ចោរឆក់កាបូបស្រី សន្តិសុខក្របួចជាប់

ខេត្តព្រះសីហនុ ៖ ជនសង្ស័យម្នាក់ បានធ្វើសកម្មភាពឆក់កាបូបស្ត្រីជាបុគ្គលិកកាស៊ីណូម្នាក់ បណ្តាលឱ្យដួលម៉ូតូ ទាំងអស់គ្នា ហើយភ្លាមនោះ ក៏ត្រូវបានសន្តិសុខនៅក្បែរនោះ ប្រទះឃើញ ស្ទុះចេញមមកជួយចាប់ក្របួចជនសង្ស័យជាប់ ប្រគល់ឱ្យសមត្ថកិច្ច នាំយកទៅចាត់ការតាមច្បាប់។

ករណីខាងលើនេះ បានកើតឡើង កាលពីវេលាម៉ោង ៧យប់ ថ្ងៃទី០៩ ខែកក្កដា ឆ្នាំ២០២២ ស្ថិតនៅផ្លូវបេតុង ម្តុំអង្គកាម្លប់តាប៉ាង ក្រុមទី៤ ភូមិ៤ សង្កាត់លេខ៤ ក្រុងព្រះសីហនុ។

ជនសង្ស័យដែលត្រូវសមត្ថកិច្ចចាប់ឃាត់ខ្លួន មានឈ្មោះសៀង សុខុម ភេទប្រុស អាយុ៣០ឆ្នាំ មុខរបរបុគ្គលិកក្រុមហ៊ុនវ៉ាវណាវ បច្ចុប្បន្នស្នាក់នៅរំដួលជើងភ្នំភូមិ៣ ទំនប់រលក សង្កាត់លេខ១ ក្រុងព្រះសីហនុ។ ចំណែកជនរងគ្រោះ មានឈ្មោះអ៊ុក ស្រីនាង ភេទស្រី អាយុ២២ឆ្នាំ មុខរបរបុគ្គលិកកាស៊ីណូ បច្ចុប្បន្នស្នាក់នៅភូមិ៥ សង្កាត់លេខ៤ ក្រុង-ខេត្តព្រះសីហនុ។

យោងតាមបណ្តឹងជនរងគ្រោះ បានឱ្យដឹងថា មុនពេលកើតហេតុ នាងបានជិះម៉ូតូចេញពីហូបកាហ្វេ រួចជិះម៉ូតូម្នាក់ឯង ទៅទួលខ្សាច់ ស្រាប់តែពេលជិះដល់អង្គការម្លប់តាប៉ាង មានបុរសម្នាក់ ជិះម៉ូតូតាមពីក្រោយ រួចធ្វើសកម្មភាពឆក់កាបូបស្ពាយរបស់នាង ធ្វើឱ្យដាច់ខ្សែ និងបណ្តាលឱ្យដួលម៉ូតូទាំងអស់គ្នា ហើយភ្លាមនោះក៏មានសន្តិសុខយាមក្បែរនោះ ចេញមកជួយឃាត់ខ្លួនជនសង្ស័យជាប់តែម្តង រួចប្រគល់ឱ្យសមត្ថកិច្ចនាំយកទៅចាត់ការតាមច្បាប់។

តាមប្រភពពីសមត្ថកិច្ច បានបញ្ជាក់ឱ្យដឹងថា បន្ទាប់ពីឃាត់ខ្លួនជនសង្ស័យ សមត្ថកិច្ចបានធ្វើការដកហូតវត្ថុតាង រួមមាន ម៉ូតូ ម៉ាកឡែន ពណ៌ខៀវលាយខ្មៅ ពាក់ស្លាកលេខ កំពត 1B-1463 (មធ្យោបាយធ្វើសកម្មភាព) កាបូបស្ពាយ១ ក្នុងនោះ មានទូរសព្ទ័ដៃ ១គ្រឿង ម៉ាក iPhone ពណ៌ស (ជារបស់នារីរងគ្រោះ)។

ជនសង្ស័យខាងលើ ត្រូវបានកម្លាំងជំនាញបានឃាត់ខ្លួននៅអធិការដ្ឋាននគរបាលក្រុងព្រះសីហនុ ដើម្បីធ្វើការកសាងសំណុំរឿងបញ្ជូនទៅកាន់សាលាដំបូងខេត្ត ចាត់ការបន្តតាមនីតិវិធី៕