ភ្នំពេញ៖ពិតជាកូនប្រកបដោយកតញ្ញូចំពោះអ្នកមានគុណមែនដែលនៅកៀកថ្ងៃបុណ្យប្រពៃណីចូលឆ្នាំខ្មែរនេះតារាសម្ដែងមុន្នី ម៉ូនីតា បានធ្វើបុណ្យចម្រើនព្រះជន្មជូនចំពោះឪពុករបស់នាងលោកឡេង សុជន និងម្ដាយនាងអ្នកស្រីអ៊ិត សីហណា ដែលពួកគាត់ឈានចូលវ័យ៥៥ និង៥៦ឆ្នាំ ហើយពិធីនេះធ្វើនៅផ្ទះរបស់នាងនៅបុរីអ័រគីដេផ្លូវជាតិ៦A សង្កាត់ជ្រោយចង្វារ ខណ្ឌព្រែកលាភ ក្រុងភ្នំពេញ។អតីតMiss Grand Cambodia 2017 រូបនេះបានឲ្យដឹងថាចំពោះមូលហេតុដែលនាងត្រូវធ្វើបុណ្យចម្រើនព្រះជន្មជូនព្រះរស់(ឪពុកម្ដាយ)នៅពេលនេះគឺដោយសារតែរយៈពេលចុងក្រោយនេះប៉ាម៉ាក់នាងមានសុខភាពមិនសូវល្អ ហេតុនេះហើយទើបធ្វើពិធីលើករាសីជូនពួកគាត់ហើយនេះក៍ជាក្ដីប្រាថ្នាមួយរបស់នាងផងដែរ ដែលចង់ធ្វើពិធីនេះជូនលោកទាំងពីរទើបនៅព្រឹកថ្ងៃទី៩ខែមេសាឆ្នាំ២០២២ នាងបានរៀបចំកម្មវិធីនេះមានដូចជាបុស្បុក,ស្រង់ព្រះ ,សូត្រមន្ដុំក្រុងពាលី និងពិធីខមាលទោសអ្នកមានគុណជាដើម។តារាសម្ដែងរូបសម្រស់ស្រស់សោភា រូបនេះក៍បានឲ្យដឹងថាដោយសារតែកម្មវិធីរបស់នាងជាលក្ខណៈគ្រូសារ ហេតុនេះហើយនាងមិនបានអញ្ជើញមិត្តរួមអាជីពច្រើននោះទេ គឺហៅតែអ្នកជិតដិត ប៉ុន្មាននាក់ប៉ុណ្ណោះ ហើយអ្វីដែលនាងរីករាយគឺបានសម្រេចបំណងក្នុងការធ្វើបុណ្យជូនឪពុកម្ដាយដូចក្ដីប្រាថ្នាហើយ។
ទាក់ទងអាជីពសិល្បៈវិញកញ្ញាមុន្នី ម៉ូនីតា បានឲ្យដឹងថាថ្មីៗនេះនាងទើបថតបញ្ចប់ភាពយន្ដឲ្យទូរទស្សន៍Pnn រឿង”រសជាតិអ្នកមាន”វគ្គ៣ របស់អ្នកស្រីពាន់ ភួងបុប្ផា ហើយនាងទទួលបានបទពិសោធន៍ច្រើនពីអ្នកដឹកនាំរឿងល្បីល្បាញឈ្មោះរូបនេះ ខណៈដែលផ្ទៃរឿងឆ្លុះបញ្ចាំងនិងផ្ដល់ការអប់រំទៅលើមនុស្សស្រីឲ្យមានភាពរឹងមាំ និងក្លាហាន។ម៉ូនីតា ថាក្រោយចូលឆ្នាំខ្មែររួចនាងនឹងដកឃ្លាបន្ដិចពីការថតសម្ដែងសិល្បៈ តែមិនមែនឈប់ពីអាជីពមួយនេះទេ ដោយនាងងាកទៅរកស៊ីផ្នែកអចលនទ្រព្យជាមួយឪពុក ខណៈដែលពេលនេះនាងក៍បានតំណើរការរកស៊ីផ្នែកCosmetics ផងដែរ។តារាដែលមានដើមកំណើតមកពីខេត្តកំពង់ចាមរូបនេះបានឲ្យដឹងដែរថានាងជាកូនពៅក្នុងគ្រួសារដែលមានបងប្អូន៤នាក់(ប្រុស៣)ហើយមានតែនាងម្នាក់ទេ ដែលឈានចូលប្រឡូកសិល្បៈ ខណៈដែលពីដំបូងប៉ារបស់នាងដែលជាអតីតទាហានក៍មិនសូវពេញចិត្តនាងប្រឡូកវិស័យនេះដែរ ប៉ុន្ដែពេលនាងពេញវ័យទើបគាត់លែងប្រឆាំងហើយមានតែលើទឹកចិត្តនិងជម្រុញបន្ថែម។ម៉ូនីតា បន្ថែមទៀតថារយៈពេលជាង៥ឆ្នាំនៃការដើរលើវិថីសិល្បៈនេះនាងបានថតភាយន្ដដូចជារឿង”និស្ស័យខ្លុយស្នេហ៍”,”បេសកម្ម៤មុខព្រួញ” និងរឿង”ជើងកប”ជាដើម។
នៅពេលសាកសួររឿងថាតើពេលណាទើបម៉ូនីតា ចង់រៀបការប្ដីនោះនាងថាមិនអាចកំណត់បានថាថ្ងៃខែឆ្នាំណាទើបត្រូវយកគ្រួសារនោះទេ។ប៉ុន្ដែនាងបង្ហើបថាចង់ប្រើជីវិតលីវឲ្យបានច្រើនឆ្នាំ ហើយមិត្តភក្ដិក្នុងសិល្បៈនាងស្រលាញ់ដូចបងប្អូន តែរឿងគូស្រករនៅពេលអនាគតនាងចង់ជ្រើសយកអ្នកនៅក្រៅរង្វង់សិល្បៈវិញ៕