ភ្នំពេញ៖ព្រាប សុវត្ថិ បានដើរចេញពីហង្សមាសទៅGalaxy រយៈពេលជាង១ឆ្នាំទៅហើយដែលធ្វើឲ្យអ្នកគាំទ្រកំពូលតារាចម្រៀងរូបនេះភាគច្រើននៅតែយល់ថាបទចម្រៀងលោកសុវត្ថិ មិនសូវមានគុណភាពដូចនៅផលិតចាស់ ហើយតាមបណ្ដារកម្មវិធីទាំងឡាយគេច្រើនតែលើកយកបទលោកស្នាយ នៅហង្សមាសទៅច្រៀងជាងនៅផលិតកម្មថ្មី។ភាពប្រែប្រួលទីផ្សារចម្រៀងរបស់លោកសុវត្ថិ បែបនេះធ្វើឲ្យFan របស់លោកមានការបារម្ភថាខ្លាចតែលោកស្នាយ មិនអាចរក្សារតំណែងនាំមុខគេបានតទៅទៀត ខណៈដែលថ្មីៗនេះតារាចម្រៀងខែម ប៊ុនថៃ បានប្រកាសថាលោកច្រៀងតែ៦បទបានតម្លៃខ្លួនដល់ទៅ១ម៉ឺនដុល្លារ ហើយនាងតន់ ច័ន្ទសីម៉ា ត្រូវផលិតកម្មកំណត់តម្លៃច្រៀងConcerts ធំម្ដង៥ពាន់ដុល្លារ ទើបធ្វើឲ្យមានការលើកជាសំណួរថាតើលោកព្រាប សុវត្ថិ ដែលធ្លាប់តែមានកេរ្ដិ៍ឈ្មោះនិងតម្លៃខ្លួននាំមុខគេនោះ ពេលនេះលោកនៅតែឈនៅខ្ពស់ជាងគេតទៅទៀតឬមួយក៍ត្រូវបានគេផ្ដួលទៅហើយ?
លោកគង់ វិសាល អ្នកដឹកនាំកម្មវិធីប្រគុំតន្រ្ដីរបស់ប៉ុស្ដិ៍បាយ័នបានប្រាប់កាលពេលថ្មីៗនេះថា រយៈពេលជាង២០ឆ្នាំមកនេះលោកព្រាប សុវត្ថិ នៅតែមិនទាន់មានតារាណាអាចផ្ដួលលោកបានទេទាំងកេរ្ដិ៍ឈ្មោះនិងតម្លៃខ្លួន។លោកអះអាងថាអតីតតារាហង្សមាសរូបនេះធ្វើការដោយបេះដូង និងមានភាពរាក់ទាក់(Friendly ) ជាមួយមហាជន ហេតុនេះហើយមានអ្នកគាំទ្រនិងស្រលាញ់លោកច្រើនណាស់។
ទោះជាអតីតសង្សារពេជ្រ សិរីរ័ត្ន លើកឡើងបែបននេះក្ដី ប៉ុន្ដែលោកមិនប្រាប់ឡើយថាពេលដែលលោកហៅលោកព្រាប សុវត្ថិ ទៅច្រៀងម្ដងៗនោះថាតម្លៃខ្លួនរបស់តារាGalaxy រូបនេះស៊ីថ្លៃប៉ុន្មាននោះទេ ដោយគ្រាន់តែថាគ្មានតារាណាថ្លៃជាងលោកស្នាយ នោះទេ។ដោយ ឡែកលោកស៊ិន សិលា អ្នកដឹកនាំកម្មវិធីប្រគុំតន្រ្ដីរបស់ទូរទស្សន៍Ctn ធ្លាប់អះអាងថាតាមលោកធ្លាប់ទាក់ទងគឺតារានាំមុខគេរបស់Galaxy គឺពិតជាច្រៀង១កម្មវិធីស៊ីថ្លៃ៥ពាន់ដុល្លារមែន សម្រាប់Concerts នៅខេត្ត។ចំណែកអ្នកជំនាញសិល្បៈលោកនូ ស៊ឹប វិញធ្លាប់ប្រាប់ថាការប្ដូរផលិតកម្មច្រៀងរបស់ព្រាប សុវត្ថិ ពីហង្សមាសទៅGalaxy