បើទោះជាមិនមែនជាបុរសរូបសង្ហាមែន តែថៅកែផលិតកម្ម LD Picture លោកលៀក លីដា ដែលមានមាឌតូចល្អិតរាងទាបនោះ ត្រូវបានតារាស្រីៗស្អាតៗជាច្រើនច្បាំងដណ្តើមគ្នា នាំឱ្យផ្អើលពេញស្រទាប់មហាជន។
សំណួរដែលមហាជនចង់ដឹងថា តើហេតុអ្វីបានជាតារាស្រីស្អាតៗជាច្រើនរូប ពិបាកគេចផុតពីកណ្តាប់ដៃស្នេហ៍លោកថៅកែ លៀក លីដា? តើស្រីស្អាតៗចង់បានតំណែងតួឯក ហើយព្រមប្រគល់ខ្លួនប្រាណឱ្យលោកថៅកែឬយ៉ាងណា?
សាឡាត់ ស្រីឡាង ជាតារាស្រីដែលមានទេពកោសល្យសិល្បៈមធ្យម តែជាញឹកញាប់ នាងត្រូវបានលោកថៅកែផលិតកម្ម LD លើកឱ្យធ្វើជាតួឯកទាំងភាពយន្ត និង MV ដោយធ្លាប់លេចឮថា អ្នកទាំង២មានទំនាក់ទំនងគ្នា លើសពីមិត្តភាពធម្មតាជាយូរឆ្នាំមកហើយ តែទាំងសងខាងបានប្រកែក។
ប៉ុន្តែកាលពីថ្ងៃទី១២ ខែកុម្ភៈ មុនបុណ្យថ្ងៃក្តីស្រលាញ់ ២ថ្ងៃ អតីតប្រពន្ធថៅកែ LD ដែលមានគណនេយ្យឈ្មោះ Panhchaka June នោះបានចេញមុខបកអាក្រាតរឿង សាឡាត់ ស្រីឡាង ដណ្តើមប្តីគាត់ នាំឱ្យមានការភ្ញាក់ផ្អើលជាខ្លាំងទាំងក្នុង និងក្រៅសិល្បៈ។
អតីតភរិយាលោកលៀក លីដា បានសង្កត់ធ្ងន់ថា អតីតប្តីអ្នកស្រី គឺលោកលៀក លីដា មានស្រីស្នេហ៍ច្រើនណាស់ តែមូលហេតុដែលអ្នកស្រីមិននិយាយរឿងអ្នកផ្សេង គឺលើកយកតែសាឡាត់ ស្រីឡាង មកឱ្យគេដឹងនោះ ព្រោះស្រីឡាង ពូកែឌឺអ្នកស្រីខ្លាំងណាស់ ទោះជាជួបគ្នាដោយចៃដន្យ ឬតាមឆាតហ្វេសបុកក៏ដោយ។ ប្រពន្ធដើមលោកលៀក លីដា ថែមទាំងបានចាក់សំឡេងឆាតជាមួយស្រីឡាង ឆ្លងឆ្លើយគ្នាឱ្យអ្នកលេងបណ្តាញសង្គមបានដឹងទៀតផង ខណៈដែលពេលនោះ ស្រីឡាង ពិតជាបានឌឺដងជាមួយអតីតប្រពន្ធថៅកែ LD មែន ហើយមានទាំងពាក្យថា លោកថៅកែបានចិញ្ចឹមនាងទៀត ផង។
យ៉ាងណា ស្រីឡាង ក៏បានសុំអង្វរអតីតប្រពន្ធលោកលីដា ដែរថា បើលែងលះគ្នាចប់អស់ទៅហើយ សូមកុំមករករឿងនាងទៀត។
អតីតភរិយាលោកលៀក លីដា ដែលមានឈ្មោះ Panhchaka june នោះក៏បានបង្ហាញស្លាកស្នាមមួយចំនួន ដែលត្រូវអតីតប្តីវាយជាំមុខផងដែរ នៅពេលដែលលោកថៅកែកំពុងឈ្លក់សម្រស់ស្រីស្អាតសាឡាត់ ស្រីឡាង ហើយអ្នកស្រីបានបញ្ជាក់ថា នៅពេលណាឃើញស្រីឡាង តាមទូរទស្សន៍ ឬរឿងថ្មីរបស់ LD អ្នកស្រីនឹងបន្តអត្ថាធិប្បាយលើតារាស្រីម្នាក់ នេះទៀត។
