ភ្នំពេញ៖មុនផ្ទុះកូវីដមាស សុខសោភា តែងតែចេញទៅរកលុយនៅក្រៅស្រុកយ៉ាងហោចណាស់១ឆ្នាំម្ដងដែរ ដែលភាគច្រើននាងចេញទៅច្រៀងសម្ដែងនៅកាណាដាទឹកដីខាងស្វាមីទើបបង្ហួសទៅប្រទេសជិតខាង រហូតមានឆ្នាំខ្លះនាងបាត់មុខពីក្នុងស្រុកជិត២ឆ្នាំក៍មានដែរ។ប៉ុន្ដែតាំងពីចូលរាម រយៈពេលជាង១ឆ្នាំនេះសុខសោភា មិនទាន់ចេញទៅច្រៀងសម្ដែងនៅក្រៅស្រុកដូចមុនទៀតឡើយ ខណៈដែលតំណើរកម្សាន្ដជាលក្ខណៈឯកជនជាមួយប្ដីនៅប៉ែកអ៊ឺរ៉ុបដើម្បីរឹតចំណងស្នេហាឲ្យកាន់តែរឹងមាំថែមទៀតនោះក៍គ្មានដូចមុនទៀតដែរ ព្រោះថាពេលនេះនាងបង្កើតមុខរបរផ្ទាល់ខ្លួនក្លាយទៅជាថៅកែស្រីហាងដល់ទៅ២ផ្សេងគ្នានិងកំពុងរកស៊ីធំជាមួយថៅកែរាម ផ្នែកអចលនទ្រព្យទៀតទើបធ្វើឲ្យសោភា មិនសូវចាប់អារម្មណ៍ក្នុងការចេញទៅច្រៀងសម្ដែងនៅក្រៅប្រទេសទៀតឡើយ។ប៉ុន្ដែអំឡុងពេលដែលសោភា មិនទាន់ចេញទៅច្រៀងសម្ដែងក្រៅស្រុកដូចមុននេះតារាលំដាប់ជូរមុខផ្សេងៗទៀតដូចជាឱក សុគន្ធកញ្ញា,ពេជ្រ សោភា ,សុគន្ធ និសា និងសួស វីសា ជាដើម ក៍សម្ងំកើបលុយនៅក្នុងស្រុកដែរ ដែលការមិនទាន់ចង់ចេញទៅបរទេសនេះគឺដោយសារតែពួកគេសម្អាងថាកូវីដមិនទាន់ស្ងាត់ទាំងស្រុង និងមិនចង់ឃ្លាតឆ្ងាយពីក្រុមគ្រួសារ។
ចំពោះមាស សុខសោភា វិញធ្លាប់មានព័តមានថានាងចង់ទៅរស់នៅប្រទេសកាណាដាដែលជាទឹកដីខាងប្ដីម្ដងទៅហើយ ប៉ុន្ដែក្រោយមកនាងបានផ្លាស់ប្ដូរជំហនេះវិញ ព្រោះថាសកម្មភាពសិល្បៈរបស់នាងនៅក្នុងស្រុកនៅតែមានការគាំទ្រ ទើបនាងមិនដាច់ចិត្តបោះបង់អាជីពចាស់។អ្វីដែលគូរឲ្យកត់សម្គាល់សោភា ធ្វើឲ្យគូស្នេហ៍របស់នាងលោកអ៊ឹត រ៉ាដា ដែលមានជំនាញជាគ្រូពេទ្យនោះបានតាមនាងមករស់នៅស្រុកខ្មែរដោយបោះបង់អាជីពចាស់បន្ទាប់ពីអ្នកទាំងពីរបានរៀបការជាមួយគ្នាបែបលាក់លៀមកាលពីថ្ងៃទី២៨ខែធ្នូឆ្នាំ២០០៩ ។តារារួមអាជីពបានបង្ហើបឲ្យដឹងថាសម្រាប់ទីផ្សារនៅក្រៅស្រុកមាស សុខសោភា មានការគាំទ្រច្រើនជាងឱក សុគន្ធកញ្ញា ដាច់ ព្រោះនាងអាចច្រៀងបទចម្រៀងពីដើមៗបានពិរោះ ហេតុនេះហើយម្ចាស់Sponsors រូបណាក៍ពេញចិត្តនាងដែរ រហូតពួកគេយល់ព្រមល័ក្ខខណ្ឌរបស់សោភា តាមរយៈការច្រៀងសម្ដែងបានប្រាក់ចំណូលប៉ុន្មានចែកគ្នាជា២ទៀតផង ហេតុនេះហើយគេជឿរថានៅពេលដែលស្ថានភាពកូវីដ កាន់តែថមថយ សោភា នឹងនៅតែមិនចោលទីផ្សាររកលុយក្រៅស្រុកនោះទេ បើទោះជាពេលនេះនាងមានមុខជំនួញផ្ទាល់ខ្លួន និងកាន់តែលូកដៃជ្រៅក្នុងការរកស៊ីធំជាមួយថៅកែរាម ក្ដី។
មាស សុខសោភា ស្ថិតក្នុងចំណោមតារាដែលយកប្ដីបុរសខ្មែរកាណាដាមានដូចជាអ្នកនាងសៀម ស្រីណុច ,រស់ ម៉ូនីកា និងម៉ុក អានីត ជាដើម ខណៈដែលអ្នកនាងឡាយ លក្ខិណា វិញមានដំណឹងថាកំពុងតែពិសោធន៍ស្នេហ៍ជាមួយបុរសម្នាក់នៅទីនោះ។អ្វីដែលគូរឲ្យកត់សម្គាល់ក្រោយសោភា ចាប់ដៃជាមួយលោករ៉ាដា រយៈពេល១៥ឆ្នាំមកនេះនាងតែងតែចេញមុខសរសើរស្វាមីរៀងរាល់ការប្រារពខួបស្នេហ៍ដោយថាលោករ៉ាដា ហ៊ានលះបង់អ្វីៗគ្រប់បែបយ៉ាងទាំងអស់ដើម្បីនាង។ការមានមោទនភាពក្នុងការយកប្ដីត្រូវនេះធ្វើឲ្យសុខសោភា មិនដែលចាប់អារម្មណ៍ទៅលើបុរសណាផ្សេងឡើយតាំងពីមុនពួកគេរៀបការម្លេះ ព្រោះតាមព័តមានថាតារារាម រូបនេះមានជម្រើសស្នេហ៍ច្រើន តែនាងបែជាពេញចិត្តនិងព្រមប្រគល់បេះដូងទៅឲ្យលោកគ្រូពេទ្យរ៉ាដា តែម្នាក់គត់ដែលតាំងពីចាប់ដៃគ្នាមកសោភា និងប្ដីសល់ទ្រព្យច្រើនរស់នៅផ្ទះវីឡារយ៉ាងប្រណិត និងជិះរថយន្ដថ្លៃៗរហូតមកដល់ពេលនេះពួកគេឈានទៅធ្វើជំនួញធំទៀតផង។
មាស សុខសោភា មិនទាន់មានបទចម្រៀងណាផ្ទុះខ្លាំងដូចមុននោះទេ តាំងពីនាងដើរចេញពីថោន រហូតមកដល់ពេលនេះ បើទោះជាបទចម្រៀងរបស់នាងបានចេញជាបន្ដបន្ទាប់និងមានការសម្រិតសម្រាំងជាពិសេសរាល់ការថតMV ក្ដី។យ៉ាងណាសោភា អាចនឹងបន្ដច្រៀងសម្ដែងនៅរាម ជាច្រើនឆ្នាំតទៅទៀត ព្រោះថាពេលនេះថៅកែស្រីមិនព្រលែងនាងឲ្យទៅផលិតកម្មផ្សេងនោះទេ ខណៈដែលពេជ្រ សោភា កំពុងចាប់ដៃរកស៊ីធំជាមួយថៅកែពេជ្រមួយ ហេតុនេះហើយដើម្បីទប់ទល់លើតារាហង្សមាសគឺមានតែសុខសោភា នេះឯងក្នុងការរក្សារលំនឹងអាជីវកម្មថៅកែរាម ៕