។
អ្នកសិល្បៈដែលស្និទ្ធជាមួយសុខ សីឡាលីន បានបង្ហើបឲ្យដឹងថា ក្រោយផ្ដាច់ស្នេហ៍លោកអ៊ុក មិន្ទណារិទ្ធ មក ពេលនេះ សីឡាលីន បានភ្ជាប់ស្នេហាជាមួយពិធីកររូបសង្ហាររបស់ PNN គឺលោកជីមមី ដែលទំនាក់ទំនងរបស់ពួកគេមិនត្រូវបានម្ដាយឡាលីន ប្រឆាំងដូចកាលនាងស្នេហ៍លោកណារិទ្ធ ឡើយ។ ប៉ុន្ដែតារាចម្រៀងផលិតកម្មរស្មីហង្សមាស សីឡាលីន និងលោកជីមមី មិនដែលហ៊ានចេញមុខលាតត្រដាងរឿងស្នេហានេះឡើយ ខណៈដែលតារាមួយចំនួន បានលើកឡើងថា ឡាលីន ពូកែរកសង្សារថ្មីបានសង្ហាជាងអ្នកចាស់ទៀត។
សុខ សីឡាលីន ជាអ្នកចម្រៀងដែលមានសំឡេងខ្លាំង និងអាចច្រៀងភាសាអង់គ្លេស បានយ៉ាងល្អ។ ប៉ុន្ដែអ្នកចម្រៀងរូបនេះ មិនអាចឡើងខ្លាំង ស្ថិតក្នុងចំណោមតារាចម្រៀងល្បីៗជួរមុខនោះបានទេ ព្រោះមជ្ឈដ្ឋានជាច្រើនបានឡើងថា សីឡាលីន ហាក់វ៉ៃឬក កាច់រាងខ្លាំងពេក ពេលខ្លះសូម្បីតែអ្នកកាសែតថតរូប ក៏គ្រវីក្បាលដែរ។
យ៉ាងណា គេជឿថា ក្រោយពេលត្រូវសង្សារចាស់រៀបការប្រពន្ធថ្មីចោលនេះ សីឡាលីន ក៏នឹងត្រៀមដឹកដៃសង្សារថ្មី ក្រាបផ្ទឹមក្នុងពេលឆាប់ដែរជាមិនខានឡើយ៕