ដោយរងភាពអាម៉ាស់ត្រូវអតីតប្រពន្ធ លោកថៅកែ LD បកអាក្រាតស្ពឹកមុខនាំឱ្យខ្មាសគេពេញផ្ទៃប្រទេសនោះ ទើបកាលពីថ្ងៃទី១៤ ខែកម្ភៈ សាឡាត់ ស្រីឡាង បានដាក់ពាក្យបណ្តឹងទៅសាលាដំបូងរាជធានី ប្តឹងអតីតភរិយាលោកលៀក លីដា ទារសំណងជំងឺចិត្តនូវទឹកប្រាក់ចំនួន១០ម៉ឺនដុល្លារ។
ក្នុងពាក្យបណ្តឹងនោះ សាឡាត់ ស្រីឡាង បានបញ្ជាក់ថា “នាងខ្ញុំបានស្នើឱ្យព្រះរាជអាជ្ញាធ្វើការចោទប្រកាន់ និងផ្តន្ទាទោសលើឈ្មោះ Soth Panhchaka តាមមាត្រា២៣១ និង៣០៥ និងមាត្រា៦ ដទៃទៀត តាមក្រមព្រហ្មទណ្ឌនៃព្រះរាជាណាចក្រកម្ពុជា និងឱ្យសងជំងឺចិត្ត១០ម៉ឺនដុល្លារទាមទារឱ្យលុបសារដែលបង្ហោះ ព្រមទាំងសុំទោសជាសាធារណៈ”។ ប៉ុន្តែស្រីឡាង បានព្រមានថា ប្រសិនបើឈ្មោះ Soth Panhchaka ព្រមឈប់និយាយរឿងនាងទៀត និងលុបសារចោលអស់នោះ នាងនឹងពិចារណាដកពាក្យបណ្តឹងវិញ។
ជុំវិញរឿងអាស្រូវស្នេហាដ៏រសើបរវាងស្រីស្រស់ សាឡាត់ ស្រីឡាង និងលោកលៀក លីដា ថៅកែផលិតកម្ម LD Picture នេះ មានមតិមហាជនខ្លះបានលើកឡើងថា ពិបាកណាស់តារាៗមួយចំនួនច្រើនតែយកប្តីគេ ឬប្តូរខ្លួនជាមួយថៅកែផលិតកម្ម ដើម្បីបានតំណែងតួឯក ឆាប់ល្បីជាដើម។
អ្នកខ្លះទៀតថា បើលោក លៀក លីដា លែងប្រពន្ធដាច់ទៅ ហើយ ហេតុអីអតីតប្រពន្ធតាមព្យាបាទស្រី ស្នេហ៍ថ្មីរបស់លោធ្វីអី? ដោយឡែកប្រភព មួយទៀតបានឱ្យដឹងថា សាឡាត់ ស្រីឡាង បានទទួលប្រាក់ចិញ្ចឹមពីលោកថៅកែ LD ក្នុង១ខែ ៤ពាន់ដុល្លារទៀតផង ក្នុងការធ្វើជាស្រីស្នេហ៍លួចលាក់របស់លោកលីដា។
ប៉ុន្តែអ្នកយកព័ត៌មានយើងមិនទាន់អាចសុំការបំភ្លឺពី សាឡាត់ ស្រីឡាង និងលោកថៅកែ LD លៀក លីដា បានឡើយ។
គួរបញ្ជាក់ថា ក្រៅពីផ្ទុះរឿងស្នេហាដ៏របើជាមួយសាឡាត់ ស្រីឡាង នោះ លោកថៅកែ LD ធ្លាប់បង្ហាញភាពស្និទ្ធស្នាលយ៉ាងចម្លែកជាមួយតារាស្រីស្អាតជាច្រើននាក់មកហើយ ដូចជា សុខ សោម៉ាវត្តី, ម៉ាក សែនសូនីតា និងគៀត សុវណ្ណឡាង ជាដើម ដែលធ្វើឱ្យគេសង្ស័យថា ស្រីស្អាតៗទាំងនេះពិបាកគេចពីកណ្តាប់ដៃរបស់លោកថៅកែ។ តែតារាទាំងលើធ្លាប់ច្រានចោលការសង្ស័យទាំងនេះ៕