ភ្នំពេញ៖ប៉ាច គីមមួយ បានប្រារពខួបកំណើតរបស់ខ្លួនកាលពីពេលថ្មីៗនេះហើយស្រីស្រស់សាច់សខ្ចីរូបនេះរំភើបចិត្តជាខ្លាំងព្រោះតែអនាគតស្វាមីរបស់នាងលោកសយ រតនៈ បានយកចិត្តទុកដាក់ដល់នាងខ្លាំងព្រមទាំងបានចាប់អោបថើបដោយក្ដីស្រលាញ់ពេញបេះដូងនៅថ្ងៃពិសេសរបស់គីមមួយ ផងដែរ។អ្វីដែលធ្វើឲ្យគីមមួយ កាន់តែពេញចិត្តកំពូលស្នេហ៍ថែមទៀតនោះគឺលោករតនៈ បានទិញកាបូប និងទឹកអប់ម៉ាកប្រេនៗជូននាងទើបធ្វើឲ្យអ្នកសិល្បៈរួមអាជីពដែលធ្លាប់តែដាស់តឿនគីមមួយ ថាប្រយ័ត្នដើរជាន់ដានចាស់ព្រោះស្នេហ៍រកតែប្រុសស្អាតនោះបង្វែរមកជានិយាយថាគីមមួយ ពូកែរកសង្សារមែនគឺមិនត្រឹមតែមានរូបរាងសង្ហារនោះទេ ប៉ុន្ដែលោករតនៈ នេះថែមទាំងពូកែផ្គាប់ចិត្តនាងទៀតផង។
ដោយសារតែប៉ាច គីមមួយ កំពុងតែមានកម្ដៅបេះដូងឡើងវិញក្រោមស្នាដៃប្រុសក្មេងចូលខ្លួនទៅព្យាបាលដំបៅចាស់របស់នាងនោះទើបពេលនេះទោះជាមានមន្រ្ដីធំខ្លះតាមចែចង់ដោយចង់ប្រគល់អ្វីៗគ្រប់យ៉ាងឲ្យតែនាងព្រមស្នេហានោះមិនធ្វើឲ្យទាក់ចិត្តអ្នកមេម៉ាយសាច់សខ្ចីរូបនេះបានឡើយ។ប៉ុន្ដែផ្ទុយទៅវិញនាងគីមមួយ ថែមទាំងមិនចាប់អារម្មណ៍លុយ ឡាន និងវីឡារជាថ្នូរស្នេហានោះថែមទៀតផង ដោយនាងបានប្រកាសថាបេះដូងនាងមិនត្រូវការបុរសដែលមានអាយុចាប់ពី៤០ឆ្នាំឡើងធ្វើជាកំណាន់ចិត្តរបស់នាងឡើយ។ការតាំងចិត្តបែបនេះធ្វើឲ្យប្រុសៗសម្បូរទ្រព្យដែលស្នេហានាងគីមមួយ ជាច្រើនឆ្នាំមកហើយនោះបានខ្ទាតចេញទៅវិញអស់ព្រោះថាភាគច្រើនប្រុសទាំងនោះគឺសុទ្ធតែមានវ័យចំណាស់។
គូរបញ្ជាក់ថាប៉ាច គីមមួយ បានចែកផ្លូវគ្នាកណ្ដាលទីជាមួយអតីតប្ដីដែលជាតារាចម្រៀងម្នាក់និយមច្រៀងបទជាភាសារបរទេស ហើយនាងបានភ្ជាប់ស្នេហ៍ជាមួយលោករតនៈ រយៈពេល៧ឆ្នាំទើបព្រមសារភាពស្នេហ៍កាលពីថ្ងៃទី១៤ខែកុម្ភៈឆ្នាំ២០២២ ដែលពេលនោះនៅពេលប្រុសស្នេហ៍បំពាក់ជញ្ជៀនឲ្យនាងគីមមួយ រំភើបរហូតដល់ស្រក់ទឹកភ្នែករលីងរលោងទៀតផង។យ៉ាងណាទាំងនាងគីមមួយ និងរតនៈ មិនទាន់កំណត់ថ្ងៃដឹកដៃគ្នាចូលរោងការឡើយ ព្រោះពេលនេះពួកគេជាប់ភារកិច្ចបង់រំលស់ផ្ទះរួមគ្នាតម្លៃជិត១០ម៉ឺនដុល្លារ នៅខណ្ឌមានជ័យ ក្រុងភ្នំពេញ។នេះជាគូស្នេហ៍តារា១ទៀតហើយដែលចាប់ផ្ដើមហ៊ានសាងស្នេហ៍ដោយបើកចំហ ខណៈដែលអ្នកជំនាញសិល្បៈបានលើកឡើងថាការដែលអ្នកសិល្បៈជ្រើសយកអ្នកសិល្បៈដូចគ្នាធ្វើជាប្ដីឬប្រពន្ធគឺអាចរក្សារចំណងស្នេហាបានយូរអង្វែងជាងយកអ្នកនៅក្រៅរង្វង់សិល្បៈ៕