ភ្នំពេញ៖តារាចម្រៀងសាន់ដេលោកសាន្ដ ពេជ្រសុភារិទ្ធិ ហៅអ៊ីណូ បានលេចមុខបណ្ដើរស្រីស្អាតម្នាក់ចូលរួមក្នុងកម្មវិធីជប់លៀងរបស់អតីតពិធីការិនីអ្នកនាងអ៊ឹម សុគន្ធា នៅសណ្ឋាគារភ្នំពេញកាលពីរាត្រី២៦ខែធ្នូឆ្នាំ២០២១ ហើយពួកគេអង្គុយតុញាំអាហារជិតគ្នាមើលទៅដូចគូស្នេហ៍។តារារួមអាជីពបានសម្ដែងការចាប់អារម្មណ៍អ៊ីណូ ហើយថាពិតជាពូកែមែន រកបានស្រីស្អាតថ្មីសាច់សខ្ចីញិញតែម្ដង។តាមព័តមានថានារីដែលអ៊ីណូ យកទៅបង្ហាញមិត្តភក្ដិនោះឈ្មោះស្រីស្អាត”បូរមី”ហើយនាងជាអ្នកធ្វើការផ្នែករត់ការលិខិតឆ្លងដែន(Passport) ដែលភាគច្រើននាងនៅក្រៅស្រុក។ប៉ុន្ដែថ្មីៗនេះនាងទើបត្រឡប់មកពីបរទេសមកស្រុកខ្មែរ ហើយស្រាប់តែស្ងាត់ៗបង្ហាញភាពស្អិតស្នាលជាមួយEno គូរឲ្យភ្ញាក់ផ្អើលនៅពេលនេះទៅវិញ។
ក្នុងជំនួបតាមទូរស័ព្ទកាលពីរសៀលថ្ងៃទី២៧ខែធ្នូ លោកអ៊ីណូ បានឲ្យដឹងថានារីដែលលោកនាំទៅចូលរួមកម្មវិធីនោះគឺជាប្អូនៗទេ។លោកពេជ្រ សុភារិទ្ធិ បន្ថែមថាស្រីស្រស់នោះមិនមែនជាសង្សារឬគូស្នេហ៍របស់លោកឡើយ តែលោកចាត់ទុកជាប្អូនៗដែលនាងគឺជាអ្នកលក់ឡេ។តារាចម្រៀងសាន់ដេរូបនេះបានបន្ថែមថាលោកមានប្រពន្ធទៅហើយតែមិនទាន់បានរៀបការតាមប្រពៃណីខ្មែរនោះទេព្រោះពេលវេលាមិនទាន់សមស្រប ហើយក៍មិនអាចកំណត់ថាថ្ងៃខែឆ្នាំណាទើបអាចការបានទេ ព្រោះបច្ចុប្បន្នលោកមមាញឹកក្នុងសិល្បៈគូសមដូចជានៅថ្ងៃឆ្លងឆ្នាំសកល(Countdown )ខាងមុខនេះលោកច្រៀងសម្ដែងឲ្យស្រាបៀរGanzberg ។
ដោយឡែកកញ្ញាបូរមី មិនអាចទាក់ទងបានទេកាលពីពេលថ្មីៗនេះព្រោះគ្មានលេខទូរស័ព្ទ ខណៈដែលការតេតាមឆាតហ្វេសបុកនាងមិនOnline ឡើយ។យ៉ាងណាតាមរយៈសកម្មភាពអ៊ីណូ និងនាងបូរមី នោះហាក់ស្និតស្នាលគ្នាដូចគូសង្សារហើយអ្នករួមអាជីពបានចាប់អារម្មណ៍ទៅលើពួកគេទាំង២ជាខ្លាំងតែម្ដង។
គូរបញ្ជាក់ថាអ៊ីណូ ដែលមានរហ័សនាមថាតារាក្បាលធំ ឬអ្នកឈ្នះអស់មាសត្រូវនោះធ្លាប់មានដំណឹងថាលោកមានប្រពន្ធនិងកូន២នាក់ទៅហើយ ប៉ុន្ដែអ្វីដែលធ្វើឲ្យទស្សនិកជនចាប់អារម្មណ៍នោះគឺកាលពីថ្ងៃទី១៨ខែកញ្ញាឆ្នាំ២០២១ អ៊ីណូ សារភាពប្រាប់អ្នកកាសែតថាលោកបានសែនព្រេនជាមួយភរិយាឈ្មោះថៃ ម៉ានីតា ដែលជាអ្នករកស៊ីលក់Online នៅខេត្តបន្ទាយមានជ័យ តែអ្វីដែលចម្លែកពេលនេះអ៊ីណូ មិនបណ្ដើរប្រពន្ធបែជាកៀកកើយជាមួយស្រីស្រស់តូចតន់នាងបូរមី ទៅវិញ។
យ៉ាងណាអ្នកយកព័តមានយើងរងចាំការបំភ្លឺពីកញ្ញាបូរមី ជានិច្ច៕