ភ្នំពេញ៖លោកគង់ វិសាល ដែលជាអ្នកដឹកនាំកម្មវិធីប្រគុំតន្រ្ដីនៅប៉ុស្ដិ៍បាយ័ននិងមានបទពិសោធន៍រៀបចំConcerts ធំៗជាង២០ឆ្នាំមកហើយនោះបានឲ្យដឹងថានៅថ្ងៃទី៩ខែមេសាឆ្នាំ២០២២ មុនពិធីបុណ្យប្រពៃណីចូលឆ្នាំខ្មែរនាពេលខាងមុខនេះលោកនឹងអញ្ជើញកំពូលតារាចម្រៀងលោកព្រាប សុវត្ថិ ច្រៀងសម្ដែងនៅភោជនីយដ្ឋានThe Fun របស់លោកដែលមានទីតាំងនៅខណ្ឌសែនសុខ រាជធានីភ្នំពេញ ក្រោមការឧបត្ថម្ភដោយស្រាបៀរអង្គរដែលលោកជឿរថានឹងមានអតិថិជននិងអ្នកគាំទ្រលោកសុវត្ថិ ជាច្រើនទៅទៅញាំអាហារនិងទស្សនាដោយផ្ទាល់យ៉ាងច្រើនកុះកមិនខាន។លោកវិសាល ដែលមានភាគហ៊ុនមួយផ្នែកនៅThe Fun ថាលោកព្រាប សុវត្ថិ នឹងច្រៀងពី៥ទៅ៦បទសម្រាប់កម្មវិធីពិសេសនោះ តែលោកសុំមិននិយាយពីតម្លៃខ្លួនតារាGalaxy រូបនេះទេ ដោយគ្រាន់តែបង្ហើបថាលោកសុវត្ថិ តែងតែមានតម្លៃខ្លួននាំមុខគេជានិច្ចគឺសាកសមទៅនិងកេរ្ដិ៍ឈ្មោះរបស់លោក។
អ្នកដឹកនាំកម្មវិធីសិល្បៈល្បីឈ្មោះរូបនេះថាចំពោះមូលហេតុដែលលោកជ្រើសយកកំពូលតារាចម្រៀងព្រាប សុវត្ថិ ច្រៀងនៅហាងលោកក្នុងកម្មវិធីតន្រ្ដីAngkor Music Night នោះដោយសារតែលោកសុវត្ថិ នៅតែជាSuper Star របស់មហាជនដែលគ្រប់គ្នាទទួលស្គាល់ ព្រោះតាំងពីលោកចាប់អាជីពចម្រៀងរយៈពេលជាង២០ឆ្នាំមកនេះមិនទាន់មានតារារូបណាផ្ដួលលោកបានឡើយ។អ្នកដឹកនាំសិល្បៈនៅបាយ័នដ៍មានប្រជាប្រិយភាព រូបនេះរំលឹកអនុស្សាវរីយ៍ជាមួយលោកសុវត្ថិ ថាលោកបានស្គាល់អតីតតារាចម្រៀងហង្សមាសរូបនេះតាំងពីមុនលោកក្លាយជាតារាចម្រៀងល្បីឈ្មោះម្លេះព្រោះកាលពីឆ្នាំ៩៤ ,៩៥ លោករៀននៅវិទ្យាល័យឥទ្រ្ទទេវីជាមួយគ្នាតែលោកសុវត្ថិ រៀនខ្ពស់ជាងលោកមួយថ្នាក់ដែលពេលនោះលោក ក៍មិនទាន់មានភរិយាដែរ។
អ្នកដឹកនាំប្រគុំតន្រ្ដីលេចធ្លោរូបនេះបញ្ជាក់ដែរថាព្រាប សុវត្ថិ ជាកំពូលតារាចម្រៀងដែលមានសុជីវធ័មល្អ រាក់ទាក់(friendly)ដែលគ្រប់គ្នាស្រលាញ់និងចូលចិត្តស្ដាប់បទចម្រៀងគាត់ ។លោកវិសាល ក៍បានថ្លែងអំណរគុណដល់ភរិយាលោកព្រាប សុវត្ថិ គឺអ្នកស្រីឡុង ស្រីមុំ ហៅម៉ីម៉ី ផងដែរដែលផ្ដល់ការរាប់អានជាមួយលោកជាច្រើនឆ្នាំមកដល់ពេលនេះហើយតែងតែមានតម្លៃពិសេសរបស់ព្រាប សុវត្ថិ ពេលធ្វើការជាមួយលោក ខណៈដែលលោកសុវត្ថិ ជាតារាដែលធ្វើការនិងរាប់អានជាមួយលោកដោយបេះដូង។អ្នកដឹកនាំប្រគុំតន្រ្ដីរូបសង្ហាររូបនេះបន្ថែមទៀតថាក្រៅពីបានធ្វើការងារសិល្បៈជាមួយលោកសុវត្ថិ រយៈពេលជាង២០ឆ្នាំកន្លងមកនេះ នាពេលខាងមុខនេះលោកក៍ត្រៀមនឹងធ្វើការងារថ្មីជាមួយកូនៗប្រុសរបស់កំពូលតារាចម្រៀងរូបនេះផងដែរ។
ថ្វីត្បិតតែលោកគង់ វិសាល មិនបញ្ជាក់ពីតម្លៃខ្លួនលោកព្រាប សុវត្ថិ ច្រៀង៦បទស៊ីថ្លៃប៉ុន្មានក៍ដោយ តែតាមព័តមានថាលោកសុវត្ថិ នៅតែជាតារាដែលមានតម្លៃខ្លួនខ្ពស់ជាងតារាទាំងឡាយដដែលគិតត្រឹមឆ្នាំ២០២២ នេះ។លោកវិសាល រំពឹងថាបន្ទាប់ពីលោកព្រាប សុវត្ថិ ទៅអង្រួនឆាកតន្រ្ដីThe Fun រួចហើយនឹងធ្វើឲ្យគេស្គាល់និងគាំទ្រហាងរបស់លោកកាន់តែច្រើនថែមទៀតជាមិនខាន៕