ភ្នំពេញ៖ការលើកតារាចម្រៀងនីកូ ឲ្យធ្វើជាគណៈកម្មាការប្រលងចចម្រៀងមួយកាលពីពេលថ្មីៗនេះពីហង្សមាសមានន័យថាតារាចម្រៀងមួយណារបស់ផលិតកម្មនេះក៍អាចឡើងអង្គុយកៅអីនោះបានដែរព្រោះថាបេក្ខភាពដែលចូលរួមប្រកួតខ្លះមានសម្ថភាពខ្លាំងជាងគណៈកម្មាការ។ដោយឡែកស្រីស្អាតរ៉េត ស៊ូហ្សាណា វិញទោះជាបទពិសោធន៍នៅខ្ចីព្រោះទើបចាប់អាជីពចម្រៀងបានជាង៣ឆ្នាំមែន ប៉ុន្ដែកន្លងមកថៅកែហង្សមាសបានលើកស្ទួយនាងជាបន្ដបន្ទាប់តាមរយៈការផ្ដល់តំណែងជាតួឯកក្នុងភាពយន្ដភាគ និងស្ទើតែគ្រប់បណ្ដារកម្មវិធីប្រគុំតន្រ្ដីធំៗតែងតែលេចមុខនាងជានិច្ច ខណៈដែលស្ពតពាណិជ្ជកម្មធំៗវិញនាងហ្សាណា ក្ដាប់ឱកាសបានច្រើនជាងមិត្តរួមក្រុម។មានការលើកឡើងថានាងស៊ូហ្សាណា អាចនឹងឡើងអង្គុយកៅអីដូចនីកូ នៅពេលខាងមុខនេះជាមិនខានប្រសិនបើលោកថៅកែហង្សមាសចង់លើកស្ទួយនាងថែមមួយក្រឺតថែមទៀតនោះព្រោះថាតារារួមក្រុមដូចជាសុខ ស្រីនាង និងផន ស្រីខួច ក៍ឆក់បានតំណែងធំនេះព្រមគ្នាដែរបើទោះជាភាពល្បីល្បាញរបស់ពួកគេនៅមានកម្រិតក្ដី។
ការអះអាងបែបនេះដោយសារតែកន្លងមកតារាចម្រៀងចាស់វស្សាហ៍នៅហង្សមាសពេជ្រ សោភា បានអះអាងថានៅពេលដែលរូបនាងឬសុគន្ធកញ្ញា ចាស់ៗទៅនាងជឿរថាហ្សាណា នឹងឡើងទៅជំនួសពួកនាងនាថ្ងៃអនាគត។ប៉ុន្ដែពេលនោះអ្នកជំនាញសិល្បៈលោកមិញ សុធីវណ្ណ ធ្លាប់អះអាងថាសម្ថភាពនៃការច្រៀងបទខ្មែររបស់ហ្សាណា នៅមានកម្រិតមិនអាចទៅជំនួសឱក សុគន្ធកញ្ញា ឬតារាស្រីជូរមុខនៅហង្សមាសបានទេ គឺទាមទារពេលវេលាបន្ថែមទៀត។លោកសង្កត់ថាហ្សាណា មានភាពទាក់ទាញខ្លាំងលើរូបសម្រស់និងការច្រៀងបទជាភាសារបរទេស។
រ៉េត ស៊ូហ្សាណា ជាអ្នកចម្រៀងដែលស្ថិតក្នុងចំណោមតារាដែលមានឪពុកតាមការពារហើយតាំងពីឈជើងនៅហង្សមាសជាង៣ឆ្នាំមកនេះនាងមិនធ្លាប់ជំពប់រឿងអាស្រូវស្នេហានោះទេ បើទោះជាកាលពីពាក់កណ្ដាលឆ្នាំ២០២០ នាងធ្លាប់បង្ហាញសញ្ញាមានសង្សារតាមរយៈការកាន់ដៃប្រុសម្នាក់ដោយលាក់មុខក្ដី។គេកត់សម្គាល់ថានៅរដូវកូវីដ២ឆ្នាំជាប់គ្នានេះនាងហ្សាណា មិនត្រឹមតែគ្មានវិបត្តិសេដ្ឋកិច្ចនោះទេ ប៉ុន្ដែនាងថែមទាំងមានទ្រព្យយ៉ាងលឿនដោយទិញផ្ទះ២ល្វែងជាប់គ្នាតម្លៃមិនក្រោម៣០ម៉ឺនដុល្លារ និងរថយន្ដទំនើបម៉ាកJeep Rubicon តម្លៃ៨៧០០០ដុល្លារក្នុងពេលតែមួយទៀតផង។តែអតីតបេក្ខភាពThe Voice Cambodia រដូវកាលទី២នេះមិនសូវរងសម្ពាធថាមានប្រុសឧបត្ថម្ភឡើយ ព្រោះសម្អាងថានាងមានជីវភាពធូធារតាំងពីមុនចូលសិល្បៈម្លេះ ហើយក្រុមគ្រួសារបានព្រមានតារាធ្មេញចំពើសរូបនេះថាបើនាងមានរឿងអាស្រូវកេរ្ដិ៍នោះនឹងត្រូវបញ្ឈប់ពីអាជីពសិល្បៈភ្លាម៕
