ខេត្តកំពង់ស្ពឺ ៖ បុរសម្នាក់ នៅសុខៗ ជិះម៉ូតូ ១គ្រឿង ដែលឪពុកទើបនឹងបង់រំលស់បានថ្មីៗ ដោយប្រាប់ថា ទៅរកកាត់សក់ រួចក៏ចេញពីផ្ទះបាត់ខ្លួនឈឹង មិនឃើញត្រឡប់មកវិញសោះ ជាហេតុធ្វើឱ្យបុរសជាឪពុកមានការព្រួយបារម្ភ ប្រកាសតាមរកកូនប្រុសត្រឡប់មកវិញ។
ករណីនេះ បានកើតឡើង កាលពីថ្ងៃទី០៨ ខែឧសភា ឆ្នាំ២០២២ នៅចំណុចភូមិព្រៃរំដួល ឃុំសែនដី ស្រុកសំរោងទង។
បុរសដែលបាត់ខ្លួន មានឈ្មោះជ័យ ប៊ុនលី អាយុ៣០ឆ្នាំ មានលំនៅក្នុងភូមិកើតហេតុខាងលើ។
តាមប្រភពពីបុរសឈ្មោះអ៊ុំ លាស់ ត្រូវជាឪពុកបង្កើតរបស់បុរសដែលបាត់ខ្លួនខាងលើ បានរៀបរាប់ប្រាប់ កាលពីថ្ងៃទី០៨ ខែឧសភា ឆ្នាំ២០២២ កូនប្រុសរបស់គាត់ ឈ្មោះជ័យ ប៊ុនលី បានជិះម៉ូតូ ១គ្រឿង ម៉ាកហុងដា ឌ្រីម សេ១២៥ ពណ៌ខ្មៅ ស៊េរីឆ្នាំ២០២២ មិនមានស្លាកលេខ (ម៉ូតូទើបបង់រំលស់) ចេញពីភូមិព្រៃរំដួល ឃុំសែនដី ស្រុកសំរោងទង ខេត្តកំពង់សឺ ដោយប្រាប់ថា ទៅកាត់សក់ ស្រាប់តែបាត់រហូតមកដល់ពេលនេះ មិនដឹងទៅទីណា ធ្វើឱ្យគាត់ជាឪពុក មានការព្រួយបារម្ភយ៉ាងខ្លាំង។
បន្ទាប់ពីតាមរកសព្វកន្លែង នៅតែមិនមានតម្រុយ ទើបបុរសជាឪពុក បានសម្រេចដាក់ពាក្យបណ្តឹងឱ្យសមត្ថកិច្ចជួយអន្តរាគមន៍តាមរកកូនប្រុសរបស់គាត់ត្រឡប់មកវិញ។
ជាមួយនេះ បរុសជាឪពុក បានអំពាវនាវដល់បងប្អូនប្រជាពលរដ្ឋដែលបានឃើញបុរសដែលមានភិនភាគដូចក្នុងរូបថតខាងលើ សូមជួយផ្តល់ដំណឹងដល់គាត់ តាមរយៈលេខទូរស័ព្ទ ០៩៦ ៩៩២ ២៤៥៧ ៕