ខេត្តបន្ទាយមានជ័យ ៖ មន្ត្រីគយ និងរដ្ឋាករតំបន់៥ បានឃាត់រថយន្តស៊េរីទំនើប ១គ្រឿង ម៉ាក Lexus RX-350 ដែលបើកបរដោយស្រីស្អាតម្នាក់ និងអ្នករួមដំណើរម្នាក់ ដោយសង្ស័យថា រថយន្តខាងលើ គ្មានពន្ធ និងពាក់ស្លាកលេខក្លែងក្លាយ។
ប្រតិបត្តិការខាងលើធ្វើឡើង កាលពីវេលាម៉ោង ២និង១០នាទីរសៀល ថ្ងៃទី១៣ ខែមីនា ឆ្នាំ២០២២ នៅចំណុចមុខផ្សារអគ្គថ្មី ស្ថិតក្នុងភូមិប៉ាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត។
មន្ត្រីគយនិងរដ្ឋាករតំបន់៥ ប្រចាំខេត្តបន្ទាយមានជ័យ បានឱ្យដឹងថា ដោយអនុវត្តតាមការណែនាំពីរាជរដ្ឋាភិបាលកម្ពុជា និងវិធានការពីអគ្គនាយកនៃអគ្គនាយកដ្ឋានគយនិងរដ្ឋាករកម្ពុជា ដើម្បីពង្រឹកការប្រមូលពន្ធជូនរដ្ឋ មន្ត្រីគយនិងរដ្ឋាករ ការិយាល័យ បានស្រាវជ្រាវ និងធ្វើការបង្ក្រាបអំពើរត់ពន្ធតំបន់៥ ប្រចាំខេត្ត ដោយបានធ្វើការស្រាវជ្រាវរហូតឃាត់រថយន្ត ១គ្រឿង ម៉ាក Lexus RX-350 ពណ៌ស ពាក់ស្លាកលេខ ភ្នំពេញ 2AP-1389 ដែលត្រូវសង្ស័យថា គ្មានពន្ធ និងពាក់ស្លាកលេខក្លែងក្លាយ។
មន្ត្រីគយនិងរដ្ឋាករ រូបនោះ បានបញ្ជាក់ថា ក្រោយឃាត់រថយន្ត ១គ្រឿងខាងលើ ដែលសង្ស័យគ្មានពន្ធ និងពាក់ស្លាកលេខក្លែងក្លាយ ហើយត្រូវបានមន្ត្រីគយនិងរដ្ឋាករតំបន់៥ យកទៅរក្សាទុកនៅការិយាល័យការិយាល័យស្រាវជ្រាវបង្ក្រាបអំពើរត់ពន្ធតំបន់៥ ប្រចាំខេត្តបន្ទាយមានជ័យ (ចំណុចស្ពានទឹកថ្លា) ដើម្បីឱ្យម្ចាស់យកឯកសាររថយន្តមកផ្ទៀងផ្ទាត់ ក្នុងករណីរថយន្តគ្មានពន្ធទេ នឹងឱ្យម្ចាស់រថយន្តទៅបង់ពន្ធតាមច្បាប់កំណត់។
មន្ត្រីគយនិងរដ្ឋាករតំបន់៥ បានបញ្ជាក់ថា មន្ត្រីគយនិងរដ្ឋាករតំបន់៥ នឹងបន្តអនុវត្តការងារបង្ក្រាបបទល្មើសរថយន្តគេចពន្ធ និងគ្មានពន្ធ ដូចភ្លៀងរលឹម ដើម្បីប្រមូលពន្ធជូនរដ្ឋ ហើយសុំឱ្យម្ចាស់រថយន្តដែលគ្មានពន្ធ និងមិនទាន់បានបង់ពន្ធជូនរដ្ឋ ត្រូវចូលមកបង់តាមច្បាប់កំណត់៕
