ខេត្តកណ្តាល ៖ កាលពីវេលាម៉ោង១១ និង៣០នាទីយប់ ថ្ងៃទី០៩ ខែមករា ឆ្នាំ២០១៩ បុរសម្នាក់ បានប្រើល្បិចដឹកប្រពន្ធ និងក្មួយស្រីក្រមុំ ចេញទៅរកញ៉ាំបង្អែម លុះដល់កន្លែងស្ងាត់ ក៏ឈប់ម៉ូតូ រួចដេញ ប្រពន្ធឱ្យដើរចេញឆ្ងាយ បន្ទាប់មកក៏ធ្វើសកម្មភាពចាប់អូសដៃក្មួយស្រី ចូលគុម្ពោតព្រៃរំលោភសេពសន្ថវៈរហូតដល់បានសម្រេច លុះនារីរងគ្រោះ ទម្លាយរឿងរ៉ាវប្រាប់ម្តាយ ដាក់ពាក្យបណ្តឹងឱ្យសមត្ថកិច្ចចាប់ខ្លួនជនល្មោភកាមនាំយកមកចាត់ការតាមច្បាប់ នៅចំណុចភូមិលេខ២ ឃុំស្វាយរលំ ស្រុកស្អាង។
នារីរងគ្រោះមានឈ្មោះប.ណ.រ អាយុ១៧ឆ្នាំ (មានស្នាមកូត ចំនួន៣កន្លែង ដើមដៃ និងកំពួនដៃឆ្វេង) មានលំនៅក្នុងភូមិឃុំកើតហេតុខាងលើ។ ចំណែកជនសង្ស័យល្មោភកាម មានឈ្មោះប៉ុក អាមីឡា អាយុ៣៨ឆ្នាំ មុខរបរមិនពិតប្រាកដ មានលំនៅក្នុងភូមិសំបួរ ឃុំសំរោង ស្រុកឯកភ្នំ ខេត្តបាត់ដំបង។
នៅចំពោះមុខសមត្ថកិច្ច ជនសង្ស័យ ឈ្មោះប៉ូក អាមីឡា បានព្យាយាមឆ្លើយដោះសារថា ខ្លួនមិនបានប្រព្រឹត្តដូចការរៀបរាប់របស់នារីរងគ្រោះនោះទេ។
យ៉ាងណាក្តី យោងតាមសាក្សី ភស្តុតាង ព្រមតាំងស្លាកស្នាមជាប់ខ្លួននារីរងគ្រោះ គឺជនសង្ស័យពិតជាបានប្រព្រឹត្តពិតប្រាកដមែន។
ករណីខាងលើនេះ សមត្ថកិច្ចជំនាញកំពុងរៀបចំកសាងសំណុំរឿង បញ្ជូនខ្លួនជនសង្ស័យទៅកាន់សាលាដំបូងខេត្ត ដើម្បីចាត់ការបន្តតាមនីតិវិធី៕
