សុខ ពិសី ដែលជាតារាស្រីឈានមុខគេរបស់ផលិតកម្មសាន់ដេ នោះ ធ្លាប់លេចឮរឿងដ៏រសើបថា នាងមិនសូវត្រូវគ្នាជាមួយតារាចម្រៀងសិស្សប្អូនរួមទ្រនំ កញ្ញាឃីន ស្រីនាថ ហៅអ៊ីវ៉ា ឡើយ ទើបធ្វើឲ្យមានដំណឹងថា អ៊ីវ៉ា ចង់ចាកចេញពីសាន់ដេ ជាច្រើនលើកច្រើនសារ
ទោះជាយ៉ាងណា ក្នុងឱកាសខួបកំណើតរបស់សុខ ពិសី គម្រប់អាយុ២៨ឆ្នាំ កាលពីថ្ងៃទី១៩ ខែធ្នូ អ៊ីវ៉ា បានជូនពរសុខ ពិសី ខណៈដែលពិសី ក៏រីករាយចំពោះអ៊ីវ៉ា វិញផងដែរ ទើបធ្វើឲ្យរឿងដែលគេសង្ស័យថា អ្នកទាំង២ មិនសូវត្រូវគ្នានោះបានកាត់បន្ថយវិញបានខ្លះហើយ។
អ្វីដែលធ្វើឲ្យមហាជនកាន់តែជឿជាក់ថា តារាស្រីសំខាន់ទាំង២ដួងរបស់សាន់ដេ សុខ ពិសី និងអ៊ីវ៉ា គ្មានទំនាស់ជាមួយគ្នាដូចពាក្យចចាមអារ៉ាមនោះ ពេលនេះ អ៊ីវ៉ា ដែលលេចឮថា នឹងស្ពាយបង្វេចចេញពីសាន់ដេ ចូលទៅជ្រកកោននៅទ្រនំថោន ឬហង្សមាស ទៅហើយនោះ ស្រាប់តែការសម្រេចចិត្តចុងក្រោយ ម្ចាស់បទ ”ទឹកអប់មានពិស” នេះ សម្រេចចិត្តជ្រកកោននៅទ្រនំសាន់ដេ ជាបណ្ដោះអាសន្នសិនទើបធ្វើឲ្យទស្សនិកជនយល់ថា បើតារាទាំង២កាច់កុងគ្នាមែន ម្ល៉េះអ៊ីវ៉ា មិននៅច្រៀងសាន់ដេ ទៀតឡើយ។
អ៊ីវ៉ា ថ្លែងថា អបអរថ្ងៃខួបកំណើតរបស់សុខ ពិសី ថា ”រីករាយថ្ងៃខួបកណើតបងស្រីសុខ ពិសី”។ ចំណែកសុខ ពិសី វិញតបថា”ស្រលាញ់ប្អូនស្រីអ៊ីវ៉ា“។
នេះមិនមែនជាលើកទី១ឡើយ ដែលសុខ ពិសី និងអ៊ីវ៉ា ព្យាយាមបង្ហាញឲ្យគេឃើញពីភាពស្និទ្ធស្នាលរបស់នាង ជាមួយអ៊ីវ៉ា ដើម្បីបញ្ជាក់ថានាងគ្មានរឿងជាមួយសិស្សប្អូនដូចពាក្យចចាមអារ៉ាមឡើយ។ កាលពីឆ្នាំមុន សុខ ពិសី ក៏បានទៅឡើងផ្ទះថ្មីតារាចម្រៀងអ៊ីវ៉ា នៅខេត្តកំពង់ស្ពឺ ផងដែរ ហើយនៅពេលអ្នកយកព័ត៌មានយើងសួរទៅលោកអ៊ូ វ៉ាវ ដែលជាឪពុកតារាចម្រៀងអ៊ីវ៉ា នោះ លោកវ៉ាវ ហៅចន្ថា ថ្លែងថា ពិសី ពិតជាបានទៅចូលរួមពិធីឡើងផ្ទះរបស់លោក ដោយរីករាយមែន ហើយបើសិនជាពួកគេទាំង២ មានរឿងជាមួយគ្នាមែន ពិសី មិនទៅឡើងផ្ទះលោកដល់ខេត្តនោះទេ។
សុខ ពិសី ត្រូវបាន Fan ជាច្រើនទៅដល់ផ្ទះរបស់នាង ម្ដុំបូកគោ ដើម្បីអបអរខួបកំណើតរបស់នាង គម្រប់អាយុ២៨ឆ្នាំ ក្នុងនោះ អ្នកតំណាងក្រុមហ៊ុន VIVO និងផលិតផល Fair lovely ក៏បានយកនំខេកទៅជូនពរពិសី ព្រមគ្នាផងដែរ ទើបធ្វើឲ្យតារាដែលមានរូបសម្រស់ស៊ីដាច់គេនៅសាន់ដេ នេះ រីករាយក្រៃលែង។
ដោយឡែក សម្រាប់អ្នកគាំទ្រដែលធ្លាប់តែតាមសុខ ពិសី ដល់ឆាកតន្ដ្រីនោះ ពួកគេបានទៅឱបថើបពិសី ដល់ផ្ទះ ដើម្បីបញ្ជាក់ការស្រលាញ់ចំពោះតារាចម្រៀង idol របស់ពួកគេ ហើយពិសី គ្មានពាក្យអ្វីក្រៅពីសន្យាថា នឹងធ្វើការងារសិល្បៈឲ្យបានល្អជាងនេះឡើយ។
ទោះជាសុខ ពិសី បានទទួលការគាំទ្រយ៉ាងច្រើនពីអ្នកគាំទ្ររបស់ខ្លួនក៏ដោយ តែពិសី នៅមិនទាន់បានទទួលកាដូពិសេសពីលោកឡាយ សុខចំរើន ថៅកែក្មេងសាន់ដេ នោះទេ គឺគ្រាន់តែអ្នកតំណាងផលិតកម្មនេះធ្វើនំខេកមានឡូហ្គោសាន់ដេ លើកជូននាងជាការលើកទឹកចិត្តប៉ុណ្ណោះ។
គេជឿជាក់ថា សុខ ពិសី ប្រាកដាជាបានកាដូពិសេសពីលោកឡាយ សុខចំរើន ជាមិនខាន ព្រោះតែកន្លងមក ពួកគេធ្លាប់លេចឮថា ជាគូសង្សារគ្នា តែទាំងពិសី និងលោកចំរើន ហៅសេង មិនទាន់មានភាពក្លាហានហ៊ានសារភាពស្នេហ៍ដូចឱក សុគន្ធកញ្ញា និងលោកអ៊ឹង សុខលី ឡើយ៕