រយៈពេលជាង២ឆ្នាំមកហើយដែលស្រីស្អាតជុំ រចនាពេជ្រ ហៅបេប៊ី បាត់មុខពីឆាកតន្រ្ដីទាំងឡាយទាំងស្រុងតែម្ដងដែលការដកថយពីរាំច្រៀងរបស់តារាសាច់ដូចបណ្ដូលចេករូបនេះបង្កឲ្យមានការសង្ស័យជាច្រើនដូចជាអ្នកខ្លះថានាងមានបញ្ហារជាមួយថោន និងខ្លះទៀតថាស្រីស្រស់អាចត្រូវគូស្នេហ៍ហាមមិនឲ្យលេងសិល្បៈទៀតជាដើម។ប៉ុន្ដែក្នុងជំនួបកាលពីដើមខែមករា បេប៊ី នៅតែអះអាងថាដាច់ខាតនាងមិនអាចបញ្ឈប់អាជីពដែលនាងស្រលាញ់បំផុតនេះនៅត្រឹមហ្នឹងបានឡើយ។អតីតពិធីការិនីCTN រូបនេះថានាងនឹងវិលវិញនៅពេលវេលាដែលសមស្របមួយនាពេលខាងមុខនេះ ហើយជុំវិញការបាត់ខ្លួនមួយរយៈធំរបស់នាងនេះដោយសារតែហេតុផល២យ៉ាងគឺទី១៖នាងរងចាំឲ្យកូវីដ ស្ងាត់ជាងនេះសិន និងទី២៖នាងជាប់មុខជំនួញបើកហាងកាហ្វេ ដល់ទៅ៤ទីតាំងផ្សេងគ្នា។រចនាពេជ្រ បញ្ជាក់ថានាងគ្មានគូស្នេហ៍ហួងហែង ឬហាមឃាត់នាងមិនឲ្យលេងសិល្បៈនោះទេ។
ទោះជាបេប៊ី ថានឹងត្រូវតែវិលវិញមែន តែនៅមុនចូលឆ្នាំខ្មែរដែលតារាមួយចំនួននៅថោន ចេញបទប្រពៃណីស្វាគមន៍ឆ្នាំថ្មីនេះបេប៊ី បែជាគ្មានបទថ្មីៗដូចគេវាយលុកទីផ្សារឡើយ ទើបធ្វើឲ្យនាងកាន់តែពិបាកប្រឈមក្នុងការស្ដារទីផ្សារសិល្បៈឡើងវិញ។បេប៊ី ធ្លាប់វាចាដោយទទួលស្គាល់ថាការបាត់មុខច្រើនខែពេកគឺនឹងធ្វើឲ្យពិបាកប្រជែងទីផ្សារចម្រៀងមែន ហេតុនេះហើយនាងបានត្រៀមខ្លួនរួចជាស្រេចថាពេលចេញមុខម្ដងទៀតគឺមានតែរកអ្វីដែលថ្មីនិងប្លែកបំផុតទើបអាចដណ្ដើមភាពលេចធ្លោសារជាថ្មីបាន។
ក្រៅពីក្លាយទៅជាថៅកែហាងកាហ្វេដល់ទៅ៤ទីតាំងផ្សេងគ្នានោះបេប៊ី ក៍បានសង់ផ្ទះវីឡារតម្លៃដល់ទៅជាង៣០ម៉ឺនដុល្លារ នៅខណ្ឌសែនសុខផងដែរ ដែលប្រភពនៃប្រាក់ចំណាយនោះត្រូវបានអ្នកស្រីប៊ុន ណារី ម្ដាយរបស់បេប៊ី ប្រាប់ថាបានមកពីលក់ផ្ទះចាស់នៅមុខពោចិនតុង និងដីធ្លីមួយចំនួនទៀតគឺគ្មានអ្នកណាទំនុកបម្រុងកូនស្រីសំណព្វចិត្តរបស់គាត់ឡើយ។មិនមែនមានតែបេប៊ី ម្នាក់នោះទេដែលបង្កើតមុខរបរបើកហាងកាហ្វេក្រៅសិល្បៈនោះតែនៅឆ្នាំ២០២២ នេះគេឃើញឌួង ហ្សូរីដា,មាស សុខសោភា,មាន សូនីតា ,Dj ហេរ៉ូ និងលោកសាយ រតនៈ ជាដើមសុទ្ធតែក្លាយទៅជាថៅកែហាងកាហ្វេដូចគ្នា។សម្រាប់បេប៊ី វិញនាងថាគ្រោងសម្ពោធហាងកាហ្វេសាខាទី៤របស់នាងដែលមានទីតាំងនៅខាងក្រោយសាលាទួលគោកនាពេលខាងមុខនេះមុនឡើងឆាកវិញ៕