តារាចម្រៀងនៅ ដាណា ហាក់លែងចង់ព្យាយាមលាក់រឿងលែងលះប្តីដូចមុនទៀត ហើយពេលនេះ ដោយនាងសារភាពថា ពិតជាបានចែកផ្លូវគ្នាជាមួយអតីតប្តីមែន ហើយពេលនេះ សល់កូនប្រុសស្រី២នាក់ នៅលើរូបនាងជាអ្នកចិញ្ចឹមបីបាច់ថែរក្សាដោយផ្ទាល់ និងគ្មានជំនួយពីឪពុករបស់ពួកគេឡើយ។
អ្នកមេម៉ាយរូបស្រស់ នៅ ដាណា ថែមទាំងអះអាងថា ពេលនេះទាំងរូបនាងផ្ទាល់ ក៏ដូចជាអតីតប្តី អាចមានសិទ្ធិពេញលេញក្នុងការរកគូស្នេហ៍ថ្មី ដោយគ្មានការអុកឡុកពីភាគីខាងណាឡើយ។
នៅ ដាណា វាចាថា “និយាយទៅ ពីមុន ខ្ញុំមិនចង់និយាយមែន តែឥឡូវខ្ញុំមិនលាក់ទៀតទេ ខ្ញុំមានកូន២នាក់មែន (ស្រី១) សព្វថ្ងៃពួកគេនៅជាមួយខ្ញុំ ហើយខ្ញុំជាអ្នកចិញ្ចឹមបីបាច់ថែរក្សាពួកគេដោយផ្ទាល់។ ខ្ញុំមិនទាមទារឱ្យឪពុកគេជួយចិញ្ចឹមអីទេ ហើយក៏មិនតូចចិត្តរឿងចិញ្ចឹមកូនៗតែម្នាក់ឯងនេះដែរ ព្រោះអីខ្ញុំស្រលាញ់កូនៗរបស់ខ្ញុំ។ ចំពោះរឿងគូស្រករថ្មីវិញ ទាំងខ្ញុំនិងគាត់ (អតីតប្តី) អាចមានសិទ្ធិរកអ្នកថ្មីរៀងៗខ្លួនបាន ដោយគ្មានខាងណារារាំងទេ ព្រោះអីយើងលែងលះគ្នា មានសំបុត្រស្នាម អាជ្ញាធរក៏បានដឹងឮដែរ”។
តាមព័ត៌មានបានឱ្យដឹងថា អតីតប្តី នៅ ដាណា ជាតារាសម្តែងម្នាក់រូបស្រស់សង្ហាណាស់ ពិសេស ពេលថតសម្តែងដោះអាវ ធ្វើឱ្យស្រីៗទាំងឡាយព្រឺរោមគ្រប់គ្នា ហេតុនេះហើយបានជាក្រោយពេលចែកផ្លូវគ្នារហូតមកដល់ពេលនេះ ដាណា នៅតែសម្លឹងមើលមិនឃើញប្រុសណាផ្សេងឡើយ ព្រោះថា បុរសថ្មីៗចូលមកសុទ្ធតែស្អាត មិនបានមួយចំណិតអតីតប្តីនាងឡើយ។
នៅ ដាណា បន្ថែមថា “មិនមែនមើលមិនឃើញទេ តែមកពីខ្ញុំមិនទាន់ចង់បាននៅពេលហ្នឹង។ ឥឡូវខ្ញុំអាចនិយាយបានថា មិនទាន់មានអ្នកថ្មីមែនហ្នឹង ព្រោះអីជាប់រវល់ការងារសិល្បៈគួរសមដែរ ហើយរវល់មើលថែកូនៗទៀត ធ្វើឱ្យរឿងរកអ្នកថ្មីហ្នុងមិនទាន់បានជួបប្រទះទេ”។
នៅ ដាណា ជាពិធីការិនីនៅទូរទស្សន៍ប៉ុស្តិ៍លេខ៩ និងជាតារាសម្តែងភាពយន្តដ៍គួរឱ្យចាប់អារម្មណ៍ម្នាក់ផងដែរ។ ថ្មីៗនេះ ដាណា បានថតរឿង “ទណ្ឌកម្មស្នេហ៍”របស់ទូរទស្សន៍ប៉ុស្តិ៍លេខ៥ និងត្រៀមថតរឿង “The Clock” របស់ LD ផងដែរ ខណៈដែលយប់ នាងជាតារាចម្រៀងប្រចាំហាងវីហ្វ្រេន ជាមួយហ៊ិន លីដា, ពេជ្រ ច័ន្ទធីតា, ឃ្លាំងតារា និងស្រីស្រស់ ជាតិ សុច្ចកា ជាដើម៕
