ស៊ឹម សូលិកា បានទិញរថយន្តទំនើប Lexus Lx 570 ពណ៌ស ស៊េរីថ្មីបំផុត តម្លៃជាង២០ម៉ឺនដុល្លារ កាលពីថ្ងៃទី២៥ ខែកុម្ភៈ ឆ្នាំ ២០១៩។ សូលិកា បានហៅការនាំចូលរថយន្តទំនើបរបស់ខ្លួននោះថា ដើមទ្រព្យ និងនាំមកនូវសុភង្គលរបស់នាងកាន់តែមានភាពសុខសប្បាយ។
ស៊ឹម សូលិកា ថ្លែងសារក្រោយទិញយករថយន្ត Lexus Lx 570 នោះ មកដល់ផ្ទះវីឡានៅបុរីប៉េង ហួត (បឹងស្នោ) ភ្លាមៗ កាលពីថ្ងៃច័ន្ទ ទី២៥ ខែកុម្ភៈ ថា “ថ្ងៃចន្ទ ដើមទ្រព្យ ភ័ព្វសេដ្ឋី ចន្ទសុខសួស្តី សិរីមង្គល”។
នេះមិនមែនជារថយន្តទី១ឡើយ របស់ស៊ឹម សូលិកា ព្រោះកន្លងមក នាងក៏ធ្លាប់ជិះរថយន្ត Jaguar និង Lexus LX 470 និង Camry ស៊េរីខ្ពស់ជាដើម។
ប្រភពបានឱ្យដឹងថា លោកអេង រិទ្ធី ដែលជាគូស្នេហ៍ថ្មីរបស់ស៊ឹម សូលិកា រីករាយចិត្តខ្លាំងណាស់ នៅពេលដែលសូលិកា ទិញរថយន្តទំនើបនេះ ព្រោះថា រថយន្តរបស់សូលិកា ក៍ដូចជារថយន្តរបស់លោកផ្ទាល់ដែរ ព្រោះអ្នកទាំង២រួមរស់ក្រោមដំបូលតែមួយ និងជិះរថយន្តរួមគ្នាផងដែរ។
ដោយឡែក មជ្ឈដ្ឋានមហាជនបានលើកឡើងថា ស៊ឹម សូលិកា ហាក់មានរាសីឡើងខ្ពស់ត្រដែតត្រដឹមតែម្តង ពេលដែលអ្នកនាងផ្តាច់ស្នេហ៍ជាមួយអតីតអគ្គនាយករងទូរទស្សន៍បាយ័ន លោកទិត ថាវរិទ្ធ មក ស្រាប់តែទិញបានផ្ទះវីឡាយ៉ាងប្រណីត តម្លៃជាង៣០ម៉ឺនដុល្លារ ហើយពេលនេះទិញ Lexus LX 570 តម្លៃជាង២០ម៉ឺនដុល្លារថែមទៀតផង អ៊ីចឹងពេលនេះ សូលិកា មិនចាញ់ជំទាវឡើយ។
ប្រភពនោះបានឱ្យឹងថា ពេលនេះ សូលិកា មានទាំងបុរសដែលចេះយល់ចិត្តនាង គឺលោកអេង រិទ្ធី និងមានទ្រព្យកាន់តែកើនឡើងទៀត ហេតុនេះហើយ គេជឿថា អតីតគូស្នេហ៍របស់នាង លោកថាវរិទ្ធ ទោះជាមានស្រីក្មេង នៅ សុនិតា ស្អំបេះដូងក្តី តែលោកប្រាកដជាកាន់តែ តាមដានសូលីកា ថែមទៀតជាមិនខាន ព្រោះថា ពេលនេះនាងមានទ្រព្យកាន់តែច្រើនទៅៗហើយ ទើបតារាមួយចំនួននិយាយថា សូលិកា ជ្រើសផ្លូវត្រូវដែលផ្តាច់ស្នេហ៍លោកថាវរិទ្ធ មក ភ្ជាប់ស្នេហ៍ជាមួយលោកអេង រិទ្ធី ស្រាប់តែមានយីអ៊ុនឡើងក្រឺតៗនៅឆ្នាំ២០១៩ នេះ។
មជ្ឈដ្ឋានមហាជនបានមើលឃើញថា ពេលនេះ ស៊ឹម សូលិកា និងអតីតគូស្នេហ៍លោកទិត ថាវរិទ្ធ គឺកាន់តែមានការប្រជែងគ្នាខ្លាំងក្លាហើយ ពោលគឺពួកគេសម្ញែងទ្រព្យមិនឱ្យចាញ់គ្នាទេ ហើយថែមទាំងទៅទិញវីឡា រស់នៅក្បែរគ្នាទៀតផង។ នៅពេលដែល ស៊ឹម សូលិកា ត្រូវបានគេសង្ស័យថា នាងមានផ្ទៃពោះជាមួយលោកអេង រិទ្ធី នោះ នៅ សុនិតា ក៏លេចឮថា មានផ្ទៃពោះកូនប្រុស៤ខែ ជាមួយលោកថាវរិទ្ធ ផងដែរ ខណៈដែលគូស្នេហ៍ទាំង២គូនេះ គេជឿថា បើអ្នកណាម្នាក់រៀបការ ម្នាក់ទៀតក៏ត្រូវតែរៀបការផងដែរ។
ប៉ុន្តែថ្មីៗនេះដែរ ស៊ឹម សូលិកា ហាក់ទះកំផ្លៀងបុរសម្នាក់ដែលនាងបានហៅប្រុសនោះថា ជា “ទឹកកក” មានន័យថា “រលាយ” ដូចទឹកកកទៀតផង ព្រោះតែបុរសនោះពូកែនិយាយដើមនាងខ្លាំងពេក។ បើទោះជាសូលិកា មិនបញ្ចោញឈ្មោះប្រុសនោះឱ្យចំៗក្តី តែគេជឿថា បុរសនោះគ្មានអ្នកណាក្រៅពីលោកថាវរិទ្ធ ឡើយ។
ប្រភពបានឱ្យដឹងថា មិនមែនតែស៊ឹម សូលិកា នោះទេ ដែលក្តៅក្រហាយជាមួយលោកថាវរិទ្ធ សូម្បីតែបុគ្គលិកមួយចំនួនទៀត ដែលធ្លាប់ធ្វើការនៅជុំវិញខ្លួនអតីតអគ្គនាយករងទូរទស្សន៍បាយ័ន រូបនេះ ក៏មិនពេញចិត្តអតីតប្តី អ្នកនាងលី ម៉ារិណា ឡើយ ព្រោះពួកគេបង្ហើបថា លោកថាវរិទ្ធ បង្កើតបក្សពួកនៅកន្លែងធ្វើការ និងកម្ចាត់ជនណាដែលលោកមិនពេញចិត្ត ទើបធ្វើឱ្យគ្រប់គ្នាគាំទ្រសូលិកា ដែលកំពុងតែបញ្ឈឺចិត្តលោកថាវរិទ្ធ តាមរយៈការភ្ជាប់ស្នេហ៍ជាមួយលោកអេង រិទ្ធី និងការទិញ Lexus LX 570 តម្លៃជាង២០ម៉ឺនដុល្លារ នៅពេលនេះ ដើម្បីឱ្យអតីតគូស្នេហ៍បានភ្លឺភ្នែក៕
