រូបថតមួយប៉ុស្តិ៍ដែលតារាសម្តែងពៅ លីដា, ឌុច លីដា, ឌួង ហ្សូរីម៉ា ជាដើម បានយកផ្កាមួយបាច់ទៅអបអរសាទរលោកទិត ថាវរិទ្ធ ដែលត្រូវព្រះករុណា ព្រះបាទសម្តេច ព្រះបរមនាថ នរោត្តម សីហមុនី ត្រាស់បង្គាប់តែងតាំងជាអនុរដ្ឋលេខាធិការក្រសួងវប្បធម៌ និងវិចិត្រសិល្បៈ កាលពីថ្ងៃទី១២ ខែមករា ឆ្នាំ២០១៩ ដែលក្រុមតារាប្រុសស្រីបានថតជុំគ្នានៅផ្ទះវីឡាដ៍ស្កឹមស្កៃរបស់លោកជាមួយនៅ សុនិតា ឯបុរីប៉េង ហួត (បឹងស្នោរ) ស្ថិតក្នុងគម្រោងទី៨នោះ ពិតជាធ្វើឱ្យសុនិតា ដែលប្រឹងប្រកែករឿងស្នេហាជាមួយលោកទិត ថាវរិទ្ធ ជាច្រើនលើកច្រើនសារជាមួយអ្នកកាសែតនោះ ពិតជាមិនអាចប្រកែកតទៅទៀតបានឡើយ។
ការគាំងចម្លើយរបស់នៅ សុនិតា នៅពេលនេះ ព្រោះនៅខាងក្រោយនៃការទទួលបាច់ផ្កា ពួកគេបានថតជាប់រូបថតតាំង២ផ្ទាំងធំរបស់នៅ សុនិតា ជាមួយលោកទិត ថាវរិទ្ធ ដែលត្រូវបានគេវាយតម្លៃថា ពួកគេតាំងរូបដូចប្តីប្រពន្ធទើបរៀបការ ឬអាចនិយាយបានថា ជាគ្រួសារតែមួយ ទើបមានការដាក់តាំងបែបនេះទៅរួច។
តាមរយៈរូបភាពនោះដែរ ក៏បញ្ជាក់ថា នៅ សុនិតា និងលោកទិត ថាវរិទ្ធ ដែលបាន មកទទួលបាច់ផ្កាពីតារារួមអាជីពនោះ គឺសុនិតា និងលោកទិត ថាវរិទ្ធ ជាម្ចាស់ផ្ទះវីឡាស្កឹមស្កៃ តម្លៃជាង៣០ម៉ឺនដុល្លារនោះតែម្តង។
សំណួរដែលមហាជនលើកឡើងនៅពេលនេះ គឺផ្តោតតែម៉្យាងគត់ថា “តើនៅ សុនិតា ប្រកែកដល់ណាទៀតទៅ ?”។
តាមព័ត៌មានបានឱ្យដឹងថា អំឡុងពេលដែលលោកទិត ថាវរិទ្ធ រួមរស់ជាមួយស៊ឹម សូលិកា នោះ អតីតនាយករងទូរទស្សន៍បាយ័ន រូបនេះ ក៏បានដាក់ពង្រីកតាំងរូបថតសូលិកា នៅទន្ទឹមផ្ទះរបស់លោក ដូចការដាក់តាំងរូបសុនិតា នៅពេលនេះដែរ។ ប៉ុន្តែពេលចំណងស្នេហាលោកថាវរិទ្ធ និងសូលិកា បានដើរដល់ទីបញ្ចប់នោះ រូបថតទាំងឡាយរបស់សូលិកា ត្រូវបានរុះរើចេញអស់ និងដាក់ជំនួសដោយរូបស្រីក្មេង នៅ សុនិតា វិញភ្លាមៗតែម្តង។
ប្រភពបានឱ្យឹងថា ពេលនេះ លោកទិត ថាវរិទ្ធ បានលេងមួយក្បាច់ តាមរយៈការទិញវីឡាទ្រនំស្នេហ៍ជាមួយនៅ សុនិតា ដោយរស់នៅក្បែរវីឡាទ្រនំស្នេហ៍របស់ស៊ឹម សូលិកា និងអេង រិទ្ធី ដែរ ទើបធ្វើឱ្យទាំងមជ្ឈដ្ឋានមហាជន និងអ្នកសិល្បៈជាច្រើន បានលើកឡើងថា គូស្នេហ៍២គូនេះ មានការកាច់កុងគ្នាកាន់តែខ្លាំងទៅៗ បើទោះជាពេលនេះ ពួកគេមានគូថ្មីរៀងៗខ្លួនអស់ទៅហើយក្តី។
នៅ សុនិតា បានផាត់ចោលប្រុសតាម ស្នេហានាងមិនក្រោម៥នាក់ឡើយ ដើម្បីមកភ្ជាប់ស្នេហ៍ជាមួយអតីតប្តី អ្នកនាងលី ម៉ារីណា គឺលោកទិត ថាវរិទ្ធ ដែលទើបឡើងឋានៈជាឯកឧត្តមថ្មីៗនេះ។ បុរសដែលខកស្នេហ៍នៅ សុនិតា នោះ មានដូចជាលោកផ្កាយ៤ ពីររូប, អភិបាលខណ្ឌមួយរូប, កូនថៅកែអចលនទ្រព្យមួយ និងអ្នកដឹកនាំកម្មវិធីសិល្បៈល្បីឈ្មោះម្នាក់់។
ប្រភពបានឱ្យដឹងថា នៅ សុនិតា បានភ្ជាប់ពាក្យជាមួយលោកទិត ថាវរិទ្ធ ហើយកាលពីថ្ងៃទី៥ ខែកញ្ញា ឆ្នាំ២០១៨ តែនៅពេលសាកសួររឿងនេះផ្ទាល់ តារាដែលលង់ស្នេហ៍ពោះម៉ាយរូបនេះ ធ្លាប់ច្រានចោល៕
