ភ្នំពេញ៖អ្នកនាងអម្ពរ ទេវី បានឡើងគីឡូចម្លែកបន្ដិចសម្រាប់ការបង្ហាញរូបភាពដំបូងបំផុតនៅថ្ងៃបាកឆាកចូលឆ្នាំសកល២០២២ ខណៈដែលនាងបានកើនអាយុឡើង១ឆ្នាំទៀតហើយពោលគឺឆ្នាំនេះមានវ័យ៥២ឆ្នាំ។ជុំវិញការឡើងទម្ងន់ជាងមុននេះគឺបណ្ដាលមកពីនាងមានសេចក្ដីសុខទាំងចិត្តទាំងកាយ៉ាទើបបានជាភ្លេចខ្លួនបណ្ដាលឲ្យឡើងសាច់ដល់ថ្នាក់នេះ។ប៉ុន្ដែនៅពេលដែលអ្នកនាងទេវី កាន់តែមានព្រលឹងបែបនេះស្វាមីថ្មីរបស់នាងដែលមានឈ្មោះថាPauly Hap នោះរឹតតែគ្រឺតក្នាញ់ថែមទៀតហើយអ្នកទាំង២បានតុបតែងខ្លួនប្លែកៗនៅរយៈពេលចុងក្រោយនេះដែលមើលទៅមិនចាញ់គូស្នេហ៍យុវវ័យឡើយ។
អ្នកនាងអម្ពរ ទេវី បានអាកខានចុះមកថតភាពយន្ដរឿងភាគមួយឲ្យហង្សមាសព្រោះតែកូវីដ ហើយតាមព័តមានថាឆ្អឹងរឿងនោះត្រូវបានផ្អឹបទុកមួយអន្លើសិនព្រោះអ្នកដឹកនាំសម្ដែងភាពយន្ដនោះមិនតម្រូវជ្រើសតួផ្សេងដាក់ជំនួសអ្នកនាងទេវី នោះទេ គឺរងចាំពេលវេលាសមស្របដែលអ្នកនាង អាចចុះមកខ្មែរបានទើបចេញថត។ដោយឡែកលោកពេជ្រ ភិរុណ អតីតស្វាមីអ្នកនាងអម្ពរ ទេវី ធ្លាប់បង្ហើបឲ្យដឹងថាអ្នកនាងទេវី ថត១រឿងមានតម្លៃ១ម៉ឺនដុល្លារ ហើយការស្នាក់នៅសណ្ឋាគា និងថ្លៃសំបុត្រយន្ដហោះទៅមកគឺផលិតករជាអ្នកទទួលរ៉ាប់រងទើបអ្នកនាងចុះមកថតបាន។ការលើកឡើងបែបនេះរបស់លោកភិរុណ ដោយសារតែអ្នកនាងទេវី ធ្លាប់មកថតសម្ដែងរឿង”ទឹកចិត្តម្ដាយសម័យថ្មី”របស់អ្នកស្រីពាន់ ភួងបុប្ផា កាលពីឆ្នាំ២០១៦ និងថតឲ្យLD ឆ្នាំ២០១៧ ផងដែរ ខណៈដែលមានផលិតករជាច្រើនទៀតចាប់អារម្មណ៍ចង់ឲ្យអ្នកនាងទេវី សម្ដែងភាពយន្ដជាមួយដៃគូចាស់របស់នាងលោកទេព រិនដារ៉ូ សារជាថ្មីឡើងវិញ។
សូមបញ្ជាក់ថាអ្នកនាងអម្ពរ ទេវី បានរៀបការជាមួយលោកពេជ្រ ភិរុណ កាលពីខែតុលាឆ្នាំ១៩៩២ ហើយមុនចែកផ្លូវគ្នានេះលោកភិរុណ ធ្លាប់ប្រាប់អ្នកយកព័តមានយើងថាចំណងស្នេហាលោកជាមួយអតីតភរិយាបន្សល់ចំណងដៃកូន២នាក់គឺកូនទី១ប្រុសឈ្មោះភិរុណ ឥទ្រ្ទបុត្រ និងកូនទី២ឈ្មោះភិរុណ លក្ស្ញីទេវី ។សព្វថ្ងៃកូនទី១របស់លោកភិរុណ កំពុងរស់នៅអាមេរិកជាមួយអ្នកនាងអម្ពរ ទេវី ដោយចូលបម្រើរជាទាហានអាមេរិកទៀតផង ខណៈដែលអ្នកនាងទេវី មានកូនស្រីម្នាក់ទៀតជាមួយស្វាមីថ្មី។ចំពោះលោកពេជ្រ ភិរុណ ដែលមានអាយុ៦៨ឆ្នាំវិញលោកទុកជីវិតជាពោះម៉ាយមិនព្រមយកប្រពន្ធថ្មីទៀតឡើយក្រោយអស់និស្ស័យជាមួយអ្នកនាងអម្ពរ ទេវី ហើយអតីតភរិយាបែជាហៅលោកថាជា”ពុក”ទៅវិញ៕
