ភ្នំពេញ៖ គូដណ្តឹងមួយគូ ខណៈដែលស្អែកត្រូវចូលរោងភ្ជាប់ពាក្យហើយនោះ បានជួបគ្រោះថ្នាក់ចរាចរណ៍ត្រូវរថយន្តបុក បណ្តាលឲ្យរងរបួស ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១២ និង១០នាទីរំលងអធ្រាត្រ ឈានចូលថ្ងៃទី០៧ ខែមករា ឆ្នាំ២០១៩ នៅតាមបណ្តោយផ្លូវម៉ៅសេទុង កែងនឹងផ្លូវ១៩៣ ស្ថិតនៅសង្កាត់ទំនប់ទឹក ខណ្ឌចំការមន។
គូស្នេហ៍ដែលត្រូវរថយន្តបុករងរបួសធ្ងន់ទាំង២នាក់ខាងលើ មិនត្រូវបានស្គាល់អត្តសញ្ញាណនៅឡើយ គ្រាន់តែពិនិត្យតាមភិនភាគ មានវ័យជាង២០ឆ្នាំដូចគ្នា និងជិះម៉ូតូ១គ្រឿងម៉ាក ហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០១៧ ពាក់ស្លាកលេខកណ្តាល 1W-9526 ។ ចំណែករថយន្តបង្ក ម៉ាកតូយ៉ូតាព្រូស ពណ៌ស ពាក់ស្លាកលេខភ្នំពេញ 2AX-0719 បើកបរដោយនារីវ័យក្មេងម្នាក់ មិនស្គាល់អត្តសញ្ញាណ។
ក្រោយកើតហេតុ ជនរងគ្រោះទាំង២នាក់ ដែលទទួលរងរបួសធ្ងន់ ត្រូវបានដឹកបញ្ជូនទៅកាន់មន្ទីរពេទ្យ ដើម្បីសង្គ្រោះ និងមិនដឹងថា អាចចួលរួមពិធីភ្ជាប់ពាក្យនៅព្រឹកថ្ងៃស្អែកបាន ឬក៏ត្រូវផ្អាកសិននោះទេ។
ចំណែករថយន្ត និងម៉ូតូ បន្ទាប់ពីសមត្ថកិច្ចជំនាញធ្វើការវាស់វែងរួចរាល់ ក៏អូសយកទៅរក្សាទុកនៅអធិការដ្ឋាននគរបាលខណ្ឌចំការមន ដើម្បីរង់ចាំធ្វើការដោះស្រាយតាមនីតិវិធីនៅពេលក្រោយ៕
