ភ្នំពេញ ៖ កូនភ្លោះ៣ ដែលជាចៅសម្តេចហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានកើតក្នុងគ្រួសារអតីតតារាសម្តែង លោកជុំ ស៊ីថា ដែលភរិយាលោកបានសម្រាលកូនភ្លោះ៣ កាលពីយប់ថ្ងៃទី២២ ខែធ្នូ ឆ្នាំ២០២០ នៅមន្ទីរពេទ្យឯកជន ខេម៉ា នារាជធានីភ្នំពេញ។
អតីតតារាសម្ដែង និងបង្ហាញម៉ូដ លោកជុំ ស៊ីថា ដែលសព្វថ្ងៃមានមុខរបរជាមន្ត្រីនគរបាល បានឲ្យដឹងថា ភរិយារបស់លោក បានសម្រាលកូនដោយសុវត្ថិភាព កាលពីល្ងាចថ្ងៃទី២២ ខែធ្នូ ឆ្នាំ២០២០ ដោយវះកាត់ នៅមន្ទីរពេទ្យឯកជន ខេម៉ា បន្ទាប់ពីភរិយាលោក សម្រាកនៅក្នុងមន្ទីរពេទ្យនេះ អស់រយៈពេល ២០ថ្ងៃ ដើម្បីត្រៀមសម្រាល ហើយគ្រូពេទ្យជំនាញថាមិនអាចបន្តពន្យារពេលតទៅទៀតបាន។
សូមបញ្ជាក់ថា មុនពេលបានកូនភ្លោះ៣ នេះ លោកជុំ ស៊ីថា មានកូនស្រីម្នាក់ និងប្រុសម្នាក់រួចទៅហើយ។ កូនភ្លោះ៣ ដែលទើបសម្រាលនេះ (ប្រុស២ ស្រី១) ដោយកូនភ្លោះទី១ កើតមុនគេ ជាកូនប្រុស ទី២ ជាកូនស្រី និងទី៣ ជាកូនប្រុស។
លោកជុំ ស៊ីថា បានឲ្យដឹងថា បន្ទាប់ពីភរិយាលោកបានសម្រាលកូនភ្លោះ៣ នេះដោយសុវត្ថិភាពហើយ លោកនិងភរិយា លែងយកកូនបន្ថែមទៀតហើយ ព្រោះពេលនេះលោកមានកូន ៥នាក់ទៅហើយ ម្យ៉ាងលោកអាណិតភរិយាក្នុងការពពោះ និងសម្រាលកូន ជាពិសេសការពពោះកូនភ្លោះដល់ទៅ៣នាក់ លើចុងក្រោយនេះ។
ប៉ុន្តែយ៉ាងណា នៅពេលនេះលោកបានធូរចិត្ត និងសប្បាយចិត្តជាខ្លាំង បន្ទាប់ពីភរិយាលោកសម្រាលកូនភ្លោះ៣ ដោយសុវត្ថិភាព និងមានសុខភាពល្អ ទាំងម្ដាយនិងកូន។ ជាមួយនេះលោកក៏សូមអរគុណដល់មិត្តភក្តិ បងប្អូនទាំងអស់គ្នា សម្រាប់ការជូនពរដ៏មានតម្លៃដល់ប្រពន្ធនិងកូនរបស់លោក៕