នោះមិនធ្វើឲ្យលោកស្នាយ ធ្លាក់ចុះទេ តែតាមការយល់ឃើញរបស់លោកគឺលោកសុវត្ថិ មើលឃើញថាទៅហ្នុង(Galaxy)មានអនាគតល្អជាងទើបប្ដូរផលិតកម្មច្រៀង។អតីតតារាចម្រៀងហង្សមាសរូបនេះសង្កត់ថាមិនអាចកំណត់ពីពេលវេលាថាតារា១ល្បីដល់អាយុប៉ុន្មានបានទេព្រោះដូចជាករណីលោកព្រាប សុវត្ថិ អីចឹងគឺអាស្រ័យនៅលើស្ថានភាពសុខភាពបើគ្មានជំងឺទេនឹងល្បីបានជាច្រើនឆ្នាំទៀត។
ទោះជាអ្នកជំនាញសិល្បៈខាងលើនៅតែថាព្រាប សុវត្ថិ មិនទាន់ធ្លាក់ចុះ ឬគ្មានអ្នកផ្ដួលបានក្ដី ប៉ុន្ដែគេសង្កេតឃើញថាតារាវយ៤៧ឆ្នាំលោកសុវត្ថិ ប្រឈមរលកក្រោយច្រានរលកមុនដដែល បើសិនជាលោកគ្មានអ្វីថ្មីៗមកបង្ហាញទេ ព្រោះទោះជាលោកសុវត្ថិ មានសម្ថភាពខ្លាំងយ៉ាងណាតែបើគ្មានបទចេញមកល្បីៗដូចនៅហង្សមាសទេ លោកច្បាស់ជាពិបាកទប់ទល់គូប្រជែងជាមិនខាន។
អ្នកជំនាញធ្វើភ្លេង(Composer)នៅហង្សមាសម្នាក់ដែលស្នើរសុំមិនឲ្យដាក់ឈ្មោះនោះថាក្រោយព្រាប សុវត្ថិ ចេញពីហង្សមាសតារាចម្រៀងដែលអាចជំនួសលោកបានគឺខេមរៈ សិរីមន្ដ ដែលថៅកែឲ្យចាប់ដៃជាមួយឱក សុគន្ធកញ្ញា ។លោកគ្រូភ្លេងរូបនោះថាខេមរៈ សិរីមន្ដ ជំនួសព្រាប សុវត្ថិ បានតែនៅហង្សមាសទេ តែបើលក្ខណៈទូទៅគឺមិនទាន់អាចយកតំណែងព្រាប សុវត្ថិ បាននៅឡើយ។
ព្រាប សុវត្ថិ មិនទាន់មានបទចម្រៀងមួយបទណាសម្រាប់ពិធីបុណ្យចូលឆ្នាំខ្មែរនេះដែលទំនងជាផ្ទុះនោះទេ តែថ្មីៗនេះលោកនិងភរិយាអ្នកស្រីឡុង ស្រីមុំ និងកូនប្រុសទាំង៣សុវត្ថិ មុនីវណ្ណ,សុវតិ្ថ មុនីនាគ និងសុវត្ថិ សិរីវុឌ្ឍ បានងាកទៅពង្រីកមុខជំនួញបន្ថែមតាមរយៈការបើកក្រុមហ៊ុនថ្មីមួយ។ប៉ុន្ដែអ្វីដែលគូរឲ្យមានចម្ងល់នោះថាព្រាប សុវត្ថិ ត្រូវបានមនុស្សជំនិតទម្លាយរឿងទ្រព្យសម្បត្តិរបស់លោកកាលពីខែកញ្ញាឆ្នាំ២០២០ ថាតារាវ័យ៤៧ឆ្នាំរូបនេះច្រៀងជាង២០ឆ្នាំសល់លុយ៣០លានដុល្លារឯណ្ណោះ តែលោកសុវត្ថិ បែជាមិនប្រញ៉ាប់ក្នុងការឡើងធ្វើជាឧកញ៉ានោះទេ ខណៈដែលគិតត្រឹមឆ្នាំ២០២២ នេះមានតារា៣ដួងមកហើយដែលឡើងជាឧកញ៉ាមុនលោកសុត្ថិ ក្នុងនោះគឺលោកទុំ សារុត ហៅនាយឃ្លោគ ,លាន អាហ្រ្វីលគីនីន និងខែម ប៊ុនថៃ ៕