ភ្នំពេញ៖តារាចម្រៀងគង់ ស្រីពេជ្រ ហៅពេជ្រ សូលីកា ធ្លាប់បង្ហើបថានាងចង់រៀបការកាលពីឆ្នាំ២០២១ តែដោយសារតែកូវីដផ្ទុះពេកទើបធ្វើឲ្យគម្រោងធ្វើកូនក្រមុំត្រូវលុបចោលជាបន្ទាន់ទៅវិញ។ចំណែកកាលពីដើមខែមេសាឆ្នាំ២០២១ វិញស្រីពេជ្រ បង្ហាញសញ្ញាពពោះកូនទី២ជាកូនស្រី ស្រាប់តែពេលនេះទាំងមង្គលការនិងការយកកូនថែមត្រូវបានអ្នកចម្រៀងហង្សមាសរូបនេះផ្អឹបចោលទាំងពីរព្រមគ្នាតែម្ដង។
យ៉ាងណាការពន្យាពេលរៀបការ និងការពពោះកូនស្រីនេះមិនជះឥទ្ធិពលដល់សុភមង្គលរវាងរូបនាងនិងស្វាមីនោះទេ តែផ្ទុយទៅវិញអំឡុងពេលនេះសូលីកា បែជាសន្សំទ្រព្យបានកាន់តែច្រើនថែមទៀតក្នុងនោះដូចជានៅឆ្នាំ២០២១ នាងបានទិញផ្ទះវីឡារឃ្វីនតម្លៃជាង៣០ម៉ឺនដុល្លារ និងបន្ទប់ខុនដូ១តម្លៃជាង១០ម៉ឺនដុល្លារ ស្របពេលដែលសព្វថ្ងៃអតីតតារាម្រៀងនៅភោជនីយដ្ឋានបុប្ផាជាយដែនរូបនេះជិះរថយន្ដទំនើបៗដល់ទៅ៣គ្រឿងឆ្លាស់គ្នាមានដូចជាPorsche ,BMW និងRange Rover ។ការមានទ្រព្យសរុបចូលខ្ទង់លានដុល្លាររបស់សូលីកា នាពេលនេះក្រោយពីនាងបានក្លាយទៅជាភរិយាលោកគឹម ហាន ដែលជាអ្នកឌីហ្សាញម៉ូដសម្លៀកបំពាក់មកពីអូស្រា្ដលី ហើយពេលនេះចំណងស្នេហានាងកាន់តែរឹងមាំនិងគ្មានឧបស័ក្កឡើយបន្ទាប់ពីនាងស្ងាត់ជម្លោះស្នេហាត្រីកោណជាមួយអតីតសង្សារប្ដីគឺនាងថៃ នារីសុជាតា ។
សូមបញ្ជាក់ថាពេជ្រ សូលីកា ក៍មិនខុសពីឱក សុគន្ធកញ្ញា និងសួស វីសា ដែរពោលគឺអាជីពចម្រៀងមិនសូវមានភាពលេចធ្លោរនោះទេក្រោយពីមានប្ដីនិងកូន១ដូចគ្នានេះ។អ្វីដែលសូលីកា នៅតែហូទឹកនេត្រាជារៀងរាល់រាត្រីនៅពេលដែលនាងមានអ្វីៗស្ទើគ្រប់យ៉ាងក្នុងដៃនេះគឺម្ដាយជាទីស្រលាញ់របស់នាងអ្នកស្រីស៊ិន ស្រីនាង ត្រូវតុលាការប្រកាសសាលក្រមកាលពីថ្ងៃទី២៥ខែសីហាឆ្នាំ២០២១ ដោយផ្តន្ទាទោសដាក់ពន្ធនាគាររយៈពេល១២ឆ្នាំ ពីបទឃាតកម្មតាមមាត្រាទី១៩៩ នៃក្រមព្រហ្មទណ្ឌ បន្ទាប់ពីម្ដាយនាងត្រូវបានសម្ថកិច្ចចាប់ខ្លួនកាលពីថ្ងៃទី១១ខែមករាឆ្នាំ២០២០ ពាក់ព័ន្ធករណីឃាតកម្មលើគូស្នេហាភេទដូចគ្នាអ្នកស្រីងិន សុខលី ។យ៉ាងណាសូលីកា មានសង្ឃឹមបានជួបម្ដាយវិញនៅឆ្នាំ២០៣២ ដែលពេលនោះកូនប្រុសនាងឈ្មោះហង្ស អ៊ារីវេស្ដេ នឹងមានអាយុជាង១៣ឆ្នាំ៕