តារាចម្រៀង យក់ ថិតរដ្ឋា មិនដែលអួតអាងថា អ្នកនាងជាអ្នកមានទ្រព្យស្តុកស្តម្ភ តាមរយៈការសម្ញែងសម្ភារៈគ្រឿងអលង្ការ ជាពេជ្រទាំងឈុតៗដូចគេទេ គឺសាមញ្ញៗធម្មតាប៉ុណ្ណោះ រហូតធ្វើឱ្យតារាខ្លះមើលរំលងនាងទៀតផង ពេលដែលចូលរួមកម្មវិធីអ្នកសិល្បៈរួមអាជីព។ ប៉ុន្តែអ្នកដែលស្គាល់យក់ ថិតរដ្ឋា ច្បាស់ បានញាក់សាច់ ព្រោះថាអ្នកនាងមានទ្រព្យមិនចាញ់ជំទាវឡើយ។
យក់ ថិតរដ្ឋា មានផ្ទះផ្ទាល់ខ្លួនជាច្រើនកន្លែង ហើយពេលនេះអ្នកនាងជិះរថយន្តទំនើប២គ្រឿងឆ្លាស់គ្នា តម្លៃជិតកន្លះលានដុល្លារ គឺ Lexus Lx 570 និង Range Rover ស៊េរីថ្មី ហើយអ្នកនាងបើកមុខជំនួញផ្ទាល់ខ្លួនដូចជាហាងរក្សាសម្រស់ និងហាងក្រណាត់ហូល ផាមួង ជាដើម។
អ្នកសិល្បៈដែលស្និទ្ធយក់ ថិតរដ្ឋា បានឱ្យដឹងថា តារាចម្រៀងរូបនេះមានសំណាងដែលមានស្វាមី លោកឃុំ ប៉ុណ្ណាដែត ចេះថ្នាក់ថ្នមចិត្តអ្នកនាងគ្រប់ពេលវេលាទាំងអស់ ហើយទោះជារដ្ឋា ចង់ជិះរថយន្តម៉ាកអី ក៏ប្តីនាងទិញឱ្យដែរ។ ប៉ុន្តែយ៉ាងណា យក់ ថិតរដ្ឋា ដែលចេញពីផលិតកម្មរស្មីហង្សមាស ចូលថោន នោះ ហាក់មិនសូវទទួលបានជោគជ័យដូចការរំពឹងទុកឡើយ ព្រោះថា ថោន មានមាស សុខសោភា និងរ៉ាបី មានប្រៀបជាងគេ។ តែយក់ ថិតរដ្ឋា ទោះជាមិនលេងសិល្បៈទៀត ក៏នាងមានប្រាក់ចាយមិនចេះអស់ដែរ ព្រោះស្វាមីរបស់នាងដែលជាអ្នករកស៊ីផ្នែកអចលនទ្រព្យនោះ មានលុយមិនចាញ់ឧកញ៉ាឡើយ។
យក់ ថិតរដ្ឋា បានរៀបការជាមួយលោកឃុំ ប៉ុណ្ណាដែត កាលពីឆ្នាំ២០០៦ ហើយពេលនេះទទួលបានចំណងដៃកូនប្រុស ២នាក់។ រដ្ឋា បានលុបចោលគម្រោងយកកូនស្រី កាលពីឆ្នាំ២០១៨ ព្រោះនាងត្រូវងាកមកពង្រឹងអាជីពចម្រៀងនៅថោន ដែលធ្វើឱ្យប្តីនាងចង់បីកូនស្រីខកចិត្ត៕
