ពោធិសាត់៖សួ វិចិត្រ អាយុ២៨ឆ្នាំបានលើកពានBeat The Best 2022 រដូវកាលទី១របស់ក្រុមហ៊ុនហង្សមាសកាលពីរាត្រីថ្ងៃទី៦ខែមីនាឆ្នាំ២០២២ ដោយយកឈ្នះបេក្ខភាព៣រូបផ្សេងទៀតនៅវគ្គផ្ដាត់ព្រ័ត្រគឺពេជ្រ ម៉េងលី ,អ៊ឹម ថៃ និងឈាន ជាលឿយ ។នៅវគ្គចុងក្រោយនេះវិចិត្រ បានលើកយកបទចម្រៀងទៅប្រកួតដោយរូបគេបកស្រាយបទ”ដុកទ័រលុយ”,”ដើម្បីអ្វីទៅអូន” និងបទច្រៀងឆ្លងឆ្លើយជាមួយឆន សុវណ្ណារាជ”អារម្មណ៍ពេលខូចចិត្ត”ដោយទទួលបានការកោតសរសើរពីសំណាក់អ្នកទស្សនាផ្ទាល់ និងតាមគេហដ្ឋានថាអ្នកចម្រៀងដែលមកពីភូមិថ្នល់ជប៉ុន ឃុំរលាប ស្រុកសំពៅមាស ខេត្តពោធិសាត់រូបនេះមានសម្ថភាពមិនធម្មតាឡើយ រហូតធ្វើឲ្យលោកទទួលបានជ័យលាភីក្លាយទៅជាម្ចាស់ពានBeat The Best រដូវកាលដំបូងនេះតែម្ដងដោយផ្ដួលលោកឈាន ជាលឿយ នៅវគ្គបញ្ចប់។អារម្មណ៍របស់យុវវជនដែលរស់នៅជីវភាពក្រខ្សត់ម្នាក់នេះពិតជារំភើបគ្មានអ្វីអាចប្រៀបផ្ទឹមបានឡើយ ព្រោះថាក្ដីសុបិន ប្រែក្លាយទៅជាការពិតហើយរូបគេទទួលបានរង្វាន់នូវទឹកប្រាក់ចំនួន១៥០០០ដុល្លារ និងក្លាយទៅជាតារាហង្សមាសដែលមានកុងត្រា៥ឆ្នាំ។
សួ វិចិត្រ ធ្លាប់ប្រាប់អ្នកកាសែតថាលោកមានបងប្អូន៣នាក់(ស្រី២)ហើយលោកជាកូនច្បង ខណៈគ្រូសារលោកមានជីវភាពលំបាកណាស់ ហើយឪពុកម្ដាយទាស់គ្នាជាញឹកញាប់រហូតដល់ពួកគាត់ចែកផ្លូវគ្នា។លោកថាក្រោយចែកផ្លូវគ្នាម្ដាយលោកបានចេញទៅធ្វើការនៅថៃ និងបាត់សំណឹងសូន្យ ស្របពេលដែលឪពុកលោកខ្វះខាតមិនអាចចិញ្ចឹមកូនៗបានទើបលោកនិងប្អូនៗចេញទៅរស់នៅជាមួយលោកតាម្នាក់ទាំងដែលគាត់មិនជាប់សាច់ឈាម។លោកថាអំឡុងពេលស្នាក់នៅជាមួយលោកតាលោកធ្លាប់ធ្វើជាសន្ដិសុខយាមផ្ទះសំណាក់គេបានប្រាក់ខែ៦០ដុល្លារ និងដើរលេងភ្លេងដើម្បីរកប្រាក់ចិញ្ចឹមខ្លួន និងប្អូនៗ ។លោកបន្ថែមថាក្រោយលោកតាដែលលោកបានរស់នៅជាមួយទទូលមរណភាពទៅរូបគេនិងប្អូនៗតែលតោលជាថ្មី ហើយក៍ស្វែងរកម្ដាយរហូតទទួលបានដំណឹងថាគាត់មកពីថៃវិញ និងទៅធ្វើកម្មករសំណង់ និងលាងចានឲ្យគេនៅកំពង់សោមទើបលោកយកប្អូនទាំង២ឲ្យទៅនៅជាមួយ ហើយលោកបានវិលទៅពោធិសាត់វិញតស៊ូធ្វើការកំប៉ិកកំប៉ុក រហូតបានក្លាយទៅជាតារាចម្រៀងស្កាយបាមួយនៅពោធិសាត់ក្រោយពីលោកបានសាកសម្លេងហើយត្រូវថៅកែពេញចិត្ត។
តាមរយៈប្រវត្តិដ៍កម្សត់រស់នៅព្រាត់ប្រាស់ក្រុមគ្រួសារនេះសួ វិចិត្រ រំពឹងថាថ្ងៃណាមួយលោកនឹងមានវីវភាពល្អប្រសើរជាងនេះដើម្បីស្រោចស្រង់គ្រួសារ ដោយសារតែមុននេះមានស្ថានីយ៍ទូរទស្សន៍មួយចំនួនហៅច្រៀងហើយលោកថាជារៀងរាល់យប់គេងនឹងម្ដាយ និងប្អូនៗនៅកំពង់សោមជានិច្ច។ឥឡូវវិចិត្រ ក្លាយទៅជាម្ចាស់ពាន និងជាតារាហង្សមាស ហេតុនេះហើយកលោកនឹងអាចធ្វើឲ្យជីវភាពមានការផ្លាស់ប្ដូរបានល្អប្រសើរជាងនេះនិងរស់នៅជុំគ្នាវិញជាមិនខានព្រោះសម្ថភាពរបស់លោកអាចច្រៀងបទលោកឆាយ វីរៈយុទ្ធ បានល្អ និងមិនចាញ់ប៊ុត សីហា ម្ចាស់ពានThe Voice Cambodia រដូវកាលទី១ឡើយ។អ្វីដែលគូរឲ្យកត់សម្គាល់ថែមទៀតនោះវិចិត្រ ត្រូវបានមន្រ្ដីម្នាក់នៅខេត្តពោធិសាត់ឲ្យកាដូរថយន្ដPrius ១គ្រឿងដែលមានតម្លៃជាង១ម៉ឺនជាការលើកទឹកចិត្ដ ព្រមទាំងធ្វើពិធីដង្ហែរម្ចាស់ពានBeat The Best រូបនេះពេញទីរួមខេត្តពោធិសាត់ដើម្បីលើកមុខមាត់និងកិត្តិយសខេត្តថាមានតារាចម្រៀងម្នាក់ដែលប្រកួតឈ្នះយកពានបានដូចបំណង៕