ខេត្តកំពង់ស្ពឺ ៖ ករណីក្រមុំដើរខ្វារក្តាម ប្រកាច់ធ្លាក់ទឹកប្រឡាយលង់ស្លាប់នេះ បានកើតឡើង កាលពីវេលាម៉ោង១០និង៣០នាទីព្រឹក ថ្ងៃទី២៦ ខែធ្នូ ឆ្នាំ២០១៨ នៅចំណុចប្រឡាយទឹកក្នុងស្រែក្បែរភ្លឺ ស្ថិតក្នុងភូមិបាំងណា ឃុំជង្រុក ស្រុកគងពិសី។
តាមប្រភពពីសាច់ញាតិនារីរងគ្រោះ បានឱ្យដឹងថា នារីរងគ្រោះខាងលើ មានជំងឺប្រចាំកាយឆ្កួតជ្រូក តែងតែប្រកាច់ជាញឹកញាប់ណាស់ ហើយសាច់ញាតិតែងតែព្រួយបារម្ភ។ នៅមុនពេលកើតហេតុ នារីរងគ្រោះបានលីចបកាប់មួយ ដើរចេញបាត់ពីផ្ទះ បំណងទៅបាចត្រី និងជីកក្តាម លុះក្រោយពីបាត់យូរពេក មិនឃើញត្រឡប់មកផ្ទះវិញ ក្រុមគ្រួសារក៏ដើរតាមទៅរក ស្រាប់តែប្រទះឃើញនារីរងគ្រោះលង់ទឹកប្រឡាយស្លាប់បាត់ទៅហើយ ទើបធ្វើឱ្យកើតមានការផ្អើលឆោឡោ រាយការណ៍ប្រាប់សមត្ថកិច្ច ចុះមកពិនិត្យតែម្តង។
ក្រោយកើតហេតុ សមត្ថកិច្ចជំនាញបានចុះទៅដល់កន្លែងកើតហេតុ ដើម្បីពិនិត្យ និងធ្វើកោសល្យវិច័យសព រួចបញ្ជាក់ថា នារីរងគ្រោះពិតជាលង់ទឹកស្លាប់ប្រាកដមែន ដោយមូលហេតុ នារីរងគ្រោះខាងមានជំងឺឆ្កួតជ្រូកប្រចាំកាយ ហើយបានទៅបាចត្រី និងខ្វារក្តាម នៅមាត់ ប្រឡាយ ក៏ត្រូវអាការជំងឺរើឡើង បណ្តាលឱ្យប្រកាច់ដួលផ្កាប់មុខទៅក្នុងទឹក ឈ្លក់ស្លាប់តែម្តង៕