ភ្នំពេញ៖ឱក សុគន្ធកញ្ញា ក្រោយមានកូនប្រុស១អាយុជាង២ឆ្នាំនាងត្រូវបានស្វាមីលោកអ៊ឹង សុខលី ស្រលាញ់ថ្នាក់ថ្នមលើសដើមព្រមទាំងហៅតារារូបនេះថាជាឧត្តមភរិយាថែមទៀតផងដែលផ្ទុយពីមនុស្សមួយចំនួនធ្លាប់គិតថាលោកសុខលី ជាបុរសសម្បូរមន្ដស្នេហ៍មិនធម្មតា ព្រោះមុនរៀបការលោកត្រូវបានតារាស្រីៗមួយចំនួនតោងស្នេហ៍ដោយសារតែពួកគេចង់ក្លាយទៅជាប្អូនថៅកែហង្សមាស ប្រាកដជាពេលសុគន្ធកញ្ញា មានកូនឬសម្រស់ប្រែប្រួលចំណងស្នេហាច្បាស់ជាមិនដូចដើមនោះ ឥឡូវពិតជាខុសពីមុនមែនព្រោះថាអ្នកគ្រប់គ្រងទូរទស្សន៍ហង្សមាសរូបនេះបានបង្ហាញកាយវិការកាន់តែស្រលាញ់ភរិយាលោករឹតតែខ្លាំង។
ដោយឃើញបែបនេះទើបក្រុមអ្នកគាំទ្រសុគន្ធកញ្ញា ដែលធ្លាប់តែចាត់ទុកថានាងជាតារាដែលជោគជ័យទាំងអាជីពសិល្បៈ និងស្នេហាព្រមគ្នានោះជម្រុញឲ្យប្អូនថ្លៃថៅកែហង្សមាសរូបនេះយកកូនទី២ឲ្យបានឆាប់កាន់តែល្អព្រោះថាបើបានមែនច្បាស់ជាលោកសុខលី នឹងកាន់តែស្រលាញ់សុគន្ធកញ្ញា ទ្វេដងរហូតចង់លេបចូលពោះក៍ថាបាន។ប៉ុន្ដែពេលនេះកូនប្រុសរបស់សុគន្ធកញ្ញា ឈ្មោះអ៊ឹង បញ្ញាបុត្រ ហៅCharlie នោះមានអាយុជិត២ឆ្នាំកន្លះទៅហើយតែសុគន្ធកញ្ញា មិនទាន់មានសញ្ញាពពោះកូនទី២នោះទេ ខណៈដែលនៅថ្ងៃរៀបការតារាហង្សមាសរូបនេះបានប្រាប់ទៅនាយក្រឹម ថានាងចង់បានកូនដល់ទៅ៣ឯណ្ណោះហេតុនេះហើយនាងត្រូវការតាមយកកូនឲ្យបាន២នាក់ថែមទៀត។តាមព័តមានបានឲ្យដឹងថាសម្រាប់កូនទី២នេះសុគន្ធកញ្ញា ចង់បានកូនស្រី ហេតុនេះហើយមិនដឹងថានាងអាចសម្រេចបំណងនេះបានឬយ៉ាងណាទេ ព្រោះកាលកូនទី១នាងក៍ចង់បានស្រីដែរ តែពេលបានប្រុសនាងថាស្រីក៍បាន ប្រុសក៍បាន។
ឱក សុគន្ធកញ្ញា ស្ថិតក្នុងចំណោមតារាដែលមានកូន១គិតត្រឹមឆ្នាំ២០២២នេះ មានដូចជាអ្នកនាងចន ច័ន្ទលក្ខិណា,សួស វីសា,ពេជ្រ សូលីកា,នៅ សុនិតា ,ផាត់ ផាន់ណា និងឌុច លីដា ជាដើម។គេកត់សម្គាល់ដែរថានៅពេលដែលសុគន្ធកញ្ញា មានកូន១នេះនាងមានការប្រែប្រួលរូបរាងកាយតិចតួចដែរដូចជារាងឡើងគីឡូជាងមុនបន្ដិច និងបន្ថយការច្រៀងសម្ដែងដែលមានច្បាច់រាំកាចៗដូចមុនមានប្ដី។សុគន្ធកញ្ញា ក៍ត្រូវបានគេមើលឃើញដែរថានាងមិនសូវមានទីផ្សារសិល្បៈខ្លាំងក្លាដូចមុនទេ ពោលគឺហាក់នៅទ្រឹងបន្ដិចទោះជាពេលនេះនាងបានចេញវាយលុកទីផ្សារចម្រៀងដូចមុនក្ដី តែបទទាំងនោះមិនសូវផ្ទុះឡើយ ខណៈដែលពេលនេះនាងក៍បានចេញមុខមកវិញក្នុងតំណែងជាគណៈកម្មារការCambodian Idol រដូវកាលទី៤ ដែលគេមើលទៅឃើញសុគន្ធកញ្ញា នៅតែមានព្រលឹងជាងមុនបន្ដិចដដែល ទោះជានាងព្យាយាមហាត់ប្រាណសម្រកទមង្ងន់យ៉ាងណាក៍ដោយ។ប្រសិនបើសុគន្ធកញ្ញា នៅតែយឺតយ៉ាវក្នុងការស្រកគីឡូឲ្យមកដូចដើមនោះទៀត ច្បាស់ជានាងកាន់តែពិបាកប្រឈមប្រជែងទីផ្សារចម្រៀងជាមិនខានហើយពេលនោះតំណែងលេខ១ជាតារាស្រីឈានមុខនៅហង្សមាសកាន់តែស្ថិតនៅក្នុងភាពស្រពិចស្រពិល ថ្វីត្បិតតែអ្នកជំនាញសិល្បៈបានលើកឡើងថាថៅកែហង្សមាសនឹងមិនឲ្យសុគន្ធកញ្ញា ធ្លាក់ចុះ ឬតារាស្រីណាវ៉ានាងក្ដី តែពេលនេះតារាចម្រៀងនៅហង្សមាសមានច្រើនឡើងគជើងគ្នាទើបធ្វើឲ្យការគាំទ្រមានការបែកខ្ញែក។
ឱក សុគន្ធកញ្ញា បានរៀបការជាមួយលោកអ៊ឹង សុខលី កាលពីថ្ងៃទី១៦ខែឧសភា ឆ្នាំ២០១៩ បន្ទាប់ពីពួកគេបានស្វែងយល់ចិត្តគ្នាជិត១០ឆ្នាំ។ក្រោយមានប្ដីនិងកូន១នេះសុគន្ធកញ្ញា នៅរក្សារបានទីផ្សារស្ពតពាណិជ្ជកម្មធំៗទើបធ្វើឲ្យប្រាក់ចំណូលពីសិល្បៈរបស់នាងនៅតែថេ ខណៈនាពេលខាងមុខនេះនាងត្រៀមចេញមុខ៣កម្មវិធីផ្សេងគ្នាទៀតក្នុងនាមជាគណៈកម្មាការនិងគ្រូបង្វឹកមានដូចជាThe Voice Cambodia ,The Voice Kids Cambodia និងX Factor Cambodia ។ប្រភពបានឲ្យដឹងថាមូលហេតុដែលសុគន្ធកញ្ញា ពន្យាពេលយកកូនទី២ព្រោះតែនាងមិនចង់បាត់មុខពីបណ្ដារកម្មវិធីខាងលើ ហើយនាងចង់វាយលុកទីផ្សារចម្រៀងសារជាថ្មីទើបអូសក្រឡាយកកូនថែម៕