ភ្នំពេញ ៖ បុរសម្នាក់កំពុងបើករថយន្តទំនើប ១គ្រឿង ដឹកសង្សារត្រឡប់ទៅផ្ទះវិញ ក៏ស្រាប់តែមានបុរសម្នាក់ទៀត ដែលជាអ្នកស្គាល់ គ្នាបានទូរស័ព្ទណាត់ជួបទៅសួរនាំ និងដោះស្រាយគ្នាពីរឿងជម្លោះស្នេហាកាលពីពេលកន្លងមក ស្រាប់តែទៅដល់ ក៏ត្រូវភាគីជនបង្កហេតុ នាំបក្ខពួក និងប្រដាប់ដោយពូថៅ មកវាយនិងដេញកាប់ទាំងកំរោល បង្កឱ្យមានការភ្ញាក់ផ្អើលដល់ប្រជាពលរដ្ឋអ្នកដំណើរនិងសមត្ថកិច្ច ជួយអន្តរាគមន៍ ក៏ត្រូវភាគីបង្កហេតុនាំគ្នាឡើងជិះរថយន្ត គេចខ្លួនបាត់អស់។
ហេតុការណ៍នេះ បានកើតមានការភ្ញាក់ផ្អើលឡើង កាលពីវេលាម៉ោង ១០និង៤០នាទីយប់ ថ្ងៃទី១៥ ខែមីនា ឆ្នាំ២០២២ នៅត្រង់ចំណុចក្បែរផ្សារទំនើបខាលែនឌែនម៉ល តាមបណ្តោយផ្លូវ R1 ស្ថិតក្នុងសង្កាត់ស្រះចក ខណ្ឌដូនពេញ។
តាមប្រភពព័ត៌មានពីកន្លែងកើតហេតុ បានឱ្យដឹងថា នៅមុនពេលកើតហេតុ គេបានឃើញបុរសម្នាក់ បើករថយន្តទំនើប ១គ្រឿង ម៉ាកមែរសឺដេស ពណ៌ខ្មៅ ពាក់ស្លាកលេខ ភ្នំពេញ 2F-0102 ធ្វើដំណើរតាមបណ្តោយផ្លូវ R1 ធ្វើដំណើរក្នុងទិសដៅពីត្បូងទៅជើង លុះមកដល់ត្រង់ ចំណុចកើតហេតុ រថយន្តនោះក៏បានឈប់ចតនៅលើចិញ្ចើមផ្លូវ លុះបន្តិចក្រោយមកក៏ស្រាប់តែមានរថយន្តទំនើប ២គ្រឿងទៀត បានមកដល់ ដោយមួយគ្រឿងម៉ាក Ford Ranger ពណ៌ស ពាក់ស្លាកលេខ ភ្នំពេញ 2BD-1909 បើកបរដោយបុរសម្នាក់ និងរថយន្តមួយគ្រឿងទៀត ម៉ាកឡង់គ្រីសឺរ ពណ៌ស មិនចាំស្លាកលេខ បើកបរដោយបុរសម្នាក់ទៀត ដែលរថយន្តទាំងពីរគ្រឿងនោះ បានបើកទៅចតជិតនឹងរថយន្តមែរសឺដេស ខាងលើតែម្តង។
ប្រភពដដែល បន្តថា បន្ទាប់មក បុរសម្នាក់ជាអ្នកបើករថយន្ត Ford Ranger បានចុះទៅជួប និងឈរនិយាយគ្នាជាមួយបុរសជាអ្នកបើកបររថយន្តមែរសឺដេស ស្រាប់តែបុរសម្នាក់ផ្សេងទៀតដែលបើកបររថយន្តឡង់គ្រីសឺរនោះ ក៏បានចុះពីលើរថយន្តដែរ រួចក៏ដើរទៅវាយបុរសដែលជាអ្នកបើករថយន្តមែរសឺដេស ដោយមិនដឹងថា តើមានរឿងទំនាស់អ្វីហ្នឹងគ្នានោះទេ។ តែគ្រានោះ បុរសជាអ្នកបើកបររថយន្តមែរសឺដេស បានរត់គេចចេញយករួចខ្លួន ខណៈពេលនោះដែរ បុរសជាអ្នកបើករថយន្តឡង់គ្រីសឺរ ក៏បានយកពូថៅគប់ទៅលើបុរសជាអ្នកបើករថយន្តមែរសឺដេស ថែមទៀត តែគប់មិនត្រូវ។ បន្ទាប់មក បុរសជាអ្នកបើករថយន្ត Ford Ranger និងបុរសបើករថយន្តឡង់គ្រីសឺរ ក៏បាននាំគ្នាបើករថយន្តរត់គេចខ្លួនចេញពីកន្លែងកើតហេតុ ដោយបន្សល់ទុកតែពូថៅ១ ប៉ុណ្ណោះ។
