ភ្នំពេញ៖អ្នកនាងអម្ពរ ទេវី បានប្រារពខួបកំណើតគម្រប់អាយុ៥២ឆ្នាំនៅរដ្ឋកាលីហ្វ័រញ៉ាកាលពីថ្ងៃទី១៧ខែកក្កដាឆ្នាំ២០២២ ដោយមានមិត្តភក្ដិនិងអ្នកគាំទ្ររបស់នាងបានច្រៀងជូនពរយ៉ាងកងរំពងពេញសាល ខណៈដែលអ្នកនាងទេវី ឡើងច្រៀងបត”ស្រា១កែវ”។ដោយឡែកតារាសម្ដែងដែលរាប់អាននិងជិតដិតបំផុតរបស់អ្នកនាងទេវី គឺអ្នកស្រីកែវ កល្យាណ ដែលកំពុងតែរស់នៅស្រុកខ្មែរឯណ្ណោះវិញបានផ្ញើរសារជូនពរអតីតតារារួមជំនាន់រូបនេះពីចម្ងាយថា”ពីមិត្តកល្យាណ សូមជូនពរពួកម៉ាកទេវី ក្នុងថ្ងៃខួបកំណើត សូមឲ្យមានសម្រស់ស្អាតជានិច្ច មានសុខភាពល្អនិងសេចក្ដីសុខក្នុងក្រុមគ្រួសារ និងឲ្យស្វាមីស្រលាញ់ថ្នាក់ថ្នមមើលថែអស់១ជីវិត”។
អ្នកនាងអម្ពរ ទេវី បានបង្ហាញទឹកមុខរីករាយខ្លាំងណាស់នៅថ្ងៃកំណើតរបស់នាងឆ្នាំនេះ ហើយនាងត្រូវបានខ្មែរនៅអាមេរិកចាត់ទុកថានាងជាតារាភាពយន្ដខ្មែរម្នាក់ដែលល្បីល្បាញបំផុតប្រចាំទសវត្សន៍ទី៨០និង៩០ទៀតផង។ប៉ុន្ដែសម្រាប់អតីតស្វាមីនាងលោកពេជ្រ ភារុណ ដែលនៅក្នុងស្រុកឯណ្ណោះវិញមិនបានបង្ហាញសារជូនពរទៅអតីតភរិយានៅថ្ងៃពិសេសរបស់នាងទេ ព្រោះលោកភារុណ នៅស្ងប់ស្ងាត់ បើទោះជាសព្វដងឲ្យតែអ្នកនាងទេវី មកខ្មែរលោកតែងតែរ៉ាប់រងការស្នាក់នៅនិងសម្លៀកបំពាក់ជូនអ្នកនាងនាង គ្រប់ពេលវេលាក្ដី។
គូរបញ្ជាក់ថាអ្នកនាងអម្ពរ ទេវី បានចេញទៅរស់នៅលើទឹកដីអាមេរិកជិត២០ឆ្នាំមកហើយដែលនៅទីនោះនាងមិនបានចាប់អាជីពច្រៀងសម្ដែងតាមកម្មវិធីមួយចំនួនដូចតារាខ្មែរខ្លះនោះទេក្រោយនាងមានស្វាមីថ្មីនិងកូនស្រី១ទៀត។កាលពីឆ្នាំ២០១៧ អតីតតារារូបនេះបានចុះមកខ្មែរដើម្បីថតភាពយន្ដរឿង”ទឹកចិត្តម្ដាយសម័យថ្មី”របស់អ្នកស្រីពាន់ ភួងបុប្ផា និងរឿងមួយផ្សេងទៀតរបស់LD ។តាមព័តមានថាមុនផ្ទុះកូវីដហង្សមាសក៍ត្រៀមធ្វើភាពយន្ដមួយជូនអ្នកនាងទេវី និងលោកទេព រិនដារ៉ូ ចាប់ដៃគ្នាសម្ដែងសារជាថ្មីដែរ តែដំណឹងនោះបានស្ងប់ស្ងាត់ទៅវិញ ខណៈដែលលោកភារុណ ធ្លាប់បង្ហើបថាអតីតប្រពន្ធរបស់លោកចុះមកថតរឿងនៅខ្មែរម្ដងទាល់តែបានតម្លៃខ្លួន១រឿង១ម៉ឺនដុល្លារបូករួមទាំងការស្នាក់នៅនិងសំបុត្រយន្ដហោះទៅមកខាងផលិតកម្មជាអ្នករ៉ាប់រងទើបអ្នកនាងទេវី អាចមកបាន។
សូមរំលឹកដែរថាអ្នកនាងអម្ពរ ទេវី បានរៀបការជាមួយលោកពេជ្រ ភារុណ កាលពីខែតុលាឆ្នាំ១៩៩២ ហើយមុនលែងលះគ្នាអ្នកទាំងពីរទទួលបានចំណងដៃកូន២នាក់គឺកូនទី១ប្រុសឈ្មោះភិរុណ ឥទ្រ្ទបុត្រ និងកូនទី២ស្រីឈ្មោះភិរុណា លក្ស្ញីទេវី ដែលពេលនេះកូនប្រុសរបស់នាងបានក្លាយទៅជាទាហានអាមេរិកនិងមានភរិយាជាជនជាតិបរទេសហើយបានផ្ដល់ចៅទី១ឲ្យអ្នកនាងទេវី កាលពីថ្ងៃទី១០ខែមករាដោយអ្នកនាង បានដាក់ឈ្មោះថាLionel G Phirun ហៅអនន្ទ ឬArun ។មិនទាន់មានព័តមានពីការវិលមកលេងស្រុកជាថ្មីរបស់អ្នកនាងទេវី នោះទេ ប៉ុន្ដែគេឃើញនាងមានសុភមង្គលដូចអុ្នកនាងកល្យាណ ជូនពរនាងដែរព្រោះស្វាមីក្រោយនាងលោកPauly Hep តែងតែបង្ហាញកាយវិការថ្នាក់ថ្នមនិងស្រលាញ់អ្នកនាងទេវី ខ្លាំងណាស់ស្របពេលដែលអ្នកនាង បានចាត់ទុកអងតីតប្ដីលោកភារុណ ថាជាឪពុកទៅវិញ។តែអតីតស្វាមីអ្នកនាងទេវី មិនដែលមានអារម្មណ៍អាកអន់ស្រពោនចិត្តរឿងភរិយាចាស់របស់លោកមានប្ដីថ្មីឡើយ ហើយពេលនេះលោកគ្មានបំណងយកប្រពន្ធថ្មីទៀតឡើយពោលគឺសុខចិត្តនៅម្នាក់ឯងអស់១ជីវិត។
ក្រៅពីអ្នកនាងអម្ពរ ទេវី តារាដែលយកស្វាមីអាណិកជនខ្មែរនៅអាមេរិកមានដូចជាអ្នកនាងគឹម លក្ខិណា,វ៉េត រតនា ,សារ៉ាយ សក្ខណា និងវ៉ាង ស្រីណូ ជាដើម៕
