ភ្នំពេញ ៖ អតីតតារាសម្តែង គឹម លីហ្សា ដែលបានរៀបការប្តីជាអាណិកជនខ្មែរនៅប្រទេសអូស្ត្រាលី និងបានចេញទៅរស់នៅក្រៅប្រទេស ជាមួយស្វាមីបានមួយរយ: ក៏បានវិលមករស់នៅក្នុងប្រទេសកម្ពុជា វិញនោះ ដោយបោះបង់អាជីពសិល្ប: ងាកមកប្រកបរបរលក់ផលិតផលអនឡាញ និងម្ជូរក្រឡុកនោះ ថ្មីៗនេះ ស្រាប់តែត្អូញថា នាងរស់នៅជាមួយប្តី ដូចឱបភ្លើង និងបានប្រកាសលែងប្តីដុកទ័រនោះ ក្រោយពីបានរស់នៅបែកគ្រែ ជាមួយប្តី ជាង១ឆ្នាំមក។
គឹម លីហ្សា បានសរសរក្នុងគណនីបណ្តាញសង្គម ហ្វេសប៊ុក របស់នាង នៅថ្ងៃទី១៥ ខែធ្នូ ឆ្នាំ២០២០ ថា «គេឧកញ៉ា គេជំទាវ គេនៅប្រកាសលែងគ្នាបាន ចុះយើង ហេតុអីត្រូវខ្មាសបើនៅគ្មានសុភមង្គលអ៊ីចឹង! ម្នាក់ចង់ត្រូវ ចង់បានយុត្តិធម៌ ម្នាក់ចង់ឈ្នះ អ៊ីចឹងនៅជាមួយគ្នា ដូចឱបភ្លើង អ៊ីចឹងថ្ងៃនេះ សុំប្រកាសលែងប្តីដែរហើយ»។
គឹម លីហ្សា បានសរសេរបន្ថែមថា «មេម៉ាយ មានអីត្រូវខ្មាសគេ មេម៉ាយចេះរកស៊ី អត់ប្តីក៏អត់ដាច់ពោះងាប់ដែរ មិនមែនស៊េរីសុំលុយប្តីផង!»។
ជុំវិញការប្រកាសលែងប្តី ខាងលើនេះ «នគរធំ» មិនអាចសុំការបញ្ជាក់បន្ថែមពីអ្នកនាងគឹម លីហ្សា បានទេ កាលពីម្សិលមិញ។
ទោះជាយ៉ាងណា យោងតាមការឆ្លើយតប (Reply) របស់គឹម លីហ្សា ទៅកាន់មិត្តភក្តិដែលចូលមកបញ្ចេញយោបល់ (Comment) ក្នុងគណនីហ្វេសប៊ុករបស់នាង លីហ្សា បានបញ្ជាក់ថា ការប្រកាសលែងប្តីរបស់នាង គឺជាការពិតមែន មិnមែនជាការលេងសើចទេ ដោយនាងបញ្ជាក់ថា មុនការប្រកាសបែបនេះ នាងនិងប្តី បានរស់នៅបែកផ្ទះ បែកបន្ទប់ បែកគ្រែ ជាង១ឆ្នាំមកហើយ ដោយសារតែការមិនចុះសម្រុងគ្នា។ គឹម លីហ្សា ថែមទាំងបង្ហើបថា គ្រោងធ្វើពិធីជប់លៀងលែងប្តី ដើម្បីលាកម្មជួបស្នេហ៍មិនសមប្រកបទៀតផង។
គួររំលឹកថា អតីតតារាសម្តែងរូបស្រស់សាច់សខ្ចី គឹម លីហ្សា បានរៀបការជាមួយបុរសអាណិកជនខ្មែរនៅអូស្រ្តាលី ឈ្មោះ គីវ វុឌ្ឍី ហៅស្តេវិន មានមុខរបរជាគ្រូពេទ្យ កាលពីថ្ងៃទី១៨ ខែធ្នូ ឆ្នាំ២០១៣ ដោយមានវត្តមានសិល្បករ-សិល្បការិនីជាច្រើនរយនាក់ បានអញ្ជើញចូលរួមអបអរសាទរ បន្ទាប់ពីនាងនិងស្វាមី មានទំនាក់ទំនងស្នេហាផ្អែមល្ហែមនឹងគ្នា អស់រយៈពេលជាងពីរឆ្នាំមក។
ក្រោយរៀបការមិនបានមួយឆ្នាំផង គឹម លីហ្សា ក៏បានចាកចេញទៅរស់នៅដែនដីកោះអូស្ត្រាលី ជាមួយស្វាមី នៅថ្ងៃទី០៥ ខែមិថុនា ឆ្នាំ២០១៤ ដោយបោះបង់ចោលអាជីពសិល្បៈទាំងស្រុងតែម្តង។
ក្នុងជីវិតអាពាហ៍ពិពាហ៍របស់គឹម លីហ្សា ជាមួយស្វាមីនៅលើទឹកដីអូស្ត្រាលី នោះ លីហ្សា តែងបង្ហាញនូវសុភមង្គល តាមរូបថតផ្អែមល្ហែមជាមួយប្តីជាញឹកញាប់ ពិសេសក្រោយពេលនាងមានកូនប្រុសទី១ ស្រាប់តែថ្មីៗនេះ អ្នកនាងគឹម លីហ្សា បានធ្វើឲ្យមហាជនស្រឡាំងកាំង បន្ទាប់ពីនាងបានវិលមករស់នៅក្នុងប្រទេសកម្ពុជា វិញ នៅឆ្នាំ២០១៨ លែងវិលទៅអូស្ត្រាលី ដោយចាប់យកមុខរបរលក់ផលិតផលរក្សាសម្រស់តាមអនឡាញ និងលោកម្ជូរក្រឡុក ជាពិសេស ក្រោយមានកូនប្រុសទី២ ស្រាប់តែគឹម លីហ្សា បង្ហាញសញ្ញានៃភាពរកាំរកូសជាមួយស្វាមី រហូតចុងក្រោយឈានដល់ប្រកាសថា សម្រេចចិត្តលែងប្តីតែម្តង។
ជាការកត់សម្គាល់ មុនពេលប្រកាសលែងប្តីនៅពេលនេះ កាលពីពេលកន្លងទៅ គឹម លីហ្សា ធ្លាប់បានបង្ហោះតាមហ្វេសប៊ុក ពីចំណងស្នេហ៍រកាំរកូសរបស់នាងផងដែរ ដូចជានាងសរសេរថា «ឈ្លោះគ្នាច្រើនអ៊ីចឹង យកចិញ្ចៀនលក់យកលុយចាយអស់ឥឡូវហ្នឹង» និងថា មកពីប្តីធ្វើឲ្យខឹងម្ដងៗ ចង់តែធ្វើមែនទែនជាដើម៕