ប្រភពដដែល បន្តទៀតថា ភ្លាមៗនោះ ក៏មានប្រជាពលរដ្ឋដែលឃើញហេតុការណ៍ បាននាំគ្នាជួយជិះដេញតាមពីក្រោយ និងបានរាយការណ៍ជូនសមត្ថកិច្ចឱ្យជួយអន្តរាគមន៍ផងដែរ ហើយខណៈពេលកំពុងបើកគេចខ្លួននោះ រថយន្តហ្វ័តរេនចឺរ បានបែកកង់ខាងក្រោយចំហៀងខាងឆ្វេង ប៉ុន្តែអ្នកបើកបរមិនព្រមឈប់នោះទេ គឺនៅតែបន្តបើករត់ធ្វើឱ្យបែកផ្កាភ្លើងពេញផ្លូវតែម្តង រហូតដាច់សំបកកង់អស់រលីង នៅសល់តែយ៉ាន់ មិនអាចបន្តដំណើរទៅមុខបាន ក៏ត្រូវបានសមត្ថកិច្ចធ្វើការឃាត់ខ្លួនជាប់ នៅត្រង់ចំណុចក្បែរបុរីភ្នំពេញថ្មី តាមបណ្តោយផ្លូវបេតុង ស្ថិតក្នុងសង្កាត់ក្រាំងធ្នង់ ខណ្ឌសែនសុខ។
ប្រភពដដែល បន្តទៀតថា ភ្លាមៗនោះ ខណៈពេលដែលអ្នកបើករថយន្ត Ford Ranger មិនអាចបើករត់គេចខ្លួនបាន ស្រាប់តែមានរថយន្តម៉ាកឡង់គ្រីសឺរ ពណ៌ស ពាក់ស្លាកលេខ ភ្នំពេញ 2BM-7001 បើកបរដោយបុរសម្នាក់ និងរួមដំណើរដោយស្ត្រីម្នាក់ បានមកធ្វើការរំដោះយកអ្នកបើករថយន្ត Ford Ranger ចេញពីកន្លែងកើតហេតុបាត់ស្រមោលតែម្តង បន្សល់ទុកតែរថយន្ត Ford Ranger ដែលបែកកង់ មិនអាចបន្តដំណើរបាន នៅនឹងកន្លែង។
តាមសម្តីបុរសជាអ្នកបើករថយន្តមែរសឺដេស ដែលសុំមិនបញ្ចេញឈ្មោះ បានប្រាប់ថា រវាងគាត់និងបុរសជាអ្នកបើកបររថយន្ត Ford Ranger គឺជាមនុស្សដែលធ្លាប់ស្គាល់គ្នា ហើយពួកគាត់ក៏មិនដែលមានរឿងឈ្លោះប្រកែកគុំកួនអ្វីនឹងគ្នាទេ តែពីមុនមក គឺធ្លាប់អន់ចិត្តនឹងគ្នាតិចតួច ដោយសាររឿងស្នេហា។ នៅមុនពេលកើតហេតុ គាត់បានបើករថយន្តដឹកសង្សាររបស់គាត់ នៅម្តុំចំណុចកើតហេតុ ខណៈពេលនោះ ស្រាប់តែមានបុរសជាអ្នកបើករថយន្ត Ford Ranger បានទូរស័ព្ទណាត់ជួបគ្នានៅត្រង់ចំណុចកើតហេតុ ដើម្បីនិយាយគ្នាពីរឿងដែលមាន បុរសម្នាក់បានស្រលាញ់សង្សាររបស់គាត់។ លុះដល់ចំណុចកើតហេតុ ពួកគាត់ក៏បានជួបជជែកគ្នា ខណៈពេលនោះក៏ស្រាប់តែមានបុរសម្នាក់ផ្សេងទៀតដែលគាត់មិនដែលធ្លាប់ស្គាល់នោះទេ បានបើករថយន្តឡង់គ្រីសឺរ មួយគ្រឿង មកឈប់ រួចក៏បានចុះមកវាយតប់លើរូបគាត់ តែវាយមិនត្រូវ ដោយសារគាត់គេចផុត ។
ជនរងគ្រោះ បន្តទៀតថា ពេលនោះបុរសជាអ្នកបើករថយន្តឡង់គ្រីសឺរ ក៏បានលូកយកពូថៅមួយ បម្រុងកាប់មកលើរូបគាត់ទៀត តែគាត់បានស្ទុះទៅឱបបុរសនោះជាប់ ដើម្បីកុំឱ្យបុរសនោះអាចកាប់គាត់បាន។ លុះមួយសន្ទុះក្រោយមក គាត់ក៏បានព្រលែងបុរសនោះ រួចរត់យករួចខ្លួនតែម្តង ហើយបុរសរូបនោះក៏បានគប់ពូថៅសំដៅមកលើរូបគាត់បន្ថែមទៀត តែគប់មិនត្រូវនោះទេ។ បន្ទាប់មក បុរសជាអ្នកបើករថយន្ត Ford Ranger និងបុរសជាអ្នកបើករថយន្តឡង់គ្រីសឺរ ក៏នាំគ្នាបើករថយន្តគេចខ្លួនចេញពីកន្លែងកើតហេតុបាត់ស្រមោលតែម្តង។
ក្រោយពេលកើតហេតុ ជនរងគ្រោះបានទៅធ្វើការដាក់ពាក្យបណ្តឹងនៅប៉ុស្តិ៍នគរបាលរដ្ឋបាលស្រះចក ដើម្បីឱ្យសមត្ថកិច្ចធ្វើការស្រាវជ្រាវ តាមចាប់ជនបង្កហេតុ យកមកផ្តន្ទាទោសទៅតាមផ្លូវច្បាប់។
ចំណែករថយន្ត Ford Ranger ត្រូវបានសមត្ថកិច្ចខណ្ឌសែនសុខ យកទៅរក្សាទុក ដើម្បីរង់ចាំចាត់ការទៅតាមនីតិវិធី៕
