គង់ សុជាតិ ដែលត្រូវបានគេចាត់ទុកថា ជាសេដ្ឋិនីម្នាក់ ក្នុងតារាសិល្បករខ្មែរនោះ កាន់តែត្រូវប៉ាន់ថែមទៀត នៅពេលដែលអ្នកនាងទៅធ្វើការនៅក្រុមហ៊ុនហង្សមាស ជាមួយស្វាមី ជា វិបុល ព្រោះនៅតាមបណ្ដាកម្មវិធីក្រុមហ៊ុនធំៗ ពេលនេះភាគច្រើនគេត្រូវការពិធីការិនី គឺយកប្ដីប្រពន្ធ១គូតែម្ដង ហេតុនេះហើយបានជានៅតាមមង្គលការកូនអ្នកធំៗ គេឃើញអ្នកនាងសុជាតិ ចាប់ដៃជាមួយលោកវិបុល ច្រើនជាងពិធីករប្រុសផ្សេងៗទៀត។
អ្នកសិល្បៈរួមអាជីពបានឲ្យដឹងថា ពេលនេះ សុជាតិ គ្រប់ទឹកហើយ ធ្វើការទាំងប្ដីប្រពន្ធ អ៊ីចឹងលុយខាប់តែម្ដង។
គង់ សុជាតិ មិនបានប្រឆាំងនូវការលើកឡើងថា អ្នកនាងសម្រុកកើបលុយទាំងប្ដីទាំងប្រពន្ធនោះឡើយ ដោយអ្នកនាងតែងតែនិយាយថា អរគុណដល់ម្ចាស់កម្មវិធីទាំងឡាយ ដែលតែងតែអញ្ជើញអ្នកនាងនិងស្វាមី ឲ្យធ្វើជាពិធីករពិធីការិនីជាញឹកញាប់ ហើយនោះជាការផ្ដល់កិត្តិយសដល់ក្រុមគ្រួសារអ្នកនាងតាមរយៈការផ្ដល់ទំនុកចិត្ត។
ទោះជាយ៉ាងណា អ្នកនាងគង់ សុជាតិ មិនបានបង្ហាញទិន្នន័យចំពោះប្រាក់ចំណូលក្នុង១ឆ្នាំ ពីសិល្បៈប៉ុន្មានឡើយ ដោយអ្នកនាងអះអាងថា នឹងបន្ដអាជីពមួយនេះ រហូតដល់មហាជនលែងគាំទ្រ ទើបឈប់សម្រាក។
អ្នកមេម៉ាយកូន២ គង់ សុជាតិ បានដឹកដៃលោកជា វិបុល រៀបការកាលពីថ្ងៃទី៩ ខែវិច្ឆិកា ឆ្នាំ២០១៣ ហើយពេលនេះទទួលបានចំណងដៃកូនស្រីម្នាក់យ៉ាងស្រស់ស្អាត ឈ្មោះជា សុជាតិនារី ហៅដូរី អាយុជិត២ឆ្នាំ។ បើទោះជាគូស្នេហ៍តារាល្បី១គូនេះ តែងតែបង្ហាញភាពផ្អែមល្ហែមស្ទើរគ្រប់ពេលក្ដី តែតាមព័ត៌មានថា លោកវិបុល ខកចិត្ដដោយសារសុជាតិ មិនព្រមពពោះកូនភ្លោះ ឲ្យតាមការទាមទារចង់បានកូនប្រុសម្ដង២នាក់ របស់លោកឡើយ ដោយសម្អាងថា ពពោះកូនម្ដង ត្រូវឈប់ពីសិល្បៈយូរខែ ខាតលុយធំ។
ប៉ុន្ដែប្រភពដែលស្និទ្ធអ្នកនាងសុជាតិ បានឲ្យដឹងថា ពិធីការិនីជើងចាស់ដែលមានទឹកប្រាក់វាល់លានដុល្លារនេះ នឹងយកកូនភ្លោះ តាមការរំអុករបស់លោកវិបុល នៅពេលដែលកូនស្រីបានធំធាត់ជាងនេះបន្ដិច ព្រោះពេលនេះ សុជាតិ កំពុងសប្បាយចិត្តរកលុយដែលត្រូវប៉ាន់ខ្លាំង ហើយតាំងពីអ្នកនាងចូលទៅហង្សមាស ដំណឹងដែលថា អ្នកនាងកែវ ចាន់និមល មានស្នេហាជាមួយស្វាមីរបស់អ្នកនាង លោកជា វិបុល ត្រូវបានស្ងប់ស្ងាត់ ទោះជាអ្នកនាងនិមល បានលុបចោលការធ្វើសន្និសីទកាសែតលើរឿងដ៏រសើបនេះក្ដី៕
