ភ្នំពេញ៖គង់ សុជាតិ បានSurprise ថ្ងៃខួបកំណើតលោកអាឡិច ចាន់ត្រា កាលពីពេលថ្មីៗនេះស្រាប់តែពិធីការិនីរូបនេះត្រូវបានលោកលឹម ប៉ោស្រុន ហៅអាឡិច ចាន់ត្រា ថើបថ្ពាល់នៅចំពោះមុខស្វាមីនាង តែម្ដង តែលោកវិបុល គ្មានចិត្តប្រចណ្ឌប៉ុនក្រចកដៃនោះទេ។មូលហេតុដែលប្ដីសុជាតិ មិនចេះប្រចណ្ឌភរិយាពេលត្រូវលោកប៉ោស្រុន ថើបនោះដោយសារតែទាំងលោកវិបុល និងសុជាតិ មានការរាប់អានគ្នាជាមួយលោកប៉ោស្រុន ជាច្រើនឆ្នាំមកហើយ ពិសេសក្នុងកម្មវិធីមង្គលការឬកម្មវិធីជប់លៀងធំៗដែលលោកអាឡិច ជាប្រធានក្រុមហ៊ុនមួយនោះតែងតែហៅអ្នកនាងសុជាតិ និងស្វាមីធ្វើជាពិធីករក្នុងកម្មវិធីទាំងឡាយជាប្រចាំ។
គង់ សុជាតិ បានបរាជ័យក្នុងការពពោះកូនភ្លោះប្រុសតាមសំណើររបស់ស្វាមីក្មេងលោកជា វិបុល ព្រោះតែរយៈពេលជាង២ឆ្នាំមកហើយអ្នកនាងនៅតែគ្មានកូនថែម។យ៉ាងណាចំណងស្នេហាសុជាតិ-វិបុល បានស្រស់ថ្លាឡើងវិញក្រោយពីជួបភាពរង្គោះរង្គើរមួយប្រាវធំកាលពីឆ្នាំ២០១០ ក្រោយផ្ទុះរឿងលោកវិបុល និងចាន់ កែវនិមល បង្កាត់ភ្លើងស្នេហាជាមួយគ្នានៅក្រៅឆាក។សុជាតិ ឈឺចិត្តពេករហូតត្រូវដឹកចូលពេទ្យសង្រ្គោះបន្ទាន់ ខណៈដែលលោកវិបុល បានដឹងកំហុសឆ្គងទើបចង់បញ្ជាក់ស្នេហ៍ស្មោះសចំពោះសុជាតិ សារជាថ្មីឡើងវិញតាមរយៈការកោសក់បួសជាសាមណេរ(នេន)រយៈពេល១០ថ្ងៃកាលពីថ្ងៃទី២១ខែកញ្ញាឆ្នាំ២០២០ នៅវត្តនិគ្រោធវ័នហៅវត្តគល់ទទឹង។ឥឡូវសុជាតិ ជឿរជាក់លើប្ដីទាំងស្រុងដូចដើមវិញហើយជាញឹកញាប់នាងបានបណ្ដើរស្វាមីទៅរឹតចំណងស្នេហានៅតាមតំបន់រម្យនីយដ្ឋានជាច្រើនកន្លែងដើម្បីឲ្យស្នេហារឹងមាំថែមទៀត។
ប៉ុន្ដែរឿងដែលគូរឲ្យសោកស្ដាយសុជាតិ និងចាន់ កែវនិមល លែងនិយាយស្ដីរកគ្នាសោះតែម្ដងបើទោះជាអ្នកទាំងពីររួមទ្រនុំហង្សមាសជាមួយគ្នាក្ដី។ មិនត្រឹមតែជួបគ្នានៅកន្លែងធ្វើការសុជាតិ និងកែវនិមល មិនហាមាត់រកគ្នានោះទេ ប៉ុន្ដែពេលសុជាតិ ជួបកែវនិមល នៅកម្មវិធីអ្នកសិល្បៈដោយចៃដន្យនោះពិធីការិនីទាំងពីរដួងក៍មិនដែលលូកមាត់និយាយរកគ្នាដែរ។ប្រភពបានឲ្យដឹងថាសុជាតិ នឹងមិនអនុញ្ញាតឲ្យប្ដីចាប់ដៃចាន់ កែវនិមល ធ្វើMCជាដៃគូវិញជាដាច់ខាតព្រោះអ្នកនាងខ្លាចចូលពេទ្យជាលើកទី២ បើទោះជាមានការសំណូមពរពីទស្សនិកជនយ៉ាងណាក៍ដោយ។ដោយឡែកថៅកែហង្សមាសវិញក្រោយពីបំបែកលោកវិបុល លែងឲ្យធ្វើដៃគូជាមួយកែវនិមល នោះម្ចាស់ទូរទស្សន៍នោះបានរៀបក្បួនឲ្យលោកវិបុល ចាប់ដៃប្រពន្ធនិងពិធីការិនីផ្សេង ខណៈដែលនិមល ធ្វើការជាមួយពិធីករមួយចំនួនទៀតទើបធ្វើឲ្យពិធីករល្បីឈ្មោះទាំង៣ដួងនៅតែរួមទ្រនុំហង្សមាសបានដូចមុនដដែល៕
