ខេត្តកំពង់ធំ៖ ករណីអំពើហិង្សានេះបានកើតឡើងកាលពីវេលាម៉ោង២រសៀល ថ្ងៃទី២៥ ខែធ្នូ ឆ្នាំ២០១៨ នៅចំណុចហាងបោកអ៊ុតសម្លៀកបំពាក់មួយកន្លែង ស្ថិតក្នុងភូមិទួលសង្កែ ឃុំកំពង់ថ្ម ស្រុកកំពង់ថ្ម។
ជនបង្កហេតុ ដែលបង្កការអុកឡុកពេញហាងបោកអ៊ុតរហូតត្រូវសមត្ថកិច្ចចុះឃាត់ខ្លួន មានឈ្មោះអ៊ែល សាវី អាយុជាង២០ឆ្នាំ មានលំនៅភូមិស្រែរស្រម៉ ឃុំទីពោធិ៍ ស្រុកសន្ទុក។ ចំណែកនារីរងគ្រោះ មានឈ្មោះហុក ឡៃហ៊ីម ជាម្ចាស់ហាងបោកអ៊ុតខាងលើ (របួសចង្កេះ ចំស្នាមដេរចាស់)។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញជនបង្កហេតុខាងលើ បានយកខោអាវរបស់ខ្លួនទៅបោកអ៊ុតនៅក្នុងហាងខាងលើ លុះទៅដល់បានមួយសន្ទុះ មិនដឹងជាមានបញ្ហាអ្វី ក៏ស្រាប់តែធ្វើឱ្យជនបង្កខឹងច្រឡោតយ៉ាងខ្លាំង រហូតឈានដល់ការផ្ទុះជម្លោះតឹងសរសៃកដាក់គ្នា បន្ទាប់មក ភាគីជនបង្កបានធ្វើសកម្មភាពទាត់កន្ត្រកសម្រាប់ដាក់ខោអាវនៅក្នុងហាងបោកអ៊ុតខាងលើ បណ្តាលឱ្យបែកបាក់ និងធ្វើឱ្យខ្ទាតទៅចំចង្កេះរបស់នារីជាម្ចាស់ហាង បណ្តាលឱ្យរងរបួសស្រាលថែមទៀត៕
