ខេត្តកំពត ៖ ស្ត្រីម្នាក់ បានធ្វើសកម្មភាពយកពូថៅកាប់បុរសជាអ្នកភូមិម្នាក់ បណ្តាលឱ្យរងរបួសយ៉ាងដំណំ លុះអ្នកភូមិនាំគ្នាដេញចាប់ ស្រាប់តែស្ត្រីរូបនោះ បានរត់គេច រួចលោតចូលទឹកប្រឡាយ ដែលកំពុងហូរកួចត្របាញ់ បណ្តាលឱ្យទឹកកួចលិចបាត់ខ្លួន រកសពមិនទាន់ឃើញនៅឡើយ។
ករណីខាងលើនេះ បានកើតមានការភ្ញាក់ផ្អើលឡើង កាលពីវេលាម៉ោង ៥ល្ងាច ថ្ងៃទី១៨ ខែកក្កដា ឆ្នាំ២០២២ នៅចំណុចភូមិក្រាំងដូង ឃុំសំរោងក្រោម ស្រុកបន្ទាយមាស។
ស្ត្រីដែលកាប់អ្នកភូមិបណ្តាលឱ្យរបួស រួចលោតចូលទឹកស្ទឹង បាត់ខ្លួននោះ មានឈ្មោះពេជ្រ សូរិយា អាយុ៣៨ឆ្នាំ (ជាមនុស្សមានសតិមិនប្រក្រតី) មានប្តី មានកូនស្រីម្នាក់ អាយុ១២ឆ្នាំ មានលំនៅក្នុងភូមិក្រាំងដូង ឃុំសំរោងក្រោម ស្រុកបន្ទាយមាស ។
តាមប្រភពពីកន្លែងកើតហេតុ បានឱ្យដឹងថា មុនពេលកើតហេតុ កាលពីវេលាម៉ោង ៥ល្ងាច ថ្ងៃទី១៨ ខែកក្កដា ឆ្នាំ២០២២ ស្ត្រីខាងលើ បានប្រើពូថៅកាប់ទៅលើបុរសជាអ្នកភូមិម្នាក់ បណ្តាលឱ្យរងរបួសដៃយ៉ាងដំណំ ហើយភ្លាមនោះ ជនរងគ្រោះត្រូវបានក្រុមគ្រួសារដឹកបញ្ជូនទៅកាន់មន្ទីរពេទ្យឯកជនមួយ នៅផ្សារទូកមាស ក្នុងស្រុកបន្ទាយមាស ដើម្បីព្យាបាលរបួស។
ដោយឡែក ស្ត្រីឈ្មោះពេជ្រ សូរិយា ដែលកាប់គេ ត្រូវបានអ្នកភូមិនាំគ្នាដេញចាប់ ក៏រត់ចេញពីភូមិ សំដៅទៅទិសខាងលិច លុះពេលរត់មកដល់ត្រង់ចំណុចកើតហេតុ ក៏បានលោតចូលទៅក្នុងទឹកប្រឡាយ បាត់ខ្លួនតែម្តង។
តាមសម្តីស្ត្រីឈ្មោះពេជ្រ ស្រីពៅ អាយុ៤៩ឆ្នាំ ត្រូវជាបងស្រីបង្កើត បានរៀបរាប់ប្រាប់ថា ប្អូនស្រីគាត់ (ពេជ្រ សូរិយា) មានកូន មានប្តី បន្ទាប់ពីរៀបការហើយ ប្អូនស្រីគាត់បានចេញទៅរកស៊ីនៅខេត្តសៀមរាប តែក្រោយមកបានត្រឡប់មកនៅស្រុកកំណើតវិញ (ភូមិក្រាំងដូង) លុះក្រោយពីប្អូនស្រីគាត់ឆ្លងទន្លេហើយ ស្រាប់តែមានសុខភាពមិនល្អ ដែលតាមចាស់ៗបុរាណច្រើនតែនិយាយថា ក្រឡាភ្លើង ឬថាព្រាយចូលសណ្ឋិត ធ្វើឱ្យប្អូនស្រីវង្វេងមុខក្រោយ មិនគ្រប់រហូតដល់សព្វថ្ងៃតែម្តង។
ស្ត្រីខាងលើ បានបន្តថា បន្ទាប់ពីបានកាប់បុរសជាអ្នកភូមិម្នាក់របួស ប្អូនស្រីគាត់ ត្រូវអ្នកភូមិដេញចាប់ រហូតមានការភិតភ័យ ក៏លោតទឹកប្រឡាយ បាត់ខ្លួនតាំងពីល្ងាចថ្ងៃទី១៨ ខែកក្កដា ឆ្នាំ២០២២ ហើយត្រូវក្រុមគ្រួសារនាំគ្នាចុះរាវរកភ្លាមៗដែរ តែរកមិនទាន់ឃើញនៅឡើយ។
លោកអ៊ុក សំអុល ប្រធាននគរបាលប៉ុស្តិ៍សំរោងក្រោម បានបញ្ជាក់ប្រាប់ថា ករណីនេះ នគរបាលប៉ុស្តិ៍ សហការជាមួយនិងប្រជាការពារ បានខំស្វែងរកស្ត្រីបាត់ខ្លួន រយៈពេលពីរថ្ងៃហើយ នៅតែរកសពមិនទាន់ឃើញនៅឡើយ គិតត្រឹមរសៀលថ្ងៃទី១៩ ខែកក្កដា ឆ្នាំ២០២២៕