តារាសម្ដែងចាន់ស៊ី ស៊ីណាវ៉ាត់ត្រា បានចាប់ដៃជាមួយស្រីស្អាតខ្លឹម ស្រីគា ដែលជា Miss Grand Cambodia 2017 លេងឈុតស្នេហារោលរាលឱបថើបគ្នាលើគ្រែ ធ្វើឲ្យស្រីគាព្រឺរោមខ្ញាកៗ ដោយសារស្នាដៃប្រុសក្មេងនេះ។ យ៉ាងណា ទោះជាលោកណាវ៉ាត់ត្រា ឱបពោបពីលើខ្លឹម ស្រីគា តាមចិត្តក៏ដោយ តែអ្នកសម្ដែងមកពីខេត្តបាត់ដំបង រូបនេះ នៅតែអះអាងថា មិនបានកេងយកចំណេញលើរាងកាយារបស់តារាបង្ហាញម៉ូដ ស្រីគា ឡើយ។
លោកស៊ីណាវ៉ាត់ត្រា ថ្លែងថា ពិតជាមានអារម្មណ៍រីករាយដែលបានចាប់ដៃគូសម្ដែងជាលើកដំបូងជាមួយកញ្ញាខ្លឹម ស្រីគា ដែលជាអ្នកបង្ហាញម៉ូដ និងសម្ដែងល្បីឈ្មោះម្នាក់។ ចំពោះឈុតដែលលោកឱបថើបស្រីគា រហូតរមូលជើងគ្នានៅលើគ្រែនោះ គ្រាន់តែធ្វើទៅតាមអ្នកដឹកនាំសម្ដែងប៉ុណ្ណោះ លោកមិនមានចេតនាចង់កេងចំណេញលើសាច់ម៉ដ្ឋខៃរបស់ស្រីគា ឡើយ។
ក្រៅពីឱបរឹតខ្លឹម ស្រីគា មួយអស់ដៃនោះ លោកណាវ៉ាត់ត្រា ក៏មានជំនឿចិត្តយ៉ាងមុតមាំដែរថា បទចម្រៀង ”អូនដឹង” របស់តារាចម្រៀងធារ៉ានី ដែលគ្រាន់តែចេញជា Audio នៅលើ Youtube មានអ្នក Views ជាង៤លាននាក់នោះ ពេលដែលថតជា MV នេះ កាន់តែធ្វើឲ្យមហាជនចាប់អារម្មណ៍ថែមទៀតជាមិនខានឡើយ ព្រោះថា បទនេះពិរោះ អត្ថន័យល្អ។
តារាសម្ដែងដែលមានប្រវត្តិកម្សត់ធ្លាប់ទួលនំកងលក់ និងកំព្រាឪពុក តាំងពីនៅផ្ទៃម្ដាយរូបនេះ បន្ថែមថា សាច់រឿងក្នុងបទនេះល្អ អ្នកដឹកនាំក៏មានបទពិសោធខ្ពស់ ហេតុនេះហើយ លោកជឿថា ពេលចេញជា Full MV នឹងធ្វើឲ្យគេទស្សនាច្រើនជាមិនខាន។
ប៉ុន្ដែនៅពេលដែលត្រូវសួរថា តើលោកណាវ៉ាត់ត្រា មានចង់លេងឈុតរោលរាលជាមួយខ្លឹម ស្រីគា នៅក្រៅឆាកដែរឬអត់នោះ៕
អ្នកសម្ដែងរូបនេះប្រកែកញ៉ាញ ដោយថា រូបគេចាត់ទុកស្រីគា ជារៀមច្បង ដែលមានទេពកោសល្យល្អម្នាក់ ហើយការលេងឈុតស្នេហាក្ដៅសាច់នោះ មានតែក្នុង MV ប៉ុណ្ណោះ នៅខាងក្រៅ រាប់អានគ្នាជាមិត្តរួមអាជីពប៉ុណ្ណោះ៕
