Friday, March 29, 2024
Homeព័ត៌មានជាតិព្រឹកបង្ក្រាបជល់មាន់ ថ្ងៃចាប់ខ្លាឃ្លោក

ព្រឹកបង្ក្រាបជល់មាន់ ថ្ងៃចាប់ខ្លាឃ្លោក

ខេត្តពោធិ៍សាត់ ៖ កម្លាំងសមត្ថកិច្ចស្រុកតាលោសែនជ័យ នៅថ្ងៃទី៣០ ខែមិថុនា ឆ្នាំ២០២២ បានចុះធ្វើការបង្ក្រាបក្រុមអ្នកញៀនល្បែងស៊ីសង ចំនួន ២វង់ផ្សេងគ្នា ដោយព្រឹក បង្ក្រាបសង្វៀនបញ្ជល់មាន់ ថ្ងៃ បង្ក្រាបវង់ខ្លាឃ្លោក តែយ៉ាងណា ក្រុមអ្នកញៀនល្បែង បានរត់គេចអស់។

លោកវរសេនីយ៍ឯក អ៊ុល ហៃ អធិការនគរបាលស្រុកតាលោសែនជ័យ បានឱ្យដឹងនៅព្រលប់ថ្ងៃទី៣០ ខែមិថុនា ឆ្នាំ២០២២ ថា ករណីបង្ក្រាបល្បែងបញ្ជល់មាន់ ធ្វើឡើងនៅចំណុចផ្ទះឈ្មោះសុង សុខឃឿន ភេទប្រុស អាយុ៣៣ឆ្នាំ ភូមិកណ្តាល ឃុំផ្ទះរ៉ុង ស្រុកតាលោសែនជ័យ ដោយសមត្ថកិច្ចដកហូតបានជញ្ជីងថ្លឹងមាន់មួយ សង្វៀនជល់មាន់ ហើយបានដុតបំផ្លាញចោលនៅនឹងកន្លែង។

លោកអធិការ បន្តថា នៅថ្ងៃដដែលនោះដែរ សមត្ថកិច្ចបានធ្វើកាបង្ក្រាបល្បែងស៊ីសង ខ្លាឃ្លោក ១កន្លែង នៅចំណុចផ្ទះរបស់ឈ្មោះសៅ វ៉ិត ភេទប្រុស អាយុ៤៣ឆ្នាំ នៅភូមិជង្រុក ឃុំផ្ទះរុង ស្រុកតាលោសែនជ័យ ដោយសមត្ថកិច្ចដកហូតបានគ្រាប់ក្រឡុកខ្លាឃ្លោក មួយឈុត ត្រូវបានធ្វើការដុតកម្ទេចចោលនៅនឹងកន្លែងដូចគ្នា។

ដោយឡែកនៅក្នុងការបង្ក្រាបទាំងពីរកន្លែងខាងលើ ក្រុមអ្នកញៀនល្បែងទាំងនោះ ហាក់ដឹងខ្លួនមុន ទើបនាំគ្នារត់គេចខ្លួនអស់។

នៅក្នុងការបង្ក្រាបបទល្មើសល្បែងស៊ីសងខាងលើនេះ សមត្ថកិច្ចបាននាំម្ចាស់ផ្ទះទាំង ២កន្លែងខាងលើ ទៅធ្វើការអប់រំ និងធ្វើកិច្ចសន្យានៅប៉ុស្តិ៍រដ្ឋបាលឃុំផ្ទះរុង ឈប់លេងល្បែងស៊ីសងបន្តទៀត៕

RELATED ARTICLES