នៅថ្ងៃនេះ ក្រសួងសុខាភិបាលបានរកឃើញមនុស្ស២នាក់ មានលទ្ធផលវិជ្ជមានវីរុសកូវីដ-១៩ ដោយក្នុងនោះមានម្នាក់បម្រើការក្នុងធនាគារឯកជនកន្លែង (នៅផ្លូវសម្តេចប៉ាន រាជធានីភ្នំពេញ) ត្រូវបានក្រសួង សុំគោលការពីរាជរដ្ឋាភិបាល ដើម្បីផ្អាកដំណើរការបណ្តោះអាសន្ន ចាប់ពីថ្ងៃទី០៣ ខែធ្នូ ឆ្នាំ២០២០។
ស្ត្រី២នាក់ ដែលក្រសួងសុខាភិបាល បានរកឃើញវិជ្ជមានកូវីដ-១៩ ទី១. ស្ត្រីជនជាតិខ្មែរអាយុ២៣ឆ្នាំ មានអស័យដ្ឋានរស់នៅសង្កាត់វាលស្បូវខណ្ឌច្បារអំពៅ រាជធានីភ្នំពេញ ជាភរិយាអនុប្រធាននាយកដ្ឋានពន្ធនាគារនៃក្រសួងមហាផ្ទៃ។ ទី២. ស្ត្រីជនជាតិខ្មែអាយុ២១ឆ្នាំ មានអស័យដ្ឋានរស់នៅសង្កាត់វាលស្បូវ ខណ្ឌច្បារអំពៅរាជធានីភ្នំពេញ និងជាបុគ្គលិកធនាគារកាធេយូណាយធីត រាជធានីភ្នំពេញ។
ស្ត្រីទាំង២នាក់ខាងលើ ត្រូវបានបញ្ជូនមកព្យាបាលនៅមន្ទីរពេទ្យមិត្តភាពខ្មែរ-សូវៀត (ហៅពេទ្យរុស្ស៊ី)។
គួរបញ្ជាក់ថា គិតពីថ្ងៃទី២៩ ខែវិច្ឆិកា ឆ្នាំ២០២០ រហូតដល់ថ្ងៃទី០២ ខែធ្នូ ឆ្នាំ២០២០ ក្រសួងសុខាភិបាល បានធ្វើតេស្តអ្នកប៉ះពាល់សរុបទាំងអស់ ចំនួន៨៧៦៦នាក់ ដែលនៅក្នុងចំនួននេះ មានអ្នកវិជ្ជមានវីរុសកូវីដ-១៩ ថ្មី សរុបចំនួន១៩នាក់ហើយ ក្នុងព្រឹត្តិការ “សហគមន៍ ២៨វិច្ឆិកា”៕
